Mitirho 25:1-27
25 Hikwalaho loko Festo+ a fika exifundzheni naswona a sungula ku fuma, u suke eKhezariya a ya eYerusalema endzhaku ka masiku manharhu.
2 Hiloko vaprista lavakulu ni vakulukumba va Vayuda va n’wi nyika rungula leri hehlaka Pawulo.+ Kutani va sungula ku kombela Festo
3 leswaku a rhumela Pawulo eYerusalema. Kambe a va bohe xikungu xo tumbelela Pawulo leswaku va ta n’wi dlaya endleleni.+
4 Hambiswiritano, Festo a va byela leswaku Pawulo u fanele a tshikiwa eKhezariya ni leswaku yena a a ta tlhelela kona ku nga ri khale.
5 A ku: “Varhangeri va n’wina a va fambe na mina, va ta kota ku ya hlamusela nandzu wa kona, loko ku ri ni xidyoho lexi wanuna loyi a xi endleke.”+
6 Kutani endzhaku ko tshama na vona masiku ya nhungu kumbe khume, a ya eKhezariya, hi siku leri landzelaka a fika a tshama exitulwini xa vuavanyisi a lerisa leswaku ku tisiwa Pawulo.
7 Loko Pawulo a fika, Vayuda lava a va huma eYerusalema va n’wi rhendzela va sungula ku n’wi hehla hi milandzu yo tala yo chavisa leyi a va ri hava vumbhoni bya yona.+
8 Kambe Pawulo a va hlamula a ku: “A ndzi dyohelanga Nawu wa Vayuda kumbe tempele kumbe Khezari.”+
9 Hi ku lava ku tsakisa Vayuda,+ Festo a hlamula Pawulo a ku: “Xana wa swi lava ku ya eYerusalema leswaku u ya avanyisiwa kona emahlweni ka mina mayelana ni swilo leswi?”
10 Kambe Pawulo a ku: “Ndzi yime emahlweni ka xitulu xa Khezari xa vuavanyisi, laha ndzi faneleke ku avanyisiwa kona. A ndzi va dyohelanga nchumu Vayuda, na wena se wa swi vona sweswo.
11 Loko hakunene ndzi dyohile naswona ndzi endle nchumu lowu faneriwaka hi rifu,+ a ndzi chavi ku fa; kambe loko ku nga ri na vumbhoni bya swilo leswi vavanuna lava va ndzi hehlaka ha swona, a ku na munhu loyi a nga ni mfanelo yo ndzi yisa eka vona leswaku a ta va tsakisa. Ndzi kombela ku avanyisiwa hi Khezari!”+
12 Endzhaku ka loko Festo a vulavule ni vatsundzuxi, a hlamula Pawulo a ku: “U kombele ku avanyisiwa hi Khezari; u ta ya eka Khezari.”
13 Endzhaku ka masikunyana, ku fike hosi Agripa na Bernike eKhezariya va endzela Festo leswaku va n’wi khensisa.
14 Leswi va nga heta masikunyana kwalaho, Festo u byele hosi nandzu wa Pawulo, a ku:
“Ku ni wanuna un’wana loyi Felikisi a n’wi siyeke ekhotsweni,
15 naswona loko ndzi ri eYerusalema, vaprista lavakulu ni vakulukumba va Vayuda va n’wi hehlile eka mina,+ va lava leswaku ndzi n’wi xupula.
16 Kambe ndzi va hlamule leswaku nawu wa Varhoma a wu pfumeli leswaku muhehliwa a xupuleriwa ku tsakisa van’wana a nga si hlangana ni lava va n’wi hehlaka leswaku a ta tihlamulela emahlweni ka vona.+
17 Hikwalaho loko va fika a ndza ha yimayimanga, kambe hi siku leri landzelaka ndzi tshame exitulwini xa vuavanyisi ndzi lerisa leswaku wanuna loyi a tisiwa emahlweni ka mina.
18 Loko vahehli va suka va yima, a va n’wi hehlanga ni hi xin’we xa swilo swo biha leswi a ndzi swi ehleketa ha yena.+
19 Va lo kanetana na yena ntsena hi vukhongeri bya vona+ na hi mhaka ya wanuna loyi a vuriwaka Yesu, loyi a a file kambe loyi Pawulo a a tshamela ku vula leswaku wa hanya.+
20 Leswi a ndzi nga swi tivi leswaku ndzi ta yi tamela njhani mhaka leyi ndzi vutise Pawulo loko a swi lava ku ya eYerusalema a ya avanyiseriwa kona mayelana ni timhaka leti.+
21 Kambe loko Pawulo a kombele ku tshikiwa ekhotsweni kukondza a avanyisiwa hi Muchaviseki,*+ ndzi lerise leswaku a tshikiwa ekhotsweni ku fikela loko ndzi n’wi rhumela eka Khezari.”
22 Hiloko Agripa a byela Festo a ku: “Ndzi nga tsakela ku twa wanuna loyi hi ndzexe.”+ Festo a ku: “Mundzuku, u ta n’wi twa.”
23 Hi siku leri landzelaka, Agripa na Bernike va ta va bombile hi swiambalo swa vuhosi bya vona va fika va nghena laha a ku ri ni vayingiseri va ri ni tindhuna ta nyimpi ni vavanuna va xiyimo xa le henhla emutini; hiloko Festo a lerisa leswaku ku tisiwa Pawulo.
24 Kutani Festo a ku: “Hosi Agripa na n’wina hinkwenu mi nga na hina laha, wanuna loyi, hi loyi Vayuda hinkwavo va ndzi kombeleke mayelana na yena eYerusalema ni kwala, va huwelela leswaku a nga ha faneriwi hi ku hanya.+
25 Kambe ndzi xiye leswaku a nga endlanga nchumu lexi faneriwaka hi rifu.+ Kutani loko wanuna loyi a ta va a endle xikombelo xo avanyisiwa hi Muchaviseki, ndzi endle xiboho xo n’wi yisa eka yena.
26 Kambe a ndzi tivi leswaku ndzi ta tsalela Hosi ya mina ndzi ku u dyohe yini. Hikwalaho ndzi n’wi tise emahlweni ka n’wina, ngopfungopfu emahlweni ka wena, Hosi Agripa, leswaku endzhaku ka loko a tengisiwile, ndzi kuma xo karhi xo xi tsala.
27 Hikuva swi vonaka swi nga twali eka mina ku rhumela mubohiwa kambe ndzi nga boxi leswi a hehliwaka hi swona.”
Tinhlamuselo ta le hansi
^ Hi Xigriki, “Lowa August.” Ku nga xithopo xa mufumi wa Rhoma.
