Julani

Lutani pa vo ve mukati

 CHIGAŴA 1

Mulengi Wapaska Ŵanthu Paradayisu

Mulengi Wapaska Ŵanthu Paradayisu

Chiuta walenga kuchanya ndi vamoyu pacharu chapasi, iyu walenga munthurumi ndi munthukazi akufikapu ndipu watiŵaŵika mu munda wakutowa ndi kuŵapaska marangu ngakuti alondongi.

‘PAKUDANKHA Chiuta wangulenga kuchanya ndi charu chapasi.’ (Chiyambo 1:1) Mazu yanga ngaziŵika ukongwa ndipu ngakulembeka M’mabayibolu nganandi. Mazu ngakwamba ngenanga, ngatitilongo kuti Bayibolu likamba za Munthu mweniyo wazumbulika ukongwa m’Malemba ngosi Ngakupaturika, Chiuta wanthazi zosi, Yehova. Vesi lakwamba la m’Bayibolu likamba kuti Chiuta ndi Mulengi wakuchanya ndipuso charu cho tijamu. Mavesi nganyaki ngakulondopu, ngakonkhoska kuti Chiuta wakulenga charu kwa nyengu yitali kweni panyengu zakupambanapambana kuti isi tijemu ndipuso wakulenga vinthu vakutowa vo ve m’charu.

Chinthu chakuzirwa ukongwa cho Chiuta wangupanga pacharu chapasi wenga munthu. Munthu mwenuyu wangumulenga muchikozgu chaki ndipu watingi walongongi mijalidu yaku Yehova nge chanju ndipuso zeru. Chiuta wangulenga munthu kutuliya ku fuvu la pacharu chapasi. Iyu wangumudana kuti Adamu ndipu wangumuŵika mu paradayisu, munda wa Edene. Chiuta wangupanda vimiti vakutowa va vipasu, mu munda wa Edene.

Chiuta wanguwona kuti munthu yo wangulenga wakhumbikanga kuja ndi munyaki. Iyu wangugwiriskiya nchitu mbaŵara yimoza yaku Adamu ndi kupangiya munthukazi ndipu wangumupereka kwaku Adamu kuti waje muwolu waki, pavuli paki wangumudana kuti Eva. Chifukwa cha likondwa Adamu wangukamba mazu ngakuti: “Uyu sono nchiwanga cha viwanga vyangu ndi nyama ya nyama yangu.” Pavuli paki Chiuta wangukamba kuti: ‘Chifukwa chenichi munthurumi walekengi awiski ndi anyina ndipu wajibatikengi ku muwolu waki ndipu aŵengi liŵavu limoza.’​—Chiyambo 2:​22-24; 3:20.

Chiuta wangupaska Adamu ndi Eva marangu ngaŵi. Chakwamba, wanguŵakambiya kuti alimi ndi kuphwere charu chapasi cho chenga muzi wawu ndipu pakumaliya abali ŵana ndi kuzaza charu chosi. Chachiŵi, wanguŵakambiya kuti aryengi vipasu vosi va m’munda wo kweni vipasu va m’chimiti chimoza ‘chakuziŵisa umampha ndi uheni’ angaryanga cha. (Chiyambo 2:17) Asani aleka kuvwiya afwengi. Ndi marangu ngenanga, Chiuta wangupaska munthurumi ndi munthukazi mwaŵi wakulongo kuti azomerezga kuti iyu ndiyu Watiŵawusa. Asani anguvwiya atingi alongongi so chanju ndi kuwonga. Yiwu ŵenga ndi mwaŵi wosi wakuzomerezge muwusu waki wa chanju. Panyengu iyi ŵanthu yaŵa ŵengavi ubudi wewosi. Bayibolu lititikambiya kuti: “Ndipo Chiuta wanguwona chose cho wanguchita, ndipo chenga chamampha ukongwa.”​—Chiyambo 1:31.

—Nkhani iyi yatuliya pa Chiyambo chaputala 1 ndi 2.