Ukwelegh 1:1-22
א [Alefa ]*
1 Nenge er gar u yange lu a ior kpishi ne, a tem tswen hegen sha wono!+
Nenge imba er un u yange lu a ior kpishi ken akuraior ne, a hingir er kwasecôghol sha wono!+
Nenge imba er i kighir un u yange lu torkwase hen ikpentar* la a lu eren tom sha ican sha wono!+
ב [Beti ]
2 Ka a vaa tugh kpishi,+ mliam ma ndôôr un sha ahenge.
Ken ior mba a eren idya a ve la cii, or môm ngu u surun un ishima ga.+
Ahuraior a na cii va un ahenge;+ ve hingir mbahyomov nav.
ג [Gimel ]
3 I yem a Yuda uikyangen+ ngu za yan ican, shi ngu eren tom u kpan u vihin tsung.+
Una lu ken akuraior kpee je;+ ngu zuan a ijiir i memen ga.
Mba ve lu tôvon un a ican la cii kôr un hen shighe u a lu yan ican la.
ד [Daleti ]
4 Igbenda i yemen ken Shion ngi zungwen sha ci u or môm nan ngu van hen iniongo ga.+
Ihindagar na cii hingir gbilin;+ upristi nav mba shirin ishima.
Anuunaukase a na* nga zungwen, shi ishima nyian un tsung.
ה [He]
5 Mbaahendanev nav hingir mbavesen nav;*Kwagh gba mbahyomov nav sha kwagh na ga.+
Gadia Yehova va a ijungwen sha a na sha ci u atindi a a per kpishi la.+
Orhendankwagh kôr ônov nav yem a ve uikyangen.+
ו [Woo]
6 Icivir i wankwase u Shion cii bee.+
Mbahemenev nav mba er mbaashim mba ve zough a toho u yan ga nahan,Shi ve zende sha ishigh ki or u a lu zendan ve la ve vôr.
ז [Sayin]
7 Sha ayange a Yerusalem a lu yan ican, shi a lu a ijiir i tsan ga ne,A umbur akaainjaa a yange lu a mi sha ayange a tsuaa la cii.+
Shighe u ior nav gba sha ikyev i orhendankwagh shi lu a or u wasen ga la,+Mbaahendanev nenge a na se un* er a yôhôr yô.+
ח [Heti ]
8 Yerusalem er isholibo i vesen.+
Ka nahan ve a hingir kwagh u nyaghen ye.
Mba ngise ve naan un icivir la cii,Hegen ve nenge un ér ngu kwagh u ndôhôrshima, sha ci u ve nenge idyelegh na.+
Ngu kinen,+ a gema ishigh kera sha ihyeen.
ט [Teti ]
9 Hôngor ngu ken akondo a na.
A hen sha kwagh u mlu na u ken hemen ga.+
A gba kpilighyol; ngu a or môm u surun un ishima ga.
Yehova nenge ican yam, gadia orhyom kende a iyol na sha.+
י [Yodi ]
10 Orhendankwagh ver ave a na sha akaainjaa a na cii.+
Gadia a nenge akuraior nyôr hen icighanjiir na,+Ve mba u kaa wer ve̱ de nyer ken nongoior wou ga la.
כ [Kafi ]
11 Ior nav cii mba shirin ishima; mba keren kwaghyan.+
Ve gema akaainjaa a ve, ve na kera sha u vea zua a kwagh u vea ya, vea lu uma tseegh tsô yô.
Kenger mo, Yehova, nenge er m hingir gbilinkwase* yô.
ל [Lamedi ]
12 Ne mba ne lu karen sha gbenda la cii, kwagh gba ne sha kwagh ne gaa?
Kenger, nenge nen!
Ma mnyoon ngu u a lu er mnyoon u i tsaham a mi,U Yehova nam m ya ican sha iyange i ishima vihi un tsung la yôô?+
מ [Mem]
13 A tindi usu sen sha va nyôr ken akuhe a am,+ nahan a hembe a cii.
A samber kper hen angahar a am; a kighir mo m hide ijime.
A erem m hingir kwase u a lu tswen yô.
M ngu uange iyange jimin cii.
נ [Nun]
14 A kange atindi a am a peren er igbur nahan, a kange a imôngo a uwegh nagh.
I pendam a sha mon, nahan agee a am bee.
Yehova nam sha ikyev i ior mba me fatyô u hendan a ve ga yô.+
ס [Sameki ]
15 Yehova ker ior mba ageev mba ve lu hen atô wam la cii ve za gba keela.+
A yila ikpelaior va ta num sha a mo, sha u a tim agumaior a am yô.+
Yehova ndyar iniuunkwase i Yuda angahar shin ihyungwa i shoghor wain.+
ע [Ayin]
16 M ngu vaan sha ci u akaa ne;+ ashe a am ndôôr mliam.
Gadia hanma or u nana fatyô u surun mo ishima shin van mo a mpeveryol yô, nan ngu ica a mo.
Ônov av mba tswen sha ci u orhyom hemba.
פ [Pe]
17 Shion samber ave a na;+ or ngu u surun un ishima ga.
Yehova kaa a mbaahendanev mba ve kase Yakob la cii ér ve ta num sha a na.+
Yerusalem hingir ve kwagh u nyaghen.+
צ [Tsade]
18 Yehova ngu u perapera,+ gadia ka atindi a na m per ye.+
Kegh nen ato, ne ior cii, nenge nen mnyoon wam.
I yem a anuunaukase a am* man agumaior a am uikyangen.+
ק [Kofi ]
19 M yila mba m eren idya a ve la, kpa ve vam ahenge.+
Upristi av man mbatamen av tim ken gar,Shighe u ve lu keren kwaghyan u vea ya a lu uma la.+
ר [Reshi ]
20 Yehova, nenge er m lu ken ican kpishi yô.
Ikyav yav mbi ken atô mbi* zômon.
Ishima yam gema ker, sha ci u m hemba ato kpishi je.+
Sanker wua ônov av ken won;+ ken iyou kpa ior mba kpen.
ש [Shin]
21 Ior ungwa ishimashirin yam; kpa or ngu u surun mo ishima ga.
Mbahyomov av cii ungwa er kwagh a tserem yô.
Saan ve iyol, sha ci u ka we u ve a mi ye.+
Kpa vea hingir er mo nahan,+ shighe u u va a iyange i u yôô la.+
ת [Towi ]
22 Kwaghbo ve cii a̱ va u sha ishi, nahan er a ve caveraa,+Vough er u er a mo caveraa sha ci u atindi a m per cii la nahan.
Gadia ishimashirin yam ngee, shi ishima yam ngi uange.
Ngeren mba shin kpe
^ I nger atsam a zungwen ken ityough 1-4 sha asangaabaacaa a ken zwa Heberu, shin sha gbenda u aluer i zua ishangebaacaa i sha hanma hwange yô, a hingir itikwagh yô.
^ Shin “uipyaventar.”
^ Shin “Agumaukase a na.”
^ Zwa Heberu, “ityough nagh.”
^ Shin “ember.”
^ Ka Yerusalem i yer un nahan sha injakwagh ye.
^ Shin “agumaukase a am.”
^ Zwa Heberu, “myam am ma.”
