Fetela kwa tshedimosetsong

Fetela go diteng

SETLHOGO SA KA FA NTLE | O KA ATAMALANA LE MODIMO

A o Itse Leina la Modimo e Bile O a Le Dirisa?

A o Itse Leina la Modimo e Bile O a Le Dirisa?

A go na le tsala e o atamalaneng thata le yone mme o sa itse leina la yone? Ga go kgonege. Mosadi mongwe wa Mo-Bulgaria o ne a re: “O ka se atamalane le Modimo fa o sa itse leina la gagwe.” Jaaka re bone mo setlhogong se se fetileng, Modimo o batla gore o atamalane le ene. Ka jalo, o go ikitsisitse a dirisa Baebele ka go re: “Ke nna Jehofa. Ke lone leina la me.”—Isaia 42:8.

Modimo o go ikitsisitse a dirisa Baebele ka go re: “Ke nna Jehofa. Ke lone leina la me.” —Isaia 42:8

A tota Jehofa o batla gore re dirise leina la gagwe? Akanya ka seno: Leina la Modimo, le le kwadilweng ka ditumammogo tse nnè tsa Sehebera tse di itsegeng e le Thaterakeramatone, le tlhaga ka makgetlo a ka nna 7 000 mo mokwalong wa ntlhantlha wa Dikwalo Tsa Sehebera. Ga go na leina lepe le lengwe le le tlhagang gantsi jaana mo Baebeleng. Ruri jono ke bosupi jwa gore Jehofa o batla gore o itse leina la gagwe o bo o le dirise. *

Gantsi botsala bo simolola ka gore batho ba babedi ba ikitsise maina. A o itse leina la Modimo?

Batho ba bangwe ba re e re ka Modimo a le boitshepo e bile e le mothatayotlhe, go tla bo go sa bontshe tlotlo go dirisa leina la gagwe. Boammaaruri ke gore go tla bo go sa siama go dirisa leina la Modimo ka tsela e e sa tshwanelang, fela jaaka o ne o ka se dire jalo ka leina la tsala ya gago. Mo godimo ga moo, ke thato ya ga Jehofa gore batho ba ba mo ratang ba tlotle leina la gagwe le go le itsise ba bangwe. (Pesalema 69:30, 31; 96:2, 8) Gakologelwa gore Jesu o ne a ruta balatedi ba gagwe go rapela jaana: “Rraarona yo o kwa magodimong, a leina la gago le itshepisiwe.” Re ka itshepisa leina la Modimo ka go dira gore le itsiwe. Go dira jalo go re atamalanya thata le ene.—Mathaio 6:9.

Baebele e tlhalosa gore Modimo o lebisa tlhokomelo mo bathong “ba ba akanyang ka [kgotsa ba ba “tlotlomatsang”] leina la gagwe.” (Malaki 3:16) Jehofa o solofetsa jaana ka batho bao: “Ke tla mo sireletsa ka gonne o setse a itse leina la me. O tla mpitsa, mme ke tla mo araba. Ke tla nna le ene mo matshwenyegong.” (Pesalema 91:14, 15) Go botlhokwa gore re itse leina la ga Jehofa le go le dirisa fa re batla go nna le kamano e e molemo le ene.

^ ser. 4 Ka maswabi, le fa leina la Modimo le tlhagelela ka makgetlo a mantsi jalo mo Dikwalong Tsa Sehebera tse di itsegeng e le Tesetamente e Kgologolo, dithanolo tse dintsi tsa Baebele ga di a le dirisa. Go na le moo, di emiseditse leina la Modimo ka direto tse di jaaka “Morena” kgotsa “Modimo.” Fa o batla tshedimosetso e e oketsegileng ka kgang eno, bona tsebe 195-197 mo bukeng ya Totatota Baebele e Ruta Eng? e e gatisitsweng ke Basupi ba ga Jehofa.