Yeremia 39:1-18
39 Ken inyom i sha utaankarunyiin i hemen u Sedekia tor u Yuda, ken uwer u sha pue la, Nebukadinesar* tor u Babilon man ikyumutya na cii va ken Yerusalem, ve va kase un ve wa atô.+
2 Ken inyom i sha 11 i hemen u Sedekia, ken uwer u sha unyiin, sha iyange i sha utaankarunyiin i uwer shon la, ve hembe kpekpe u gar la.+
3 Tsô mbahemenev mba tor u Babilon nyôr za tema hen Hunda u hen Atô la.+ Ve yô, lu Nergal-shareser, ka Samgar je la, man Nebo-sarsekim, ka Rabesari* je la, kua Nergal-shareser, ka Rabemagi* je la, kua mbahemenev mba tor u Babilon mba ve mase shin la cii.
4 Sedekia tor u Yuda man ushoja mbara cii mba nengen a ve yô, ve yevese+ tugh ve due ken gar kera sha gbenda u sule u tor la. Ve kar sha hunda u u lu hen atô u ukpekpe mba uhar mbara, maa ve yem sha gbenda u Araba la.+
5 Kpa ikyumutya i Mbakaldi zenda ve ijime, ve za kôr Sedekia ken taaikyôngo u Yeriko+ la. Ve kôr un ve hide a na hen Nebukadinesar* tor u Babilon hen Ribela+ ken tar u Hamati.+ Lu her a ôr un ijir ye.
6 Tor u Babilon na zwa i sôngo ônov mba Sedekia mba nomso sha ashe a na hen Ribela, shi tor u Babilon na zwa i sôngo ashagbaaior a Yuda cii.+
7 Tsô a pir Sedekia ashe. Been yô, a kange un sha mshirim ma togula a va a na ken Babilon.+
8 Mbakaldi maa nande ya u tor man uya mba iorov,+ shi ve hembe ukpekpe mba Yerusalem ve haa inya.+
9 Nebusaradan,+ orvesen u mbakuran la, kura ior mba ve mase shin ken gar la yem a ve uikyangen ken Babilon, kua ior mba ve yevese ve za kohol un la, man nyityô or i i mase shin her cii.
10 Kpa Nebusaradan orvesen u mbakuran la, undu ior mbagen ken ior mba hemban gban ican cii la ken tar u Yuda her, ve mba ve lu a kwagh môm môm ga la. Sha iyange la, shi a na ve ishuleikyon i wain man ishule igen sha u ve er tom yô.*+
11 Hen shighe ne, Nebukadinesar* tor u Babilon wa Nebusaradan orvesen u mbakuran la atindi ne sha kwagh u Yeremia, ér:
12 “Tôô un, za nengen sha a na, de eren un iferkwagh ga, shi na un nyityôkwagh i a sen u cii.”+
13 Tsô Nebusaradan orvesen u mbakuran la man Nebushaseban, ka Rabesari* je la, man Nergal-shareser, ka Rabemagi* je la, kua ior mba tagher tagher mba tor u Babilon cii tindi,
14 i za due a Yeremia hen Tembe u Mbakuran kera,+ i va a na i va na sha ikyev i Gedalia+ wan u Ahikam+ wan u Shafan,+ sha u a va a na hen ya na yô. Nahan a lu imôngo vea ior.
15 Er i ver Yeremia lu ijiir i môm hen Tembe u Mbakuran la,+ Yehova ôr kwagh a na kaa ér:
16 “Za, za ôr Ebedi-meleki+ Oretiopia la wer, ‘Ka kwagh u Yehova u akum a sha, Aôndo u Iserael a kaa je ne ér: “Nenge, m ngu eren akaa a m ôr sha gar ne la sha u van a kwaghtseren, ka kwagh u dedoo ga. Man sha iyange la, u nenge a lu nahan.”’
17 “‘Kpa a yima u sha iyange la,’ kape Yehova a kaa la, ‘nahan a na u sha ikyev i ior mba u lu cian ve la ga.’
18 “‘Gadia me yima u kpee a bunde ga, nahan u kpe sha sanker ga. Uma wou una hingir we er ka ishar nahan*+ sha ci u u nam jighjigh,’+ kape Yehova a kaa la.”
Ngeren mba shin kpe
^ Zwa Heberu, “Nebukadiresar,” ka gbenda ugen u ngeren iti i Nabukadinesar.
^ Takeda u ken zwa Heberu ugen nger ati ne sha gbenda ugen kposo nahan, ér: Nergal-shareser man Samgar-nebo man Sarsekim kua Rabesari.
^ Shin “orvesen u mbaahiriv, (orvesen u mbanengenasan).”
^ Zwa Heberu, “Nebukadiresar,” ka gbenda ugen u ngeren iti i Nabukadinesar.
^ Shin a fatyô u kaan ér “sha u ve eren ityom i i kighir ve, ve lu eren la.”
^ Zwa Heberu, “Nebukadiresar,” ka gbenda ugen u ngeren iti i Nabukadinesar.
^ Shin “orvesen u eren tom hen ya u tor.”
^ Shin “orvesen u mbaahiriv, (orvesen u mbanengenasan).”
^ Shin “U war a uma wou.”
