Koheleta 12:1-14
12 No reira, a haamanaˈo i to oe Atua poiete rahi i te mau mahana o to oe apîraa,+ hou a tae mai ai te mau mahana ahoaho*+ e te mau matahiti e parau ai oe: “Aita vau i oaoa aˈe i te reira,”
2 hou te mahana, te maramarama, te avaˈe e te fetia e poiri ai,+ e hou te ata e hoˈi mai ai i muri aˈe i te ûa,*
3 i te mahana e rûrû ai te mau tiai fare, e piˈo ai te mau tane puai, e faaea ˈi te mau vahine i te taviri i te huero maa no te mea ua iti mai ratou e e manaˈo ai te mau vahine e hiˈo ra i rapae na te haamaramarama e mea poiri,+
4 ua tapiri-anaˈe-hia te mau uputa e pipiha ˈi i te aroâ, ia mǎrû mai te maniania o te ofai oro, ia tia mai te tahi i te taˈi o te manu e ia mǎrû mai te reo o te mau tamahine himene.+
5 E taiâ-atoa-hia te mau vahi teitei, e e riariahia i te aroâ. E e tiarehia te tumu sekadi,+ e nee te vivi, e ore te hiaai i te maa,* no te mea te haere ra te taata i to ˈna fare hopea+ e te overe ra te feia oto na te aroâ,+
6 hou e fati ai te taura ario, e parari ai te auˈa auro, e huˈahuˈa ˈi te farii i te pape pihaa e e parari ai te huira no te huti mai i te pape i te tura pape.
7 I reira te repo e hoˈi ai i te fenua,+ te vahi no reira mai te reira, e te puai ora* e hoˈi ai i te Atua mau tei horoa mai i te reira.+
8 “E faufaa ore iti rahi!,” te parau ra te taata haaputuputu.+ “Mea faufaa ore te mau mea atoa.”+
9 Ua riro te taata haaputuputu ei taata paari, e ere râ te reira anaˈe, ua tamau atoa oia i te haapii i te taata i ta ˈna i ite,+ e ua feruriruri e ua maimi oia no te haaputuputu* e rave rahi parau paari.+
10 Ua tutava te taata haaputuputu i te imi mai i te mau parau au+ e i te papai i te mau parau papu o te parau mau.
11 E au te mau parau a te taata paari i te patia puaatoro,+ e te haaputuraa o ta ratou mau parau i te mau naero tei patiti-maitai-hia. No ǒ mai te reira i te hoê noa tiai.
12 Hau atu i te reira, ta ˈu tamaiti, te faaara ˈtu nei au: Aita e hopearaa ia papai e rave rahi buka, e mea rohirohi no te tino ia faataa rahi roa i te taime no te reira.+
13 Teie te puohuraa, ua faahitihia hoi te mau mea atoa: A mǎtaˈu i te Atua mau+ e a haapao i ta ˈna mau faaueraa,+ tera noa hoi te hopoia a te taata.+
14 E haava hoi te Atua mau i te mau ohipa atoa, oia atoa te mau mea tei hunahia, no te ite mea maitai anei aore ra mea ino.+
Nota i raro i te api
^ Aore ra “ati.”
^ Huri-atoa-hia “e te ûa.”
^ Na roto i te reo Hebera, ua faahitihia hoê maa hotu no te faaara i te hiaai i te maa.
^ Aore ra “faanaho.”
