Fetela kwa tshedimosetsong

Fetela go diteng

 SETLHOGO SA KA FA NTLE | O KA ATAMALANA LE MODIMO

A o Dira se Modimo a se Batlang?

A o Dira se Modimo a se Batlang?

“Fa o tlhoka sengwe o mpolelele, ke tla go direla sone.” O ka se bolelele motho yo o sa mo itseng kgotsa yo o sa mo tlwaelang mafoko ano. Mme o ka se nne le bothata jwa go a bolelela tsala e o e ratang. Ka tlholego fela, ditsala tse di atamalaneng di rata go direlana dilo.

Baebele e bontsha gore ka metlha Jehofa o dira se a itseng gore se tla itumedisa baobamedi ba gagwe. Ka sekai, Kgosi Dafide, yo o neng a na le kamano e e molemo le Modimo o ne a re: “O dirile dilo di le dintsi, Wena Jehofa Modimo wa me, le eleng ditiro tsa gago tse di gakgamatsang le dikakanyo tsa gago mo go rona. . . . Di dintsi go gaisa ka mo ke ka anelang ka teng.” (Pesalema 40:5) Mo godimo ga moo, Jehofa o direla le batho ba ba iseng ba mo itse dilo tse di molemo, a ba kgotsofatsa ‘ka dijo e bile a tlatsa dipelo tsa bone ka boitumelo jo bogolo.’—Ditiro 14:17.

Re itumelela go thusa batho ba re ba ratang le ba re ba tlotlang

E re ka Jehofa a itumelela go direla batho dilo tse di tla ba itumedisang, go a utlwala go lebelela gore batho ba ba batlang go nna ditsala tsa Modimo ba dire se se tla ‘ipedisang pelo’ ya gagwe. (Diane 27:11) Mme o ka dira eng gore o ipedise Modimo? Baebele e araba jaana: “Lo se ka lwa lebala go dira molemo le go abalana dilo le ba bangwe, gonne Modimo o itumedisiwa thata ke ditlhabelo tse di ntseng jalo.” (Bahebera 13:16) A seo se raya gore go dira molemo le go abelana dilo le ba bangwe ke gone fela go tlhokegang gore o itumedise Jehofa?

Baebele ya re: “Kwantle ga tumelo ga go kgonege go itumedisa [Modimo] sentle.” (Bahebera 11:6) Go bonala e nnile morago ga gore ‘Aborahame a dumele mo go Jehofa’ a ileng “a simolola go bidiwa tsala ya ga Jehofa.” (Jakobe 2:23) Jesu Keresete le ene o ne a gatelela botlhokwa jwa go ‘dumela mo Modimong’ fa re batla gore Modimo a re segofatse. (Johane 14:1) Ka jalo, o ka dira jang gore o nne le tumelo e Modimo a batlang gore batho ba ba atamalanang le ene ba nne le yone? O ka simolola ka go ithuta Lefoko la Modimo, Baebele, ka metlha. Fa o dira jalo, o tla nna le “kitso ya boammaaruri ya thato ya gagwe” o bo o ithuta kafa o ka mo ‘itumedisang ka botlalo’ ka gone. Go tswa foo, fa o ntse o nna le kitso ya boammaaruri ka ga Jehofa le go dirisa se o se ithutileng ka melao ya gagwe e e siameng, tumelo ya gago mo go ene e tla nonofa mme o tla atamalana le ene go feta pele.—Bakolosa 1:9, 10.