WATI wapharazga ndi kusambiza kwa vyaka vitatu ndi myezi 6, Yesu wanguziŵa kuti nyengu yaki yakujaliya pacharu chapasi ye pafupi kumala. Alongozgi a visopa a Chiyuda apangananga kuti amubayi, kweni awopanga ŵanthu wo amugomezganga kuti ndi mchimi. Pa nyengu iyi, Satana wangunyenga yumoza wa akusambira ŵaki 12, Yudasi Mkariote kuti wamupereki. Alongozgi a visopa angumupaska Yudasi ndalama za siliva 30, kuti wamupereki Yesu.

Pa usiku waki wakumaliya, Yesu wanguwunganiska akusambira kuti achiti Phaska. Wati wamutuzgapu Yudasi, Yesu wangwambisa chakuchitika chapade, Chakurya Chamazulu cha Ambuya. Iyu wanguto chiŵandi ndipu wanguromba ndi kupereka chiŵandi cho kwa akusambira ŵaki 11. Iyu wanguti: ‘Ryani, chifukwa chiŵandi ichi, chimiya liŵavu langu lo liperekekengi chifukwa chaku imwi, muchitengi ichi pakundikumbuka ini.’ Wanguchita so viyo ndi kapu ya vinyu ndipu wanguti: ‘Kapu iyi yimiya phanganu lifya chifukwa cha ndopa zangu.’​—Luka 22:​19, 20.

Yesu wenga ndi vinthu vinandi vakuti wakambiyi akutumika ŵaki usiku weniwo. Iyu wanguŵapaska dangu lifya lakuti ayanjanengi. Iyu wangukamba kuti: ‘Mwaku ichi ŵanthu wosi ŵaziŵengi kuti mwe akusambira ŵangu asani mwe ndi chanju yumoza ndi munyaki.’ (Yohane 13:​34, 35) Iyu wanguŵachiska kuti mitima yawu yileki kusuzgika ndi vinthu vakofya vo vatingi vichitikengi. Yesu wangurombe akusambira ŵaki mwakutuliya pasi pa mtima. Ŵati ŵamba sumu anguluta ku munda wa Gesemane.

Panyengu yo Yesu wenga mu munda wa Gesemane, iyu wangugwada ndi kuromba kwaku Chiuta kutuliya pasi pa mtima. Pambula kuswera gulu la asilikali, asembi ndi ŵanthu anyaki angufika kuti azimuko. Yudasi nayu wanguza ndi kumupereka Yesu mwa kumufyofyontha. Pa nyengu yo asilikali angumuko Yesu, akutumika ŵaki anguthaŵa.

We mu khoti likulu la Ayuda, Yesu wangujiziŵikiska kuti ndi Mwana waku Chiuta. Khoti lingusaniya kuti we ndi mlandu wakuleka kutumbika Chiuta ndipu wakhumbikanga kubayika. Pavuli paki, Yesu wangutoleke kwa Mura Wachiroma Pilato. Chinanga kuti wangumusaniya ndi mlandu cha, iyu wangumupereka so Yesu ku wumba wo wakhumbanga kumubaya.

Yesu anguluta nayu ku Golgota ko asilikali Achiroma anguchimukhoma pa chimiti. Mwakuziziswa, msana ungusambuka usiku. Pavuli paki zuŵa lenilo pe ndi msana, Yesu wangufwa ndipu kunguchitika chidiririsi chikulu. Liŵavu laki linguŵikika mu dindi lo lingusemeka ku mwa. Kwati kwacha asembi anguchijalapu pa muwunda ndi kuŵikapu alonda pa khomu la muwunda. Kumbi Yesu wangulutirizga kuja mu muwunda? Awa. Chakuziziswa chikulu chenga pafupi kuchitika.

​—Nkhani iyi yatuliya pa Mateyu chaputala 26 ndi 27; Marko chaputala 14 ndi 15; Luka chaputala 22 ndi 23; Yohane chaputala 12 mpaka 19.