Julani

Lutani pa vo ve mukati

 CHIGAŴA 19

Uchimi Waku Yesu Wakukwasana ndi Vinthu va Mthazi Ukwasa Charu Chosi Chapasi

Uchimi Waku Yesu Wakukwasana ndi Vinthu va Mthazi Ukwasa Charu Chosi Chapasi

Yesu wakonkhoska vinthu vakunthazi vo vazamulongo kujapu kwa ufumu waki ndipuso umaliru wa mgonezu wunu

ŴE pa Phiri la Maolivete achiwona kutowa kwa Yerusalemu ndi kasopi waki, akutumika aku Yesu anayi angumufumba pakuyija vinthu vinyaki vo wangukambapu kali. Yapa ndipu Yesu wakamba kali kuti nyumba yakusopiyamu ya ku Yerusalemu yazamubwanganduka. Ndipuso pakwamba wanguŵakambiyapu kali za “kamaridu ka mugonezi wo.” (Mateyu 13:​40, 49) Akutumika angumufumba kuti: ‘Kumbi chisimikizgu cha kuza kwinu ndipuso cha umaliru wa mgonezu wunu nchinthu wuli?’​—Mateyu 24:3.

Pakumuka, Yesu wanguŵakambiya za vinthu vo vatingi vizichitikengi, Yerusalemu wechendabwangaduki. Kweni vo wangukamba Yesu vasazgangapu vinthu vo vatingi vizichitikengi kunthazi. Pavuli paki uchimi waki wazamufiskika ukongwa kunthazi pa charu chosi chapasi. Yesu wangukamba uchimi wo wasazgangapu vakuchitika va charu ndi mijalidu ya ŵanthu kuti ndivu vazamupanga chisimikizgu. Chisimikizgu cho chatingi chilongongi ŵanthu apacharu chapasi kuti kuza kwaku Yesu nge fumu kwayambaku. Ndipuso chatingi chilongongi kuti Yehova Chiuta waŵika Yesu kuja Fumu ya Umesiya yo yingulayizgika kwa nyengu yitali. Chisimikizgu cho chatingi chilongongi kuti Ufumu wenga pafupi kutuzgapu uheni ndi kuzisa chimangu ku mtundu wa ŵanthu. Mwaviyo, vinthu vo Yesu wangukambiya limu vatingi vilongongi kumala kwa mgonezu wakali, pa vakuchitika va visopa, ndali ndi vakuchitika va ŵanthu vo vichitika mazuŵa nganu ndipuso kwamba kwa mgonezu wufya.

Pakukonkhoska vo vazamuchitika pa charu chapasi pa nyengu ya kuza kwaki nge Fumu ya kuchanya, Yesu wangukamba kuti kwazamuja nkhondu za vyaru, kupereŵere kwa vakurya, vidiririsi ndipuso matenda. Kuleka kutumbika marangu kwazamuluta panthazi. Akusambira auneneska aku Yesu azamupharazga uthenga wamampha wa Ufumu waku Chiuta pa charu chosi chapasi. Vinthu vosi ivi vazamufika pakusuzga ukongwa pa “chisuzgu chikulu” cho chechendachitikepu kwamba kali.​—Mateyu 24:21.

Kumbi akulondo aku Yesu azamuziŵa wuli kuti chisuzgu chikulu chepafupi? Yesu wangukamba kuti: ‘Sambirani ku chimiti cha mkuyu.’ (Mateyu 24:32) Mo mani nga mkuyu ngawoneke ngalongo kuti nyengu ya chihanya ye pafupi. Mwakuyana waka, kuchitika kwa vinthu vosi vo Yesu wangukamba kulongo kuti umaliru we pafupi. Palivi munthu weyosi yo waziŵa zuŵa ndi nyengu chayiyu yo chisuzgu chikulu chiyambiyengi, kweni Ada pe ŵija. Mwaviyo, Yesu wanguchiska akusambira ŵaki kuti: “Cheŵani, khazgani ndi kuromba chifukwa kuti muziŵa cha kufika kwa nyengu yo.”​—Marko 13:33.

—Nkhani iyi yatuliya pa Mateyu chaputala 24 ndi 25; Marko chaputala 13; Luka chaputala 21.

^ ndimi 14 Kuti muvwi vinandi vakukwasana ndi uchimi waku Yesu, wonani peji 86- 95 mu buku la Kumbi Bayibolo Lisambizanji Weniukongwa? lakupharazgika ndi Akaboni aku Yehova.