Fetela kwa tshedimosetsong

Fetela go diteng

Jaanong ke Itse Modimo Yo ke Mo Obamelang

Jaanong ke Itse Modimo Yo ke Mo Obamelang

Moruti mongwe wa kereke ya Pentekosete yo go neng go twe o na le maatla a go fodisa o ne a re etela. Fa a ne a ntshwara, ke ne ka wela fa fatshe ka idibala ke “tsenwe ke moya.” Fa ke thanya, go ne go lebega ke bone se ke neng ke se batla—maatla a go fodisa. Ke eng se se neng sa dira gore ke diragalelwe ke seno mme se ile sa ama botshelo jwa me jang? Pele ga ke go bolelela ka seo, mma ke tlhalose kafa ke godisitsweng ka gone.

KE TSHOLETSWE kwa Ilocos Norte, Philippines, ka December 10, 1968, ke le ngwana wa bosupa mo go ba le lesome. Jaaka Ba-Philippine ba bantsi, re ne ra godisediwa mo Bokatoliking. Ke ne ka aloga kwa sekolong se segolwane ka 1986 e bile ke ne ke batla go nna mooki. Le fa go ntse jalo, bolwetse jo bo masisi jo bo neng jwa ntshwara bo ne jwa dira gore ke se ka ka kgona go dira se ke neng ke se batla. Tota e bile, ke ne ke akanya gore ke tla swa. E re ka ke ne ke tlaletswe ka ntlha ya bolwetse jwa me, ke ne ka kopa Modimo gore a nthuse mme ka mmolelela gore fa nka fola, ke tla mo direla botshelo jwa me jotlhe.

Fa ke sena go fola morago ga go lwala lobaka lo loleele, ke ne ka gakologelwa se ke se solofeditseng Modimo. Ka jalo, ka June 1991, ke ne ka ikwadisa mo sekolong sa Baebele sa Pentekosete. Thapiso ya sekolo e ne e akaretsa go amogela “mpho ya mahala ya moya o o boitshepo.” Ke ne ke batla go nna le maatla a go fodisa. Re ne re rutiwa gore re ka a bona ka go itima dijo le ka go rapela. Mo lekgetlhong lengwe ka nako ya fa re rapela, ke ne ka reetsa mongwe wa ba ke neng ke tsena le bone mo tlelaseng fa a ntse a rapelela kwa godimo mo sekhutlong sa phaposi ke sa bonwe ke ope ka boikaelelo jwa go dira gore batho ba akanye gore ke na le “mpho.” Fa a tla tloga a fetsa go rapela, ke ne ka boela ka bonako kwa ke neng ke khubame gone. Morago ga moo, ke ne ka mmolelela sengwe le sengwe se a neng a se rapelela mme o ne a dumela gore ke na le “mpho ya mahala”!

Fa ke ntse ke tsweletse ka dithuto tsa me kwa sekolong, ke ne ke na le dipotso di le dintsi. Ka sekai, Mathaio 6:9 e bua ka “Rara” le ka “leina” la gagwe. Ke ne ka botsa dipotso tse di jaaka, “Rara yo Jesu a buang ka ene ke mang?” le gore “Ke leina la ga mang le le tshwanetseng go itshepisiwa?” Gantsi dikarabo tsa batlhatlheledi ba me di ne di sa utlwale e bile di sa kgotsofatse. Ba ne ba bua ka Tharonngwe mme ba re ke masaitseweng. Go ne go ntlhakanya tlhogo thata. Le fa go ntse jalo, ke ne ka tswelela ka thapiso ya go nna moruti.

Go Itse ka Basupi ba ga Jehofa

Kwa sekolong sa Baebele, re ne ra rutiwa gore Basupi ba ga Jehofa ba rotloetsa mofuta mongwe wa bodumedi jwa maaka jo bo kotsi. Gape ba ne ba bidiwa baganetsakeresete. Ke ne ka simolola go tlhoa bodumedi jono thata.

