Yeremia 49:1-39
49 Ka kwagh u Yehova a ôr sha Mbaamon+ je ne, ér:
“Iserael ngu a ônov mba nomso gaa?
Ngu a oryandyako gaa?
Er nan Malkam+ a ngohol Gadi?+
Shi er nan ior nav ve lu ken agar a Iserael?”
2 “‘Sha nahan yô, nenge! ayange nga van,’ kape Yehova a kaa la,‘A me na a ungwa imo i utya sha Raba+ u Mbaamon+ yô.
Una hingir igyungu i i lu ice yô,Shi a nande ugeri nav mba ve kase un la sha usu.’
‘Nahan Iserael una hide a ngohol tar u yange i ngohol hen a na la,’+ kape Yehova a kaa la.
3 ‘Gber kwelegh we Heshebon, sha ci u i tim Ai kera!
Vaa nen genger genger, ne ugeri mba ne kase Raba la.
Hua nen ikyondo i zungwen.*
Gber nen kwelegh, zende nen hurugh hurugh ken atôrauile a sha awen,Sha ci u Malkam una yem uikyangen,Vea upristi nav man mbahemenev nav imôngo.+
4 Er nan u te ihyagh sha kwagh u upev,*Man sha kwagh u pev wou u doon iyiav la, we wankwase u u ban a jighjigh,U u suur sha akaainjaa a ou,U kaa wer: “Ka an nana va ta ityav sha a mo?” ne?’”
5 “‘Nenge, m ngu van a kwagh u cieryol sha a we, sha ikyev i ior mba ve kase u la cii,’Kape Yehova u akum a sha, Ter u Hemban Cii a kaa la.
‘A sambe ne sha hanma vegher cii,Shi or môm nana kohol ior mba ve yevese la imôngo ga.’”
6 “‘Kpa shighe a karen yô, me kohol Mbaamon mba ve lu uikyangen la imôngo,’ kape Yehova a kaa la.”
7 Ka kwagh u Yehova u akum a sha a ôr sha Edom je ne, ér:
“Kwaghfan kera ngu ken Teman gaa?+
Ior mba lun a mkav kera mba a kwaghwan u dedoo gaa?
Kwaghfan ve hôô shinii?
8 Yevese, hide yem nen!
Yem za lu nen shin upev mba zan, ne ior mba ne lu ken Dedan+ la!
Gadia me va a kwaghtseren sha Isou,Zum u shighe a kuma u me na ishima sha kwagh na yô.
9 Aluer mbasundan atam a wain va hen a we yô,Vea kera undu atam agen her ér i yar twar gaa?
Aluer mbaiv va tugh yô,Vea vihi a lu kwagh u ve soo la tseegh.+
10 Kpa me ngohol Isou hanma kwagh una hingir aveve.
Me bugh ajiir a na a yeren,Sha er una fatyô u yeren ga yô.
A tim ônov nav man anmgbianev nav kua mbawanndor a na cii,+Nahan una kera lu ga.+
11 Undu ônov ou mba ve lu a ter ga la,Nahan me kura ve vea lu uma,Shi kasevmbacôgholov ou vea suur sha a mo.”
12 Gadia ka kwagh u Yehova a kaa je ne, ér: “Nenge! Aluer mba i kur ve ijir ér ve de me shin kôôpu la ga je kpa, gba u vea ma shimi yô, ka we ve a gba den we nahan a u tsahan we shio yee? A tsaha u keng, u ma shimi kpee je.”+
13 “Gadia mo iyol yam m bum,” kape Yehova a kaa la, “mer Bosera una hingir kwagh u cieryol+ man u lahan man u a tim kera, kua u wan ifyan; agar a na cii aa hingir alôgh gbem sha won.”+
14 M ungwa loho due hen Yehova,A tindi or hen akuraior ér nana za kaa ér:
“Kohol nen imôngo, za ta nen ityav sha a na;Wa nen iyol u za nôngon ityav.”+
15 “Gadia nenge! M er u u kera gba kwagh ken akuraior ga,U ndôhôr ior ishima kpishi.+
16 Tar u u ne u tenger manIhyagh i ken ishima you la bume u,We u u tem ken ihia i avandegh,U tem sha igyungu i hemban taven cii la.
Er u we iya you sha ijiir i taven geng er igyuve nahan kpa,Me ulugh we sha mi me hungwa a mi,” kape Yehova a kaa la.
17 “Nahan Edom una hingir kwagh u cieryol kpee je.+ Hanma or u nan kar ikyua a na yô, nana kenger sha mcie, nana gbidye iwer sha atsan a a tser un la cii.
18 Vough er yange i tim Sodom man Gomora kua ugeri mba ve kase ve la nahan,”+ Yehova kaa ér, “or môm nana lu her ga, shi or môm nana tema ker kpaa ga.+
19 “Nenge! Or nana due nana va ta ityav sha ajiir a ilev yan toho a Edom a a lu bem bem la, er begha+ u a lu duen ken akô a wan civirii a Yordan nahan, kpa fese je me er un* una yevese hen a na kera. Shi me ver orhemen u m tsough la sha a na. Gadia ka an nan lu er mo, shi ka an nana hendan kwagh a moo? Ka hanma orkuranilev nana fatyô u tilen sha ishigh yagha?+
20 Sha nahan yô, ne ior, ungwa nen kwagh u Yehova a tsough u eren a Edom la, kua kwagh u a hen sha ior mba ve lu ken Teman+ la kpaa:
Mimi je a kpela ônovmbaiyôngov mba ikyumuile a yem a mi kera.
