Fetela kwa tshedimosetsong

Baebele ya Reng ka go Fedisa Botshelo Jwa Motho yo o Lwalelang go Swa?

Baebele ya Reng ka go Fedisa Botshelo Jwa Motho yo o Lwalelang go Swa?

Karabo ya Baebele

Ga go na gope mo Baebele e buang teng ka tlhamalalo ka go fedisa botshelo jwa motho yo o lwalelang go swa. * Mme se Baebele e se buang ka botshelo le loso se re thusa go bona gore Modimo o leba jang kgang eno. Go bolaya go phoso mme ga go tlhokege gore o leke go tsweletsa botshelo jwa motho yo o leng gaufi le go swa.

Baebele ya re Modimo ke ene a re bopileng e bile ke ene “motswedi wa botshelo.” (Pesalema 36:9; Ditiro 17:28) Modimo o tsaya botshelo bo le botlhokwa thata. Ke ka moo a sa batleng gore motho a bolaye yo mongwe kgotsa a ipolaye. (Ekesodo 20:13; 1 Johane 3:15) Gape Baebele e re kgothaletsa gore re dire sotlhe se se mo maatleng a rona go sireletsa matshelo a rona le a batho ba bangwe. (Duteronome 22:8) Seno se re bontsha sentle fela gore Modimo o batla gore re tlotle botshelo.

Jaanong re ka reng ka motho yo o lwalang thata?

Baebele ga e re re fedise botshelo jwa motho le fa re bona gore motho yoo o gaufi le go swa. Ntlha eno re e bona mo go se se ileng sa diragalela Kgosi Saulo wa Iseraele. Fa a ne a le kwa ntweng mme a bo a gobala thata, o ile a kopa motlhanka wa gagwe gore a mmolaye. (1 Samuele 31:3, 4) Motlhanka yoo o ile a gana. Mme monna mongwe o ile a bua maaka a re o dirile se Saulo a neng a mo kopile sone. Dafide o ile a bolaya monna yoo ka gonne Dafide o ne a tlhaloganya gore Modimo o ikutlwa jang ka kgang eo.—2 Samuele 1:6-16.

A mme re tlhoka go tsweletsa botshelo jwa motho re ntse re bona gore o tloga a swa?

Baebele ga e re re tsweletse botshelo jwa motho yo re mmonang gore o a swa. Go na le moo, e re thusa go nna tekatekano. Loso ke mmaba wa batho botlhe e bile re swa ka gonne re le baleofi. (Baroma 5:12; 1 Bakorintha 15:26) Le fa re sa batle go swa, ga re a tshwanela go tshaba loso ka gonne Modimo o re solofetsa gore o tla re tsosa mo baswing. (Johane 6:39, 40) Motho yo o tlotlang botshelo o tla batla kalafi epe fela e e ka mo thusang. Mme ga a kitla a leka go tsweletsa botshelo jwa gagwe fa a bona gore o gaufi le go swa.

A Modimo o itshwarela motho yo o ipolaileng?

Ee, Baebele ga e re motho yo o ipolaileng o dirile boleo jo Modimo a ka se kang a bo itshwarela. Le fa go ipolaya go le phoso, * Modimo o a tlhaloganya gore go na le batho ba ba ipolayang ka gonne ba lwala mo tlhaloganyong le mo maikutlong. (Pesalema 103:13, 14) Mo Baebeleng, go na le ditemana tse di ka gomotsang batho ba ba tshwenyegileng thata. Gape Baebele ya re go tlile go nna le tsogo ya “ba ba siameng mmogo le ba ba sa siamang.” (Ditiro 24:15) Seno se re thusa go bona gore Modimo a ka nna a tsosa batho ba ba dirileng maleo a a masisi a a jaaka go ipolaya.

^ ser. 1 Fano re bua ka motho yo o fedisang botshelo jwa motho yo mongwe ka gonne a mmona a lwala thata kgotsa a gobetse thata mo a tlholang a le mo ditlhabing tse di botlhoko. Mme mo maemong a mangwe molwetse ke ene a kopang ngaka gore e fedise botshelo jwa gagwe.

^ ser. 5 Batho ba ba ipolaileng ba go buiwang ka bone mo Baebeleng ba ne ba dira dilo tse Modimo a neng a sa di amogele.—2 Samuele 17:23; 1 Dikgosi 16:18; Mathaio 27:3-5.