Koheleta 2:1-26
2 Na ô ihora vau i roto i to ˈu aau: “A haere mai e e tamata anaˈe i te mau mea navenave* a ite atu ai i te maitai e noaa mai.” Inaha râ, mea faufaa ore atoa te reira.
2 Ua parau vau no te ata: “E maamaa!”
E no te navenave:* “Eaha te faufaa?”
3 Ua faaoti au e ite i te maitai i te inuraa i te uaina,+ a tapea noa ˈi i to ˈu feruriraa paari. Ua tauahi roa atoa vau i te maamaaraa no te ite eaha te ohipa maitai roa ˈˈe ta te mau taata e rave i te roaraa o to ratou oraraa poto i raro aˈe i te raˈi.
4 E ohipa rohirohi ta ˈu i rave.+ Ua patu vau i te tahi mau fare no ˈu.+ Ua faaapu vau i te vine na ˈu.+
5 Ua hamani au i te tahi mau ô rarahi e te tahi mau ô nainai no ˈu, e ua tanu vau i roto i te maa hotu ua rau te huru.
6 Ua hamani au i te tahi mau pape hopu na ˈu, no te faararirari i te hoê faaapu tumu raau* ruperupe.
7 Ua noaa ia ˈu te tavini tane e te tavini vahine,+ e e tavini ta ˈu tei fanauhia i roto i to ˈu fare.* Ua noaa atoa ia ˈu e rave rahi animara, te puaatoro, te mamoe e te puaaniho,+ hau aˈe i te mau taata atoa tei na mua ˈˈe ia ˈu i Ierusalema.
8 Ua haapue au i te ario e te auro na ˈu,+ te taoˈa* a te mau arii e to te mau fenua.+ Ua haaputuputu vau i te feia himene no ˈu, te tane e te vahine, oia atoa te mea e oaoa roa ˈi te mau tamaiti a te taata: te vahine, oia mau, e rave rahi vahine.
9 Riro maira ïa vau ei taata rahi e tei hau aˈe i te taata atoa tei na mua ˈˈe ia ˈu i Ierusalema.+ E vai noa ˈtura to ˈu paari ia ˈu ra.
10 Aita vau i faaere ia ˈu i te mau mea atoa ta ˈu i hinaaro.*+ Aita vau i faaere i to ˈu aau i te mau mea navenave* ua rau te huru, ua oaoa hoi to ˈu aau no te mau ohipa rohirohi atoa ta ˈu i rave, e tera ïa ta ˈu haamaitairaa* no te mau ohipa rohirohi atoa ta ˈu i rave.+
11 Ia ˈu râ i feruri i te mau ohipa atoa ta to ˈu iho rima i rave e i te mau ohipa rohirohi atoa ta ˈu i rohi,+ ite ihora vau e mea faufaa ore te mau mea atoa, e aˈuaˈuraa mataˈi.+ Aita e ohipa faufaa mau* i raro aˈe i te mahana.+
12 Feruri atura vau i te paari e te maamaa e te haapao ore.+ (Eaha hoi ta te taata no muri mai i te arii e nehenehe e rave? Te mea noa tei rave-aˈena-hia.)
13 E ite ihora vau e apî to te paari i nia i te maamaa,+ mai te maramarama iho â e apî to ˈna i nia i te poiri.
14 Ua araara te mata o te taata paari,*+ te haere nei râ te maamaa i roto i te poiri.+ Ua taa atoa ia ˈu e hoê â hopea to ratou pauroa.+
15 Na ô ihora vau i roto i to ˈu aau: “Ta te maamaa e faaruru, e faaruru atoa vau.”+ Eaha ïa te apî no ˈu ia riro ei taata paari roa ino? Na ô ihora vau i roto i to ˈu aau: “Mea faufaa ore atoa te reira.”
16 Eita hoi te taata paari e haamanaˈohia hau aˈe i te taata maamaa.+ I te mau mahana i mua nei, e moˈehia te parau o te taata atoa. E e nafea te taata paari e pohe ai? Mai te taata maamaa atoa.+
17 Vahavaha ihora ïa vau i te ora,+ no te mea ia ˈu, mea ahoaho te mau ohipa atoa e ravehia ra i raro aˈe i te mahana, mea faufaa ore hoi te mau mea atoa,+ e aˈuaˈuraa mataˈi.+
18 Vahavaha ihora vau i te mau ohipa atoa ta ˈu i rohi i raro aˈe i te mahana,+ no te mea e vaiiho vau i te reira no te taata no muri mai ia ˈu.+
19 E o vai tei ite e riro mai anei oia ei taata paari aore ra ei maamaa?+ Na ˈna hoi e fatu i te mau mea atoa ta ˈu i rohi e i feruri ma te paari ia noaa mai i raro aˈe i te mahana. Mea faufaa ore atoa te reira.
20 Hepohepo ihora ïa to ˈu aau no te mau ohipa rohirohi atoa ta ˈu i rohi i raro aˈe i te mahana.
21 E nehenehe hoi te hoê taata e rohi i te ohipa, arataihia e te paari, te ite e te aravihi, e tuu mau â râ oia i ta ˈna tuhaa* i te tahi taata tei ore i rohi no te reira.+ Mea faufaa ore atoa te reira e te ati rahi.
22 Eaha mau na te apî no te hoê taata ta ˈna mau ohipa rohirohi atoa e to ˈna onoono* e rave i te ohipa rohirohi i raro aˈe i te mahana?+
23 I te roaraa hoi o to ˈna mau mahana atoa, e mauiui e te oto te noaa mai i ta ˈna ohipa,+ e i te po atoa eita to ˈna aau e faafaaea.+ Mea faufaa ore atoa te reira.
24 Aita ˈtu e mea maitai aˈe no te hoê taata i te tamaaraa, te inuraa e te oaoaraa* no ta ˈna ohipa rohirohi.+ Tera atoa, ua taa ia ˈu, no ǒ mai i te rima o te Atua mau,+
25 o vai hoi te amu e te inu i te mau mea maitai aˈe i ta ˈu?+
26 I te taata ta ˈna e mauruuru, e horoa oia i te paari, te ite e te oaoa.+ I te taata rave hara râ, e horoa oia i te ohipa e haaputuputu e e haapue i te taoˈa na te taata ta te Atua mau e mauruuru.+ Mea faufaa ore atoa te reira, e aˈuaˈuraa mataˈi.
Nota i raro i te api
^ Aore ra “oaoa.”
^ Aore ra “oaoa.”
^ Aore ra “uru raau.”
^ Heb: “e tamaiti o te utuafare ta ˈu.”
^ Aore ra “faufaa taa ê.”
^ Heb: “ta to ˈu mata i ani.”
^ Aore ra “oaoa.”
^ Aore ra “tuhaa.”
^ Aore ra “ohipa e apîhia.”
^ Heb: “Tei roto te mata o te taata paari i to ˈna upoo.”
^ Aore ra “faufaa taatoa.”
^ Heb: “te tautooraa o to ˈna aau.”
^ Aore ra “te imiraa i te maitai no ˈna.”