Mo ngwageng wa me wa bobedi kwa sekolong, ke ne ka ya gae fa dikolo di tswetswe go ya go etela batsadi ba me. Mongwe wa bonkgonne e bong Carmen, o ne a utlwa gore ke kwa gae mme le ene a tla go eta. E ne e setse e le moreri wa nako e e tletseng yo o kolobeditsweng wa Basupi ba ga Jehofa. Fa a ne a leka go nthuta ka Modimo, ke ne ka  mo araba ka bogale ka re: “Ke setse ke itse Modimo yo ke mo obamelang!” Fa ke sena go mo tlhapatsa, ke ne ka mo kgoromeletsa kgakala mme ka se tlhole ke mo letla gore a bue le nna gape.

Fa ke sena go boela kwa sekolong sa Baebele, Carmen o ne a nthomelela khopi ya boroutšhara jwa setlhogo se se reng A O Tshwanetse Wa Dumela Tharo-Nngwe? * Ka yone nako eo ke ne ka e sugakanya mme ka e latlhela mo molelong. Ke ne ke sa ntse ke mo galefetse.

Go Gatela Pele ke le Moruti

Fa ke ntse ke tsweletse ka dithuto tsa me kwa sekolong sa Baebele, ke ne ka kgona go sokolola batho ba bangwe. Ke ne ka itumela fela thata fa mmè le kgaitsadiake ba tla go tsena kereke e ke neng ke le mo go yone ya Pentekosete.

Ka March 1994, ke ne ka aloga kwa sekolong sa Baebele sa Pentekosete. Jaaka ke tlhalositse kwa tshimologong, moruti yo o neng a etile o ne a le teng ka nako eo. Mongwe le mongwe wa rona baalogi, o ne a ipatla gaufi le ene ka gonne re ne re dumela gore o na le mpho ya go fodisa. Re ne ra ya le ene kwa seraleng ra tlolakaka, ra opa diatla re tsamaisana le moribo wa mmino. Go tswa foo, mongwe le mongwe yo a neng a mo tshwara o ne a wela fa fatshe a “tsenwe ke moya.” * Fa a ne a ntshwara, le nna ke ne ka wela fa fatshe ka idibala. Fa ke thanya, ke ne ka tshoga mme ka lemoga gore ke ne ke na le maatla a go fodisa mme seo sa dira gore ke itumele.

Ka bonako morago ga foo, ke ne ka fodisa ngwana yo o neng a lwala thata a tshwerwe ke letshoroma ke dirisa maatla ao a go fodisa. Fa ke rapela, ka bonako fela ngwana o ne a simolola go fufula mme letshoroma la fola. Ke ne ke akanya gore kgabagare ke dira se ke se solofeditseng Modimo. Mme se se gakgamatsang ke gore ke ne ke ikutlwa ke tlhaela sengwe. Gone mme, ke ne ke dumela gore go na le Modimo a le mongwe fela, mme ke sa itse gore tota ke mang. E bile ke ne ke belaela dithuto tse dintsi tsa kereke.

Ke ne ka fodisa ngwana yo o neng a lwala thata a tshwerwe ke letshoroma ke dirisa maatla ano a go fodisa

Dilo Tse di Fetotseng Tsela e ke Neng ke Leba Dilo ka Yone

Morago ga ditiragalo tseo tsotlhe, ke ne ka tlhoa Basupi ba ga Jehofa le go feta. Nako le nako fa ke bona dikgatiso tsa Basupi, ke ne ke di fisa. Mme go ne ga direga sengwe se ke neng ke sa se lebelela. Ke ne ka tshosiwa ke go utlwa gore Mmè ga a tlhole a batla bodumedi jwa rona. Carmen o ne a ithuta Baebele le ene! Ke ne ka galefela nkgonne fela thata.

Mme ke ne ka fitlhela makasine wa Tsogang! kwa ntlong ya ga Mmè. Le one nkabo ke o fisitse jaaka ke ne ke tle ke dire. Le fa go ntse jalo, ke ne ka nna ke o phetlha ke batla go bona se a neng a se bala. Ke ne ka bona setlhogo se se neng se bua ka monna mongwe yo o neng a dumela thata mo dithutong tsa kereke. Mme fa a simolola go bala dikgatiso tsa Basupi mmogo le Baebele, o ne a tlhatswega pelo gore thuto ya Tharonngwe, ya dihele le ya gore moya ga o swe, di ne di sa tswe mo Baebeleng. Seo se ne sa nkama pelo. Tseno e ne e le tsone dilo tse ke neng ke batla go di tlhaloganya. Fa e sa le ka nako eo, ke ne ka eletsa go ipona ke tlhaloganya se Baebele e se rutang.

