Dala ruma ita sente ema halo diskriminasaun ba ita ka lae, hanesan ema lakohi ajuda ita ka la gosta ita tan deʼit ita-nia rasa, kulit, ka ita-nia pozisaun iha komunidade? Tuir loloos, ema barak mós sente hanesan neʼe. Maski ida-neʼe akontese beibeik iha rai, maibé Maromak la hanesan neʼe. Ita kontente atu hatene katak “Maromak la fihir ema”. Apóstolu Pedro temi liafuan neʼe ho laran-metin.—Lee Apostolu 10:34, 35.

Maibé Pedro temi liafuan sira-neʼe iha situasaun úniku. Nia iha ema jentiu ida naran Cornélio nia uma. Tanbasá mak ida-neʼe úniku? Tanba apóstolu Pedro mak ema judeu, no nia moris iha tempu neʼebé ema judeu sira haree ema jentiu nuʼudar la moos no la bele ransu ho sira. Se nuneʼe, tanbasá mak Pedro iha Cornélio nia uma? Neʼe tanba Maromak Jeová mak hakarak sira atu hasoru malu. Apóstolu Pedro simu vizaun ida husi Maromak, no Maromak dehan ba nia: “Buat neʼebé Maromak hamoos tiha ona, ó labele bolu fali foʼer.” Loron ida antes neʼe, Cornélio mós simu vizaun ida. Iha vizaun neʼe anju ida haruka Cornélio atu bolu Pedro mai. Maibé Pedro la hatene kona-ba neʼe. (Apostolu 10:1-15) Kuandu Pedro hatene katak neʼe mak Maromak Jeová nia planu, ida-neʼe book nia atu koʼalia ho Cornélio.

Pedro hatete: “Tebes duni, haʼu haree katak Maromak la fihir ema.” (Apostolu 10:34) Matenek-naʼin ida kona-ba Bíblia koʼalia kona-ba liafuan gregu neʼebé tradús nuʼudar “la fihir ema”. Nia hatete katak liafuan neʼe uza atu koʼalia kona-ba juis neʼebé tesi lia ba mane ida tuir buat neʼebé nia haree husi mane neʼe, duké tuir buat neʼebé akontese duni. Maromak la fihir ema tan deʼit ema nia rasa, rai, pozisaun, ka buat seluk neʼebé bele haree husi liʼur.

Duké halo hanesan neʼe, Maromak Jeová haree buat neʼebé iha ita-nia laran. (1 Samuel 16:7; Provérbios [Amsal] 21:2) Apóstolu Pedro hatete tuirmai: “Iha nasaun hotu, Maromak simu hotu ema sira neʼebé taʼuk Nia no halo hahalok neʼebé loos.” (Apostolu 10:35) Atu taʼuk Maromak, neʼe katak ita hatudu respeitu ba nia, hafolin nia, no tau fiar ba nia. Ita mós sei la halo buat ida neʼebé halo Maromak triste. Halo hahalok neʼebé loos, mak ita hakarak atu halo buat neʼebé loos tuir Maromak nia haree. Ema neʼebé hatudu hahalok hanesan neʼe no iha respeitu kleʼan ba Maromak, mak ema neʼebé Maromak gosta.—Deuteronômio (Ulangan) 10:12, 13.

Se dala ruma ema hatudu hahalok la diʼak ba ita hodi fihir ema, ita bele sente kmaan hodi hanoin kleʼan Pedro nia liafuan sira kona-ba Maromak. Maromak Jeová halibur daudaun ema husi nasaun hotu-hotu atu adora nia iha dalan neʼebé loos. (Joao 6:44; Apostolu 17:26, 27) Nia rona ema naran deʼit nia orasaun, ema husi rasa oioin, rai, no pozisaun oioin. (1 Reis [Raja-Raja] 8:41-43) Ita bele fiar katak, kuandu Maromak Jeová haree ba ema, nia la fihir rasa ida deʼit, maibé simu ema husi rasa hotu. Ida-neʼe book ita atu aprende liután kona-ba Maromak neʼebé la fihir ema, loos ka lae?