Yeremia 21:1-14
21 Yehova yange ôr kwagh a Yeremia shighe u Tor Sedekia+ tindi Pashur+ wan u Malkiya, man pristi Sefania+ wan u Maaseia, hen a na va sôn kwagh ne la, ér:
2 “Wea lumun yô, pine Yehova kwagh sha ci wase, sha ci u Nebukadinesar* tor u Babilon ngu nôngon ityav a vese.+ Alaghga Yehova una er kwagh môm ken ityom na i kpilighyol la sha ci wase, sha er una due hen a vese kera yô.”+
3 Yeremia gema kaa a ve ér: “Ka kwagh u ne ôr a Sedekia je ne, ner,
4 ‘Ka kwagh u Yehova Aôndo u Iserael a kaa je ne, ér: “Nenge, m ngu geman ikyav mbi utyaav mbi ne lu a mi sha ave la mbia hingir num a ven, ka ikyav mbi utyaav mbi ne lu nôngon ityav a mi, a tor u Babilon+ man Mbakaldi mba ve we ne atô i ningir i tser ken won gar je la. Me kohol ve imôngo hen atô u gar ne.
5 Nahan mo iyol yam me nôngo ityav a ven+ a uwegh agh ku ageegh man tahav av mbu hemban, a ishima i vihin man iyugh kua ishimanyoon tsung.+
6 Me tsaha ior mba ken gar ne, or man zendenya cii. Vea kpe bouange u vesen.”’+
7 “‘“A been kera yô, me na Sedekia Tor u Yuda, man mbatomov nav man ior mba ken gar ne—ve mba vea war bouange man sanker kua ijen la, sha ikyev i Nebukadinesar tor u Babilon man sha ikyev i mbahyomov vev kua sha ikyev i ior mba ve lu keren u tôôn uma ve kera la,”+ kape Yehova a kaa la. “Una wua ve sha sanker, una vaa afanyô ga, kunya ua kôr un a ve ga, shi una zungwe mhôônom cuku tsô kpaa ga.”’+
8 “Shi ôr a ior mban wer, ‘Ka kwagh u Yehova a kaa je ne, ér: “Nenge, m ngu veren ne gbenda u uma man gbenda u kuugh sha ishi.
9 Ior mba ve shi ken gar ne la vea kpe sha sanker man sha ijen kua sha bouange. Kpa hanma or u nana due nana za na iyol i nan sha ikyev i Mbakaldi mba ve kase ne ve we atô ne la yô, nana za hemen u lun uma, shi uma u nan una hingir nan er ka ishar nahan.”’*+
10 “‘“Gadia m ver ishigh yagh sha gar ne sha ci u van a kwaghtseren, ka kwagh u dedoo ga,”+ kape Yehova a kaa la. “A na un sha ikyev i tor u Babilon,+ nahan una nande un sha usu.”+
11 “‘We ya u tor u Yuda, ungwa kwaghôron u Yehova.
12 We ya u Davidi, ka kwagh u Yehova a kaa je ne, ér:
“Ôron ijir sha mimi hanma pepe,Nahan yima or u i lu numun nan gbenda la sha ikyev i or u nyighen ior,+Sha er ishimavihin yam ia yegh er usu nahan ga,+Shi ia hia, or môm nana fatyô u pirin ga zeSha ci u aeren a en a ifer la yô.”’+
13 ‘Nenge, m ngu num a we, we or u u lu shin pev* la,We vande u ken tar u lun vaanaa la,’ kape Yehova a kaa la.
‘Hide ne mba ne kaan ner: “Ka unô vea sen vea va ta ityav sha a vese?
Shi ka unô vea va nyôr sha ajiir a ase?” la yô, fa nen ner,
14 Me na ne mtsaha u a kom sha aeren a en yô’+
Kape Yehova a kaa la.
‘Me nande ikyô na sha usu,Nahan ua hia akaa a a kase un cii.’”+
