Mitirho 9:1-43
9 Kambe leswi Sawulo a ha tiyimisele ku xanisa ni ku dlaya vadyondzisiwa va Hosi,+ a ya eka muprista lonkulu
2 a ya kombela mapapila lama yaka emasinagogeni ya le Damaska, leswaku loko a kuma vavanuna ni vavasati lava a va ri va Ndlela+ a ta vuya na vona eYerusalema va bohiwile.
3 Loko a ri endleleni naswona a ri ekusuhi ni ku fika eDamaska, hi xitshuketa ku vonakala loku humaka etilweni ku n’wi rhendzela,+
4 hiloko a wela ehansi kutani a twa rito ri ku eka yena: “Sawulo, Sawulo, u ndzi xanisela yini?”
5 A ku: “Hi wena mani, Hosi?” Yena a ku: “Hi mina Yesu,+ loyi u n’wi xanisaka.+
6 Kambe pfuka u nghena emutini, kutani u ta byeriwa leswi u faneleke ku swi endla.”
7 Vavanuna lava a va famba na yena va yima va ku whii, rito leri a ri vulavula a va ri twa kambe a va nga voni munhu.+
8 Kutani Sawulo a tlakuka, hambileswi matihlo yakwe a ma pfulekile a a nga voni nchumu. Hiloko va n’wi yisa eDamaska va n’wi khome hi voko.
9 Naswona ku ringana masiku manharhu a a nga voni nchumu,+ a a nga dyi hambi ku ri ku nwa.
10 A ku ri ni mudyondzisiwa un’wana la vuriwaka Ananiya+ eDamaska, kutani Hosi yi ku eka yena exivonweni: “Ananiya!” Yena a ku: “Hi mina loyi, Hosi.”
11 Hosi yi ku eka yena: “Tlakuka, u ya exitarateni lexi vuriwaka Lulama, u ya lava wanuna la vuriwaka Sawulo, loyi a humaka eTarso,+ endlwini ya Yudasi. Hikuva waswivo, u le ku khongeleni,
12 naswona exivonweni u vone wanuna la vuriwaka Ananiya a nghena a n’wi tlhandleka mavoko leswaku a tlhela a vona.”+
13 Kambe Ananiya a hlamula a ku: “Hosi, ndzi twe vo tala va vulavula hi wanuna loyi, mayelana ni swilo hinkwaswo swo biha leswi a swi endleke eka vakwetsimi va wena eYerusalema.
14 Kutani sweswi vaprista lavakulu va n’wi nyike mpfumelelo wo khoma hinkwavo lava vitanaka vito ra wena.”+
15 Kambe Hosi yi ku eka yena: “Famba, hikuva wanuna loyi i xibya lexi ndzi tihlawuleleke xona+ leswaku a ta twarisa vito ra mina eka matiko+ swin’we ni le ka tihosi+ ni le ka vana va Israyele.
16 Hikuva ndzi ta n’wi komba maxangu hinkwawo lawa a nga ta langutana na wona hikwalaho ka vito ra mina.”+
17 Hiloko Ananiya a famba a ya nghena endlwini, kutani a n’wi tlhandleka mavoko a ku: “Sawulo, makwerhu, Hosi Yesu la humeleleke eka wena endleleni loko u ta haleno, u ndzi rhumile leswaku u ta tlhela u vona ni leswaku u tala moya lowo kwetsima.”+
18 Hi nkarhi wolowo, ematihlweni yakwe ku wa leswi a swi languteka ku fana ni mahakatimba kutani a tlhela a vona. Hiloko a tlakuka a khuvuriwa,
19 a dya swakudya a kuma matimba.
U tshame masiku yo hlayanyana ni vadyondzisiwa eDamaska+
20 kutani xikan’wekan’we a sungula ku chumayela hi Yesu emasinagogeni leswaku loyi i N’wana wa Xikwembu.
21 Kambe hinkwavo lava a va n’wi twa va hlamala kutani va ku: “Xana wanuna loyi a hi yena loyi a a va xanisa hi tihanyi lava a va ri eYerusalema lava a va vitana vito leri?+ Xana a nga telanga ku ta va khoma kutani a va yisa eka vaprista lavakulu?”+
22 Kambe Sawulo a ya a kuma matimba naswona a a hlanganisa tinhloko ta Vayuda lava a va tshama eDamaska loko a kombisa hi ndlela leyi twisisekaka leswaku loyi i Kreste.+
23 Endzhaku ka masiku yo tala, Vayuda va boha makungu ya ku n’wi dlaya.+
24 Hambiswiritano, Sawulo a tivisiwa rhengu ra vona. A va tlhela va ti rindza swinene tigede vusiku ni nhlikanhi leswaku va ta n’wi dlaya.
