Go itshwaratshwara dirwe tsa tlhakanelodikobo ke mokgwa o o sa itumediseng Modimo e bile o kgotlela mogopolo wa motho ka go dira gore a batle go ikgotsofatsa ene fela. * Gape motho yo o nang le mokgwa wa go itshwaratshwara dirwe tsa tlhakanelodikobo a ka simolola go leba batho ba bangwe e le didirisiwa fela tsa go kgotsofatsa dikeletso tsa gagwe tsa tlhakanelodikobo. O simolola go tsaya tlhakanelodikobo e se go bontshana lorato ga batho ba babedi mme e le go dira sengwe fela se se tlisang monate wa nakwana e bile se kokobetsa keletso ya tlhakanelodikobo. Mme kgotsofalo eo ke ya nakwana fela. Totatota, mo boemong jwa go bolaya ditokololo tsa mmele tse di “ka ga kgokafalo, boitshekologo, keletso [e e sa siamang] ya tlhakanelodikobo,” mokgwa wa go itshwaratshwara dirwe tsa tlhakanelodikobo o tsosa ditokololo tseo.—Bakolosa 3:5.

Moaposetoloi Paulo o ne a kwala jaana: “Baratwa, a re intlafatseng leswe lengwe le lengwe la nama le moya, re itekanedisa boitshepo mo go boifeng Modimo.” (2 Bakorintha 7:1) Fa e le gore o fitlhela go le thata go ikobela mafoko ano, o se ka wa itlhoboga. Jehofa o nna a “iketleeleditse go [go] itshwarela” le go go thusa. (Pesalema 86:5; Luke 11:9-13) Ee ruri, lebaka la go bo pelo ya gago e hutsafadiwa ke seno e bile o leka go tlogela mokgwa ono—le fa  ka dinako tse dingwe o boela morago—le bontsha gore o na le boikutlo jo bo siameng. Gopola gape gore “Modimo o mogolo go feta dipelo tsa rona e bile o itse dilo tsotlhe.” (1 Johane 3:20) Modimo ga a bone maleo a rona fela; o bona motho a feletse. Kitso eno e dira gore a kgone go reetsa ka kutlwelobotlhoko fa re mo rapela go tswa pelong gore a re utlwele botlhoko. Ka jalo, le ka motlha o se ka wa lapisiwa ke go rapela Modimo ka boikokobetso le ka tlhoafalo, jaaka ngwana a ya kwa go rraagwe fa a le mo mathateng. Jehofa o tla go fa segakolodi se se phepa. (Pesalema 51:1-12, 17; Isaia 1:18) Mme gone o tshwanetse go dira dilo tse di tsamaisanang le se o se rapelelang. Ka sekai, o tla leka gore o tile mefuta yotlhe ya tshedimosetso e e hepisang mmogo le ditsala tse di bosula. *

Fa bothata jwa gago jwa go itshwaratshwara dirwe tsa tlhakanelodikobo bo tswelela pele, tsweetswee bolelela motsadi wa gago wa Mokeresete ka kgang eno kgotsa tsala nngwe e e godileng semoyeng e bile e amega ka wena. *—Diane 1:8, 9; 1 Bathesalonika 5:14; Tito 2:3-5.