Una er ijiir i ve lu la ia hingir ice, sha ci u ieren ve la.+
21 Ve gba, hura je yô, tar tenger.
Mba vaan genger genger!
I ungwa iuvan la zan zan nyôr hen Zegemnger u Nyian.+
22 Nenge! Una purugh a yem sha, maa una za sen sha agee er igyuve nahan,+Una samber akper a na sha Bosera.+
Sha iyange la, ishima i mbautyaav mba EdomIa lu er ishima i kwase u a lu maren nahan.”
23 Sha kwagh u Damaseku yô,+ ka kwagh u i ôr je ne ér:
“I hee Hamati+ man Arpadi,Gadia ve ungwa loho u bo.
Cier ve iyol kpishi.*
Ishimanyian ngi shin zegemnger, man a fatyô u eren un ér a lu gir gir ga.
24 Iyol kpe Damaseku.
A gema ér una yevese, kpa mciem gba un iyol.
Ican man mnyoon kôr un,Er kwase u a lu maren nahan.
25 Er nan ve i undu gar u iwuese,U a lu geri u msaanyol la ga?
26 Gadia agumaior a na aa gba hen ityembe na,Shi ushoja cii vea tim sha iyange la,” kape Yehova u akum a sha a kaa la.
27 “Me nande kpekpe u Damaseku sha usu,Nahan ua hia ayou a taven a lun a ugir mba taver mba Ben-hada.”+
28 Sha kwagh u Kedar+ man ityartor i Hasor, i Nebukadinesar* tor u Babilon tim kera la yô, ka kwagh u Yehova a kaa je ne, ér:
“Mough kôndo za nen ken Kedar,Za tim nen ônov mba sha ityoughkitaregh.
29 A ngohol utenti vev man ilev vev,Shi a ngohol akondo a tenti a ve kua akaa a ve cii.
A kura urakumi vev a yem a mi,Nahan vea vaa a ve vea kaa ér, ‘Mciem ma hanma ijiir cii!’”
30 “Yevese, yem nen ica!
Yem za lu nen shin upev mba zan, ne ior mba ne lu ken Hasor la,” kape Yehova a kaa la.
“Gadia Nebukadinesar* tor u Babilon due a gbenda u eren ne kwaghbo,Shi a er mhen u bo sha a ven.”
31 “Mough, kôndo za ta nen ityav sha ikyurior i i tem bem bem,Ken mkpeyol la!” kape Yehova a kaa la.
“Ngi a ihinda ga, ushindan kpaa ga; mba kwagh ve ica.
32 A kura urakumi vev a yem a mi,Shi a ya ishar sha ilev vev mbi ve lu a mi kpishi la.
Me sambe ve vea yem hanma ijiir,*Ve mba ka ve hondo ice ve i ken aase la,+Shi me va a kwaghtseren sha a ve hanma vegher cii,” kape Yehova a kaa la.
33 “Shi Hasor una hingir ijiir i tsan i aniwaav mba ken toho,Una lu ice gbem sha won.
Or môm nana lu her ga,Shi or môm nana tema ken a na kpaa ga.”
34 Ka kwagh u Yehova ôr a profeti Yeremia sha kwagh u Elam+ ken mhii u hemen u Sedekia+ tor u Yuda je ne, ér:
35 “Ka kwagh u Yehova u akum a sha a kaa je ne, ér, ‘Nenge, me kever ada u Elam,+ ape tahav nav mbu dugh* la.
36 Me va a ahumbe anyiin a a lu sha azongo a anyiin a sha la sha Elam, nahan me sambe ve vea yem hen ahumbe ne cii. Ma ikyurior i ior mba ken Elam mba i sambe ve la vea za her ga je kpa, ia lu ga.’”
37 “Me hembe Mbaelam avur avur sha ishigh ki mbahyomov vev man sha ishigh ki mba ve lu keren u tôôn uma ve kera la; shi me va a kwaghtseren sha a ve, me va a ishima i i vihim kpishi la sha a ve,” kape Yehova a kaa la. “Shi me tindi sanker una zenda ve ijime zan zan me kar timin ve kera been.”
38 “Me ver ikyônough yagh ki torough ken Elam,+ nahan me wua tor man mbahemenev mba ve lu her la kera,” kape Yehova a kaa la.
39 “Kpa ken ayange a masejime yô, me kohol ior mba ken Elam mba i yem a ve uikyangen la imôngo,” kape Yehova a kaa la.
Ngeren mba shin kpe
^ Shin “ibyashôhô.”
^ Shin “upev mba lun gburumaa.”
^ Alaghga tsô ka Edom.
^ Zwa Heberu, “Asema a ve sough sha mcie.”
^ Zwa Heberu, “Nebukadiresar,” ka gbenda ugen u ngeren iti i Nebukadinesar.
^ Zwa Heberu, “Nebukadiresar,” ka gbenda ugen u ngeren iti i Nebukadinesar.
^ Zwa Heberu, “vea sambe ken ahumbe cii.”
^ Zwa Heberu, “mbu hii.”