Fa ke sena go bala maitemogelo a mangwe mo makasineng wa Tsogang!, a a buang ka motho yo  o neng a nwa bobe e bile a tshwakgotswe ke diokobatsi yo o neng a dira diphetogo tse dikgolo ka go bo a ne a ithuta Baebele, ke ne ka simolola go bala dikgatiso tse dingwe tsa Basupi. Ke ne ka bona khopi ya boroutšhara jwa setlhogo se se reng, Leina La Modimo Leo Le Tla Nnelang Ruri. * Fa ke ntse ke bo bala ke ne ka ithuta gore leina la Modimo ke Jehofa. Go ithuta boammaaruri ka Modimo a le mongwe fela wa boammaaruri go ne ga dira gore ke itumele fela thata!—Duteronome 4:39; Jeremia 10:10.

Go ithuta boammaaruri ka Modimo a le mongwe fela wa boammaaruri go ne ga dira gore ke itumele fela thata!

Ke ne ka nna ke bala mo sephiring e bile ke ithuta dithuto tse dintsi tsa Baebele. Ka sekai, kwa sekolong sa Pentekosete ke ne ke rutilwe gore Jesu ke Modimo, mme ke ne ka ithuta mo Baebeleng gore ke “Morwa Modimo yo o tshedileng.”—Mathaio 16:15, 16.

Ke ne Ka Fetoga

Fa ke kopana le Carmen gape o ne a gakgamadiwa ke go bo ke mo kopa boroutšhara jwa setlhogo se se reng, Leina La Modimo Leo Le Tla Nnelang Ruri le dikgatiso tse dingwe. Ke ne ke feditse dingwaga di le dintsi ke le kwa sekolong seo sa Baebele mme ke ne ke sa rutiwe boammaaruri; ke ne ke tsieditswe. Jaanong ke ne ke itumetse ka ntlha ya boammaaruri jo ke neng ke bo ithuta jo bo tswang mo Baebeleng. Ke ne ka tlhaloganya ka botlalo mafoko ano a ga Jesu: “Lo tla itse boammaaruri, mme boammaaruri bo tla lo golola.” (Johane 8:32) Dithuto tseo tsa boammaaruri di ne tsa simolola go fetola botshelo jwa me.

Dithuto tseno tsa boammaaruri di ne tsa simolola go fetola botshelo jwa me

Ka lobaka lo lo rileng, ke ne ka akanya gore nka obamela Jehofa Modimo mo sephiring mme ke tswelele ke le moruti. Go ise go ye kae, ke ne ka lemoga gore ke ne nka se tlhole ke kgona go ruta dithuto tse dintsi tsa kereke. Le fa go ntse jalo, ke ne ke boifa. Ke ne ke tla bona kae madi fa ke ne nka tlogela go nna moruti? Ruri go ne go tla tlhabisa kereke ditlhong gore mongwe wa baruti ba yone a nne Mosupi wa ga Jehofa! Ka jalo, ke ne ka tswelela ke le moruti mme ka tila go ruta dithuto tsa kereke tsa maaka.

Fa ke bona nkgonne Carmen gape, o ne a akantsha gore ke ye kwa pokanong nngwe ya Basupi ba ga Jehofa. E re ka ke ne ke tle ke ye kwa kerekeng e kgolo ya Pentekosete ya kwa Laoag City, ke ne ka swetsa ka gore fa ke le koo ke tla ya kwa lefelong le Basupi ba kopanelang kwa go lone kwa Holong ya Bogosi. Ke ne ka itsisiwe modiredi wa nako e e tletseng mo phuthegong eo e bong Alma Preciosa Villarin yo gape a neng a bidiwa ka leina la mareto e leng Precious. Le fa ke ne ke sa ntse ke na le boikutlo jo bo sa siamang ka Basupi, ke ne ka dumela gore a nthute Baebele.

