Julani

Lutani pa vo ve mukati

 CHIGAŴA 24

Paulo Walembe Mipingu

Paulo Walembe Mipingu

Makalata ngaku Paulo ngachiska mpingu wa Chikhristu

MPINGU wakwamba wa Chikhristu wenga ndi nchitu yikulu ukongwa pakufiska khumbu laku Yehova. Kweni Akhristu a mu vyaka 100 vakwamba anguswera cha kuyukilika. Kumbi yiwu angulutirizga kusunga ukongorekwa wawu kwaku Chiuta panyengu yo atombozgekanga ndi ŵanthu akubwalu kwa mpingu ndipuso masuzgu ngo akumananga nangu mu mpingu ngo ngaŵazisiyanga masuzgu? Malemba nga Chigiriki nga Chikhristu nge ndi makalata 21 ngo nge ndi ulongozgi wakukhumbika ndipuso wakuchiska.

Makalata 14, kutuliya buku la Ŵaroma mpaka Ŵahebere ngakulembeka ndi wakutumika Paulo. Makalata ngenanga nge ndi mazina nga kweniko ngalutanga, kaya kwenga kwa munthu yumoza pamwenga ŵanthu a mu mpingu. Ŵanaŵaniyani fundu zinyaki zo ze m’makalata ngaku Paulo.

Ngachiskanga Ŵanthu Kuti Aje ndi Mijalidu Yamampha. Wosi wo achita uyaya, ureŵi ndi maubudi nganyaki ngakulungakulu “ŵakaharanga ufumu waku Chiuta cha.” (Ŵagalatia 5:​19-21; 1 Ŵakorinte 6:​9-11) Wo asopa Yehova, atenere kwanjana mwambula kuphwere ko munthu watuliya. (Ŵaroma 2:11; Ŵaefeso 4:​1-6) Atenere kujipereka mwakukondwa pakuwovya Akhristu anyawu wo akhumbika chovyu. (2 Ŵakorinte 9:7) Paulo wangukamba kuti, “rombani kwambula kulekezga.” Mbuneneska, Akhristu achiskika kuti akambiyengi Yehova masuzgu ngawu kuporote mu rombu. (1 Ŵatesalonika 5:17; 2 Ŵatesalonika 3:1; Ŵafilipi 4:​6, 7) Kuti marombu ngavwiki kwaku Chiuta, ngatenere kuperekeka mwa chivwanu.​—Ŵahebere 11:6.

Kumbi nchinthu wuli cho chingawovya mabanja kuti ngaluti panthazi? Anthurumi atenere kwanja awolu ŵawu nge liŵavu lakuŵenechu. Anthukazi atenere kupereka ulemu kwa arumu ŵawu. Ŵana atenere kuvwiya apapi ŵawu chifukwa kuchita viyo kukondwesa Chiuta. Apapi atenere kulongozga ndi kusambiza ŵana ŵawu mwachanju ndipuso mwakugwiriskiya nchitu fundu za m’ Mazu ngaku Chiuta.​—Ŵaefesu 5:22–6:4; Ŵakolose 3:​18-21.

Akhristu anguwovyeka kuziŵa khumbu laku Chiuta. Vigaŵa vinandi va mu Chilangulu chaku Mosese vinguvikiliya ndi kulongozga Ayisraele mpaka pa nyengu yo Khristu wanguziya. (Ŵagalatia 3:24) Kweni Akhristu akhumbika cha kusunga Chilangulu cho ndi chilatu chakuti asopi Chiuta. Pakulembe Ahebere, wo ŵenga Akhristu akutuliya ku mabanja nga Chiyuda, Paulo wanguvwikisa umampha vo Chilangulu chang’anamuwanga ndipuso mo khumbu laku Chiuta lifiskikiya kuziya mwaku Khristu. Paulo wangukonkhoska kuti vigaŵa vakupambanapambana vo venga m’Chilangulu venga ndi uchimi wakukhumbika ukongwa.  Mwakuyeruzgiyapu, kupereka sembi zanyama kwamiyanga sembi ya nyifwa yaku Yesu yo yatingi yichitisengi kuti maubudi ngagowokereki kwamuyaya. (Ŵahebere 10:​1-4) Chiuta wakumaliska phanganu la Chilangulu chifukwa cha nyifwa yaku Yesu ndipu Chilangulu chenga chakukhumbika so cha.​—Ŵakolose 2:​13-17; Ŵahebere 8:13.

Ulongozi wa mo mpingu ungayende umampha. Anthurumi wo akhumba kuja ndi maudindu mu mpingu, atenere kuja ndi mijalidu yamampha ndipuso atenere kufiska vo vikulembeka m’Malemba. (1 Timote 3:​1-10, 12, 13; Tito 1:​5-9) Wo asopa Yehova Chiuta, nyengu zosi atenere kuwungana ndi Akhristu anyawu kuti achiskanengi. (Ŵahebere 10:​24, 25) Kusopa kwidu kutenere kuja kwakuchiska ndipuso kwakusambiza.​—1 Ŵakorinte 14:​26, 31.

Panyengu yo wakutumika Paulo walembanga kalata yaki yachiŵi kwaku Timote, iyu ndipu wawere ku Roma, panyengu iyi ndipu we mu jeri kulindizga cheruzgu. Ŵanthu amanavi waka achiganga ndiwu alutanga kuchimuwona Paulo, kweni umoyu wawu wenga pangozi. Paulo wanguziŵa kuti we pafupi kufwa, ndipu wangulemba kuti, ‘Ndarwa nkhondu yamampha, ndafiska chipharizganu cho, Ndasunga chivwanu.’ (2 Timote 4:7) Pati pajumpha waka nyengu yimanavi, Paulo watenere kuti wangubayika chifukwa cha chigomezgu chaki. Kweni makalata nga wakutumika Paulo, ngatovya wo asopa Chiuta mwauneneska mazuŵa nganu.

—Nkhani iyi yatuliya pa Ŵaroma; 1 ndi 2 Ŵakorinte; Ŵagalatia; Ŵaefeso; Ŵafilipi; Ŵakolose; 1 ndi 2 Ŵatesalonika; 1 ndi 2 Timote; Titu; Filemone; Ŵahebere.