Julani

Lutani pa vo ve mukati

 CHIGAŴA 23

Uthenga Wamampha Upharazgika

Uthenga Wamampha Upharazgika

Paulo watenda panyanja kweniso pamtunda pa ulendu waki wakuchipharazga

WATI wasintha jalidu laki, Paulo wangujipereka pakupharazga uthenga wamampha wa Ufumu waku Chiuta ndipu chifukwa chakuti iyu wenga wakususka, vinguchitisa kuti nayu wasuskiki ukongwa. Kweni wakutumika mwenuyu wanguleka cha kupharazga. Iyu wangwenda maulendu nganandi ndipu walutanga kutali kuchipharazga uthenga wamampha wakukwaskana ndi Ufumu wo wazamufiska khumbu lapakwamba laku Chiuta ku mtundu wa ŵanthu.

Paulendu waki wakwamba wakuchipharazga ku Lustra, Paulo wanguchizga munthu yo wenga wakupunduka chiwiyi chaki. Ŵanthu angwamba kudanirizga kuti Paulo ndi Barnaba ŵenga a chiuta. Yiwu anguŵakanizga ŵanthu kuti aleki kuŵapaska sembi. Ŵanthu wo akhumbanga kupereka sembi anguchichizgika ndi arwani aku Paulo, ndipu pavuli paki yiwu angwamba kumuponya mya mpaka anguŵanaŵana kuti wafwa. Kweni Paulo wangupona ndipu wanguwere so ku msumba wo kuchichiska akusambira.

Akhristu anyaki Achiyuda, akambanga kuti ŵanthu wo ŵenga Ayuda cha nawuso akhumbikanga kuti alondongi marangu nganyaki nga mu Chilangulu chaku Mosese. Paulo wanguchifumba nkhani iyi kwa akutumika ndipuso ŵaraŵara ku Yerusalemu. Ŵati asanda Malemba mwakuphwere ndipuso mwakulongozgeka ndi mzimu utuŵa waku Chiuta, yiwu angulembe mipingu ndi kuyikambiya kuti yileki kusopa angoza, kurya ndopa, nyama zambula kuchinja ndipuso ureŵi. Marangu yanga ngenga ‘vinthu vakukhumbika,’ ndipu kusunga marangu yanga kwakhumbikanga kuti munthu walondongi Chilangulu chaku Mosese pe cha.​—Machitidu 15:​28, 29.

Paulendu waki wachiŵi wakuchipharazga, Paulo wanguluta ku Berea, ko mazuŵa nganu kudanika kuti Girisi. Ayuda wo ajanga m’charu cho angulonde mazu mwakukondwa, akambiskananga Malemba zuŵa ndi zuŵa kuti asimikizgiyi vo iyu wasambizanga. Chifukwa chakuti angwamba so kumususka, Paulo wanguluta ku Athene. Paulo wangukamba nkhani yakuko mtima pamasu pa ŵanthu akusambira ukongwa a ku Athene, yo nchakuwoniyapu chamampha pakugwiriskiya nchitu lusu, zeru ndipuso kukamba vinthu mwakuko mtima.

Pavuli pa ulendu waki wachitatu wakuchipharazga, Paulo wanguluta ku Yerusalemu. Wati waluta ku nyumba yakusopiyaku, Ayuda anyaki angwambisa chivulupi ndipu akhumbanga kumubaya. Asilikali Achiroma angusereliyapu ndipu angumufumba mafumbu. Nge zika ya Chiroma, Paulo wangujivikiliya pamasu paku Kazembe wa Chiroma Feliko, ndipu Ayuda angutondeka kupereka ukaboni wa milandu yo amumbanga. Pakukhumba kujivikiliya kwaku kazembi munyaki Wachiroma Festo, kuti waleki kumupereka kwa Ayuda, Paulo wangukamba kuti: ‘Ndipempha kuti nkhawoneke kwaku Kaisare.’ Ndipu Festo wangumuka kuti: “Kwaku Kaisare ukalutanga.”​—Machitidu 25:​11, 12.

Pavuli paki, Paulo angumukweza ngaraŵa kuluta nayu ku Italia kuti wakayeruzgiki. Ngaraŵa yo Paulo wangukwera yingusweka ndipu wangusuzgika ndi mphepu pa chirwa cha Malta. Wati wafika ku Roma, wanguja kwa vyaka viŵi m’nyumba yakulipira. Chinanga kuti msilikali wamuleleziyanga, kweni wakutumika waphamphu mwenuyu wangulutirizga kupharazga za Ufumu waku Chiuta ku ŵanthu wosi wo azanga kuzimuwona.

—Nkhani iyi yatuliya pa Machitidu 11:22–28:31.