Julani

Lutani pa vo ve mukati

 CHIGAŴA 11

Sumu Zakuko Mtima, Zakupembuzga Ndipuso Kusambiza

Sumu Zakuko Mtima, Zakupembuzga Ndipuso Kusambiza

Davidi pamoza ndi ŵanthu anyaki alemba sumu kuti azigwiriskiyengi nchitu pakusopa. Buku la Sumu le ndi sumu za mazu zakukwana 150

BUKU likulu m’Bayibolu likupangika ndi sumu zakupatulika. Kuti amalizi kulemba Buku losi la sumu zakupaturika zenizi, anguto vyaka pafufupi 1,000. Buku la m’Bayibolu la Sumu, le ndi sumu zinyaki zakusambiza ndipuso zakuchitisa kuti munthu waje ndi chivwanu ndipu palivi munthu yo wakulembapu sumu ngati zenizi. M’buku lenili mukulembeka vinthu vo vingachitikiya munthu pa umoyu waki nge likondwa, kutumbika, kuwonga ndipuso chitima ndi kulapa. Nchachiziŵikiyevi kuti Davidi wenga ndi chigomezgu ndipuso ubwezi wakukho ndi Chiuta. Ŵanaŵaniyani mitu ya sumu zo Davidi wakulemba mu sumu zaki.

Yehova ndiyu wakwenere Kuwusa, kumusopa ndipuso kumuthamika. Pa lemba la Sumu 83:​18, pakamba kuti [“Imwi yo zina linu ndimwi Yehova, ndimwi pe mwija mwe Wapachanya Limu pacharu chosi chapasi.” NW ] Sumu zinandi, zithamika Yehova chifukwa cha nchitu zaki zo ze m’chilengedu nge nyenyezi zakuchanya, vinthu vamoyu vo ve pacharu chapasi ndipuso mo liŵavu la munthu likupangikiya. (Sumu 8; 19; 139; 148) Ŵanthu anyaki athamika Yehova nge Chiuta yo wachita nchitu zakupozomoska ndipuso yo wavikiliya wo atimugomezga. (Sumu 18; 97; 138) Ndipu anyaki atimuthamika kuti ndi Chiuta wa urunji yo wazisa chovyu ku ŵanthu akusuzgika ndipuso walanga ŵanthu aheni.​—Sumu 11; 68; 146.

Yehova wapereka chovyu ndipuso wapembuzga wo atimuyanja. Panyaki sumu nambala 23 ndiyu yakuziŵika ukongwa yeniyo Davidi wangukambamu zaku Yehova kuti wenge Mliska wachanju yo walongozga, wavikiliya ndipuso waphwere mbereri zaki. Lemba la Sumu 65:​2, likumbuska wosi wo asopa Chiuta kuti Yehova ‘wamuka marombu.’ Ŵanthu anandi wo achitapu ubudi ukuru, apembuzgika ukongwa ndi lemba la Sumu 39 ndi 51, mo Davidi wakukambamu za kulapa kwaki kwakutuliya pasi pa mtima chifukwa cha ubudi ukulu wo wanguchita ndipuso wakulongo chigomezgu chaki mwaku Yehova yo wagowoke. Lemba la Sumu 55:​22, lititichiska kuti tigomezgengi Yehova ndipu timukambiyengi masuzgu ngidu ngosi.

Yehova wazamusintha charu kuziya mu Ufumu waku Mesiya. Vigaŵa vinandi vo ve m’buku la Sumu vikamba zaku Mesiya, Fumu yakulayizgika. Sumu nambala 2, yikambiya limu kuti Fumu yeniyi yazamubaya mitundu yosi yiheni yo yitiyisuska. Ndipu Sumu 72 yilongo kuti Fumu yeniyi yazamumalisa nja, vakuchitika vambula urunji ndipuso kukandirizgika. Lemba la Sumu 46:9 likamba kuti kuziya mu Ufumu waku Mesiya, Chiuta wazamumalisa nkhondu ndi kunanga vidya vosi va nkhondu. Pa Sumu nambala 37, tiŵerenga kuti uheni wosi wazamumala ndipu ŵanthu arunji azamuja pacharu chapasi kwamuyaya ndipu azamukondwa ndi chimangu ndipuso kukoliyanaku kwa pacharu chosi.

—Nkhani iyi yatuliya m’buku la Sumu.