Julani

Lutani pa vo ve mukati

 CHIGAŴA 10

Solomoni Wawusa Mwazeru

Solomoni Wawusa Mwazeru

Yehova wapaska Fumu Solomoni mtima wa zeru. Pa nyengu yo Solomoni wawusanga, Ayisraele akondwanga ndi chimangu ndipuso asoŵanga kanthu cha

KUMBI umoyu watingi ujengi wuli asani mtundu wosi wa Yisraele ndi fumu yawu anguzomerezga Yehova kuja Wakuwusa ndipuso kuvwiya marangu Ngaki? Kwamuka kunguwoneka m’nyengu ya muwusu waku Solomoni wa vyaka 40.

Davidi wechendafwi wangusankha mwana waki Solomoni kuti ndiyu wahari ufumu waki. Chiuta wangufumba Solomoni m’malotu kuti wakambi vo wakhumba. Solomoni wangupempha zeru ndipuso kuziŵa mo wangayeruzgiya ŵanthu umampha ndipuso mwazeru. Yehova wangukondweseka nayu ndipu wangumupaska Solomoni zeru ndi mtima wakuziŵa vinthu. Yehova wangumulayizga so kuti wamupaskengi usambasi, unkhankhu ndipuso umoyu utali asani walutirizgengi kuvwiya.

Solomoni wanguziŵika ukongwa chifukwa cha zeru zaki pakweruzga. Pa nyengu inyaki, anthukazi ŵaŵi alimbananga mwana munthurumi, weyosi wakambanga kuti ndi mwana waki. Solomoni, wangulangula kuti acheketi mwana yo pakati kuti weyosi amupaski rwandi limoza. Munthukazi wakwamba wanguzomerezga kweni yo wenga mweneku wa mwana wanguchondere kuti mwana yo angamubayanga cha, kweni amupaski munthukazi yo walimbananga nayu. Sonu Solomoni wanguziŵa kuti munthukazi yo wangulongo lisungu ndiyu wenga mweneku wa mwana ndipu wangulangula kuti amupaski mwana waki. Pati pajumpha kanyengu kamanavi, Ayisraele wosi anguvwa za cheruzgu cho ndipu ŵanthu anguziŵa kuti zeru zaku Chiuta zenga ndi Solomoni.

Chinthu chikulu ukongwa cho Solomoni wangufiska chenga kuzenga nyumba yakusopiyamu yaku Yehova, yo yenga yakutowa ukongwa ku Yerusalemu ndipu yatingi yijengi malu ngapakati ngakusopiyaku mu Yisraele. Panyengu yo Solomoni wapaturiyanga nyumba yakusopiyamu, wanguromba kuti: “Ehe, kuchanya weniukongwa kuti kuziŵa kumuyanani imwe cha, na uli ukongwako ndi umana wa nyumba iyi yo ndazenga!”​—1 Ŵakaronga 8:27.

Mbiri yaku Solomoni yinguvwika mu vyaru vosi mpaka ku Sheba, m’charu cha Arabia. Fumukazi yaku Sheba, yinguza kuziŵona unkhankhu ndi usambasi waku Solomoni ndipuso kuziwona zeru zo wenga nazu. Fumukazi yingukondweseka ndi zeru zaku Solomoni ndi usambasi wo Ayisraele ŵenga nawu. Ndipu fumukazi yo, yinguthamika Yehova chifukwa chakuŵika fumu ya zeru Solomoni pachitengu. Mbuneneska kuti chifukwa cha vitumbiku vaku Yehova, muwusu waku Solomoni wenga wa usambasi ndipuso wenga wamampha mu mbiri ya Yisraele wakali.

Venga vachitima kuti Solomoni wangutondeka kuchita vinthu mwakukoliyana ndi zeru zaku Yehova. Chifukwa chakutondeka kuvwiya dangu laku Chiuta, Solomoni wanguto anthukazi anandi kusazgapu so anthukazi anyaki wo asopanga achiuta achilendu. Kamana ndi kamana, anthukazi wo angunyenga mtima waku Solomoni kuti waleki kusopa Yehova ndi kwamba kusopa angoza. Yehova wangukambiya Solomoni kuti wagaŵengi Ufumu waki. Chiuta wangukamba kuti wasiliyengi banja laku Solomoni chigaŵa chimanavi cha ufumu wo chifukwa cha vo wangulayizga kwaku Davidi, wo ŵenga awiski. Chinanga kuti Solomoni wanguleke limu kuteŵete Yehova, Yehova wanguja mbwenu wakugomezgeka ku phanganu la Ufumu, lo wanguchita ndi Davidi.

​—Nkhani iyi yatuliya pa 1 Ŵakaronga chaputala 1 mpaka 11; 2 Mikoka chaputala 1 mpaka 9; Marangu 17:17.