Julani

Lutani pa vo ve mukati

 CHIGAŴA 26

Charu Chija so Paradayisu!

Charu Chija so Paradayisu!

Kuziya mu muwusu waku Khristu, Yehova watowesa zina Laki, walongo kuti ngwakwenere kuwusa ndipuso wamaliska uheni wosi

BUKU lakumaliya la m’Bayibolu lo lidanika kuti Chivumbuzi, lipereka chilindizga ku mtundu wosi wa ŵanthu. Buku lakulembeka ndi wakutumika Yohane lenili, mwe viwona vakupambanapambana vo vikonkhoska vinthu vo vazamuchitika kunthazi, vo vititiwovya kuziŵa kufiskika kwa khumbu laku Yehova.

Mu chiwona chakwamba, Yesu yo wanguyusika wawonga ndi kuchenya mipingu yinyaki. Ndipu chiwona chinyaki chititilongo mpandu waku Chiuta wakuchanya, ko vakulengeka vauzimu vitimuthamika.

Po Chiuta walutirizga kulongo khumbu laki, Mwana wa Mbereri, Yesu Khristu walonde buku lo le ndi vakujaliya 7. Vakujaliya vinayi vati vajulika, akukwera pa kavalo akuyeruzgiyapu waka anguwoneke pa vakuchitika va pacharu. Wakwamba yo wakwera pa kavalo mutuŵa ndi Yesu ndipu amuvwalika chisoti nge Fumu. Ndipu pavuli paki patuza akukwera akavalo amitundu yakupambanapambana. Mu uchimi ivi vimiya nkhondu, nja ndi milili, vosi ivi vichititika m’mazuŵa ngakumaliya nga mugonezu wunu. Kujulika kwa chakujaliya cha nambala 7, kuchitisa kuti mbata yakuyeruzgiyapu waka ya nambala 7 yimbi, kulongo kupharazgika kwa vyeruzgu vaku Chiuta. Ivi vichitiska miliri 7 yakuyeruzgiyapu waka, pamwenga vilongo kukwiya kwaku Chiuta.

Ufumu waku Chiuta wo ukonkhoskeka nge mwana munthurumi yo wabalika waka, ukujalikiskika kuchanya. Nkhondu yati yachitika, Satana ndi angelu ŵaki aheni anguponyeka pa charu chapasi. Ndipu kunguvwika mazu ngakuti: “Owe, charu,” Diabolo we ndi kandundu kakulu pakuziŵa kuti nyengu yaki njimanavi.​—Chivumbuzi 12:12.

Yohane, wawona Yesu kuchanya yo wamiya mbereri ndipu we ndi ŵanthu akukwana 144,000 wo asankhika kutuliya ku mtundu wa ŵanthu. Ŵanthu yaŵa, “wakausanga “ nge mafumu pamoza ndi Yesu. Mwaviyo buku la Chivumbuzi lilongo kuti chigaŵa chachiŵi cha mbewu pamwenga mphapu che ndi ŵanthu akukwana 144,000.​—Chivumbuzi 14:1; 20:6.

Akuwusa a charu awunganiskikiya ku Hara–Magedone, “nkhondu yo ya zuŵa likuru laku Chiuta Wanthazizose.” Yiwu achita nkhondu ndi yo wakwera pa kavalo mutuŵa, Yesu yo walongozga gulu lankhondu lakuchanya. Ndipu akuwusa wosi a pacharu ichi abayika. Satana wamangika ndipu Yesu ndi ŵanthu 144,000, awusa pacharu chosi chapasi kwa “virimika chikwi.” Pakumaliya pa vyaka 1,000, Satana wazamubayika.​—Chivumbuzi 16:14; 20:4.

Kumbi Muwusu waku Khristu wa Vyaka 1,000 pamoza ndi wo wazamuwusa nawu, wazakuŵachitiyanji ŵanthu akuvwiya? Yohane wakulemba kuti: “[Yehova] waleskengeko sozi lose ku maso ghawo, ndi nyifwa kuti yikaŵangapo so cha, chingana nchitenje, chingana ndi nkhuta, chingana mburwirwi, kuti vikaŵangapo so cha. Chifukwa vyakudanga vyo vyarutapo.” (Chivumbuzi 21:4) Panyengu iyi, charu chazamuja paradayisu.

Mwaviyo, buku la Chivumbuzi limaliza uthenga wosi wa m’Bayibolu. Kuziya mu Ufumu waku Mesiya, zina laku Yehova lazamutoweseka ndipuso ufumu waki ndiwu pe wazamuwusa kwamuyaya!

​—Nkhani iyi yatuliya m’buku la Chivumbuzi.