Julani

Lutani pa vo ve mukati

 CHIGAŴA 4

Chiuta Wachita Phanganu ndi Abrahamu

Chiuta Wachita Phanganu ndi Abrahamu

Abrahamu wavwiya Chiuta mwa chivwanu ndipu Yehova walayizga kuti wamutumbikengi ndi kuyandanisa mphapu yaki.

PANGUJUMPHA vyaka 350 kutuliya po Zandi wa m’nyengu yaku Nowa wanguchitikiya. Abrahamu, wajanga mu msumba wakukhupuka wa Uru wo mazuŵa nganu udanika kuti Iraq. Iyu wenga munthu wachigomezgu chakukho kweni chigomezgu chaki chinguyeseka.

Yehova wangukambiya Abrahamu kuti watuwemu m’charu cho wanguwiya ndi kuluta ku charu chachilendu cha Kanani. Abrahamu wanguvwiya mwambula kudinginyika. Iyu wanguluta limoza ndi banja laki kusazgapu muwolu waki Sara ndi Lote mwana wa muku waki ndipuso anchitu ŵaki. Ŵati ayenda ulendu utali, yiwu anguchija mu mahema ku Kanani. Mu phanganu laki lo wangupangana ndi Abrahamu, Yehova wangulayizga kuti wapangengi mtundu ukuru kutuliya mwaku Abrahamu ndipu mabanja ngosi nga pacharu chapasi, ngazamutumbikika kuziya mwaku iyu ndipuso kuti ŵana ŵaki azamuja m’charu cha Kanani.

Abrahamu ndi Lote angukhupuka ndipu ŵenga ndi mbereri ndipuso ng’ombi zinandi. Abrahamu wangukambiya Lote kuti wasankhi chigaŵa cho wakhumbanga. Lote wangusankha chigaŵa cha nyata cha Msinji wa Yordane ndipu wanguja mu msumba wa Sodomu. Ŵanthu wo ajanga mu msumba wa Sodomu ŵenga ndi mijalidu yiheni, yiwu amunangiyanga ukongwa Yehova.

Pavuli paki, Yehova Chiuta, wangumusimikiziya Abrahamu kuti ŵana ŵaki ajengi anandi nge nyenyezi zakuchanya. Abrahamu wanguligomezga layizgu lo. Kweni muwolu waki wakwanjiwa Sara, wengavi mwana. Panyengu yo Abrahamu wenga ndi vyaka 99 ndipu Sara we pafupi kukwanisa vyaka 90, Chiuta wangukambiya Abrahamu kuti aŵengi ndi mwana munthurumi. Mazu ngo Chiuta wangukamba ngenga ngauneneska chifukwa Sara wangubala mwana, Yisaki. Abrahamu watingi wajengi so ndi ŵana anyaki kuziya mwaku Yisaki, kweniso Mtaski yo wangulayizgika mu Edene watingi waziyengi mwaku iyu.

Panyengu yo Lote ndi banja laki ajanga mu Sodomu, munthu murunji Lote, wangutoliyaku cha mijalidu yiheni ya ŵanthu wo ajanga mu msumba wo. Yehova wati wasimikiza kuti wazisengi cheruzgu mu msumba wa Sodomu, wangutuma dankha angelu kuti akatcheŵeski Lote za cheruzgu cho chatingi chizengi. Angelu wo, anguchiska Lote ndi banja laki kuti athaŵi mu Sodomu ndipuso kuti angalereskanga kuvuli cha. Pavuli paki, Chiuta wanguchitisa motu kuti unyekesi Sodomu ndipuso msumba uheni wo wenga pafupi wa Gomora, ndikubaya ŵanthu wosi wo ŵenga mu msumba wo. Lote ndi ŵana ŵaki anthukazi ŵaŵi anguthaŵa. Kweni muwolu waku Lote wanguma ndi kulereska kuvuli, panyaki iyu wakumbukanga vinthu vo wangusiya. Chifukwa chakuleka kuvwiya, iyu wangufwa.

—Nkhani iyi yatuliya pa Chiyambo 11:10–19:38.