25 Hiloko vadyondzisiwa vakwe va n’wi teka, va n’wi humesa nivusiku hi mbhovo lowu a wu ri ekhumbini, va n’wi nembeleta hi basikiti.+
26 Loko a fika eYerusalema+ u endle matshalatshala yo tihlanganisa ni vadyondzisiwa, kambe hinkwavo a va n’wi chava hikuva a va nga tshembi leswaku i mudyondzisiwa.
27 Kutani Barnaba+ a n’wi pfuna a n’wi yisa eka vaapostola, a fika a va byela hi vuxokoxoko ndlela leyi Sawulo a voneke Hosi+ ha yona endleleni ni leswaku yi vulavule na yena, ni ndlela leyi a vulavuleke hi xivindzi ha yona hi vito ra Yesu eDamaska.+
28 Kutani a tshama na vona, a fambafamba a tshunxekile eYerusalema a ri karhi a vulavula hi vito ra Hosi hi xivindzi.
29 A a vulavula ni ku kanetana ni Vayuda lava vulavulaka Xigriki, kambe vona a va lava tindlela ta ku n’wi dlaya.+
30 Loko vamakwavo va twa sweswo, va n’wi yisa eKhezariya kutani va n’wi rhumela eTarso.+
31 Kutani mavandlha hinkwawo ya le Yudiya, Galeliya na Samariya+ ma va ni ku rhula, ma tiya; naswona ma ye ma andza ma ri karhi ma chava Yehovha* ni ku chaveleriwa hi moya lowo kwetsima.+
32 Loko Petro a ri karhi a fambafamba etikweni, u fike ni le ka vakwetsimi lava a va tshama eLida.+
33 Kwalaho u kume wanuna un’wana loyi a vuriwaka Eniya, loyi a a tshama a etlele esangwini a nga koti nchumu ku ringana malembe ya nhungu, hikuva a a ome swirho.
34 Petro a ku eka yena: “Eniya, Yesu Kreste wa ku hanyisa.+ Pfuka u songa sangu ra wena.”+ Hiloko a pfuka hi nkarhi wolowo.
35 Loko hinkwavo lava a va tshama eLida ni le Rivaleni ra Saroni va n’wi vona va ve valandzeri va Hosi.
36 A ku ri ni mudyondzisiwa un’wana eYopa la vuriwaka Thavitha, leri loko ri hundzuluxeriwa ri vulaka “Dorkasi.”* A a endla swilo swo tala leswinene naswona a a endlela vanhu tinyiko to tala.
37 Kambe enkarhini wolowo a khomiwa hi vuvabyi kutani a fa. Hiloko va n’wi hlambisa va ya n’wi lata ekamareni ra le henhla.
38 Leswi muti wa Lida a wu ri ekusuhi na Yopa, loko vadyondzisiwa va twa leswaku Petro u le mutini wolowo, va rhuma vavanuna vambirhi leswaku va ya n’wi kombela va ku: “Hi kombela u ta haleno hi ku hatlisa.”
39 Hiloko Petro a suka a yima a famba na vona. Loko a fika, va n’wi yisa ekamareni ra le henhla; kutani tinoni hinkwato ti ya eka yena ti ri karhi ti rila, ti n’wi komba swiambalo swo tala leswi Dorkasi a a hamba a ti rhungela swona loko a ha hanya.
40 Endzhaku ka sweswo Petro a va humesela ehandle+ hinkwavo, a khinsama a khongela. Kutani a languta ntsumbu a ku: “Thavitha, pfuka!” Thavitha a pfula matihlo kutani a vona Petro ivi a pfuka a tshama.+
41 Hiloko a n’wi khoma hi voko a n’wi yimisa kutani a vitana vakwetsimi ni tinoni a va nyika yena a ri karhi a hanya.+
42 Mhaka leyi yi dume emutini hinkwawo wa Yopa naswona vo tala va ve valandzeri va Hosi.+
43 Hiloko a tshama eYopa na Simoni+ mutlhuvutsi wa madzovo masiku yo hlayanyana.
Tinhlamuselo ta le hansi
^ Vona Xiengetelo A5.
^ Vito ra Xigriki leri nge Dorkasi ni ra Xiaramu leri nge Thavitha hinkwawo ma vula “Mhala.”