Nkgonne o ne a le pelotelele thata fa a ne a mpolelela dithuto tsa Baebele. Mme jaanong ke ne ka bona bopelotelele jo bo ntseng jalo mo go Precious. O ne a nthusa fela thata gore ke tlhaloganye Baebele tota le fa ke ne ke galefa, ke leka go ngangisana le ene, e bile ka dinako tse dingwe ke goa ke ganelela mo dilong dingwe tse ke neng ke  di rutilwe. Tsela e Precious le Basupi ba bangwe ba neng ba nkgatlhegela ka yone, ba le boikokobetso e bile ba le bonolo e ne ya nkama fela thata. Seno se ne sa ntlhotlheletsa gore ke batle go obamela Jehofa.

Ka July 1995, ke ne ka lemoga gore fa ke batla go ipedisa Modimo, ke ne ke tshwanetse go tlogela go nna moruti. Ka ntlha yang? Tshenolo 18:4 e bua ka tsela ya tshwantshetso ka bodumedi jwa maaka e bile ya re: “Tswang mo go ene, batho ba me, fa lo sa batle go tlhakanela le ene mo maleong a gagwe, le fa lo sa batle go amogela karolo ya dipetso tsa gagwe.” Mme ke ne ke tla itshedisa jang? Ke ithutile mo go Bahebera 13:5 gore fa re dira thato ya Modimo, o solofetsa jaana: “Ruri ga ke na ke go tlogela ka gope le fa e le go go latlha ka gope.”

Le fa gone jaanong rre le kgaitsadiake ba nkganetsa thata, dibeke di le pedi pele ke kolobediwa go nna Mosupi, ke ne ka nna pelokgale mme ka ya gae go ya go fisa dilo tsotlhe tse ke neng ke di dirisa fa ke ne ke le moruti. Fa ke sena go dira jalo, ke ne ka lemoga gore ke ne ke sa tlhole ke na le maatla ape a a kgethegileng a ke neng ke a neilwe mo nakong e e fetileng. Mo nakong e e fetileng fa ke robala, ke ne ke utlwa e kete go na le sengwe se se nkgatelelang. Boikutlo joo le jone bo ne bo sa tlhole bo le teng. Meriti e ke neng ke tle ke e bone mo fensetereng ya kamore ya me e ne ya se tlhole e bonala gape. Fa ke ntse ke ithuta Baebele ke ne ka lemoga gore dimpho dipe fela tsa gompieno, tse di jaaka maatla a go fodisa ga di tswe kwa Modimong mme di tswa kwa meyeng e e boikepo. Ke itumelela gore fela jaaka mosetsana mongwe wa motlhanka yo Paulo a neng a mo golola mo ‘ledimoneng la boitseanape’ ke ne ka kgona go tswa mo tlhotlheletsong ya yone.—Ditiro 16:16-18.

Ruri ke ne ke itumetse tota fa nna le Mmè re ne re kolobediwa mmogo go nna Basupi ba ga Jehofa ka September 1996! Fa ke sena go kolobediwa, ke ne ka ikwadisa go nna modiredi wa nako e e tletseng wa Basupi ba ga Jehofa ka bo ka itumelela go dira tiro eno ka dingwaga di le dintsi.

Jaanong ke nyetswe ke Silver. Re dira ka natla go thapisa morwadiarona ka dithuto tsa Baebele. Bangwe ba bana bagaetsho ba direla Jehofa mmogo le rona. Le fa ke ikwatlhaela go bo ke ne ke sa itse Modimo ka dingwaga di le dintsi, gone jaanong ke itumelela gore ke obamela Modimo yo ke mo itseng.

^ ser. 10 E gatisitswe ke Basupi ba ga Jehofa mme ga e sa tlhole e gatisiwa.

^ ser. 13 Go ‘tsenwa ke moya’ ke tiragalo e e tlwaelegileng mo madumeding a le mantsi e mo go yone badumedi ba tsenwang ke se go tweng ke moya o o boitshepo ba bo ba wela fa fatshe.

^ ser. 18 E gatisitswe ke Basupi ba ga Jehofa.