Primeiru Reis 8:1-66

  • Lori Arka ba templu laran (1-13)

  • Salomão koʼalia ba povu (14-21)

  • Salomão hatoʼo orasaun atu inaugura templu (22-53)

  • Salomão haraik bensaun ba povu (54-61)

  • Sakrifísiu no festa inaugurasaun (62-66)

8  Iha tempu neʼebá Salomão halibur+ Izraél nia katuas sira, neʼe katak ulun-naʼin hotu husi suku sira no xefe sira husi ema Izraél nia umakain.+ Sira mai hasoru Liurai Salomão iha Jeruzalein atu muda* Jeová nia Arka Aliansa nian husi David nia Sidade,+ neʼe katak Siaun,+ hodi saʼe ba templu.  Mane Izraél hotu halibur hamutuk iha Liurai Salomão nia oin iha loron festa* iha fulan-Etanim,* neʼe katak fulan-hitu.+  Nuneʼe Izraél nia katuas hotu mai, no amlulik sira komesa hulan Arka.+  Sira muda Jeová nia Arka, tenda reuniaun nian+ no sasán santu hotu iha tenda neʼe hodi lori ba templu. Amlulik no ema Levi sira mak lori buat sira-neʼe.  Liurai Salomão no povu Izraél tomak, neʼebé liurai bolu mai atu hasoru nia, sira hamriik iha Arka nia oin. Sira hasaʼe bibi-malae no karau barak nuʼudar sakrifísiu+ toʼo labele sura.  Tuirmai amlulik sira lori Jeová nia Arka Aliansa nian hodi tau iha ninia fatin+ iha kerubín nia liras okos, iha kuartu iha templu nia laran liu, neʼe katak Fatin Santu Liu Hotu.+  Nuneʼe kerubín sira-nia liras nakloke iha fatin neʼebé tau Arka bá, kerubín nia liras hamahon Arka no Arka nia ai-loos sira atu hiʼit.+  Ai-loos sira-neʼe+ naruk tebes toʼo ninia tutun bele haree-hetan husi Fatin Santu neʼebé iha Fatin Santu Liu Hotu* nia oin, maibé labele haree-hetan husi liʼur. Arka no ninia ai-loos sira sei iha neʼebá toʼo ohin loron.  Iha Arka laran iha deʼit fatuk-belar rua+ neʼebé Moisés tau+ iha Horeb, iha tempu neʼebé Jeová halo aliansa+ ho povu Izraél bainhira sira sai tiha husi rai-Ejitu.+ 10  Bainhira amlulik sira sai husi fatin santu neʼe, Jeová nia uma sai nakonu ho kalohan.+ 11  Amlulik sira labele kontinua halo serbisu tanba kalohan neʼe, tanba Jeová nia glória nakonu iha Jeová nia uma.+ 12  Ho ida-neʼe, Salomão hatete: “Oh Jeová, uluk Ita-Boot dehan katak Ita hela iha kalohan metan.+ 13  Haʼu harii ona uma kmanek ida ba Ita ho susesu, neʼe mak fatin ba Ita atu hela ba nafatin.”+ 14  Tuirmai liurai fila oin no komesa haraik bensaun ba kongregasaun* Izraél tomak neʼebé hamriik hela.+ 15  Salomão dehan: “Fó hahiʼi ba Jeová, Izraél nia Maromak, tanba nia promete ho nia ibun rasik ba haʼu-nia aman David, no nia kumpre ona ho ninia liman rasik. Nia dehan: 16  ‘Husi loron neʼebé haʼu lori haʼu-nia povu Izraél sai husi rai-Ejitu, haʼu seidauk hili sidade ida iha Izraél nia suku sira-nia leet hodi harii uma ida atu lori haʼu-nia naran,+ maibé haʼu hili ona David atu tau matan ba haʼu-nia povu Izraél.’ 17  Uluk haʼu-nia aman David hakarak tebes atu harii uma ida ba Izraél nia Maromak Jeová nia naran.+ 18  Maibé Jeová hatete ba haʼu-nia aman David: ‘Ó hakarak tebes atu harii uma ida ba haʼu-nia naran, no neʼe mak hakarak neʼebé diʼak loos. 19  Maibé ó sei la harii uma neʼe, ó-nia oan-mane neʼebé sei moris mak sei harii uma ida ba haʼu-nia naran.’+ 20  Jeová kumpre ninia promesa, tanba haʼu mak troka ona haʼu-nia aman David no haʼu tuur iha kadunan nuʼudar liurai iha Izraél, hanesan Jeová promete ona. Haʼu mós harii ona uma ida atu fó glória ba Izraél nia Maromak Jeová nia naran,+ 21  no iha neʼebá haʼu tau ona Arka neʼebé iha fatuk-belar rua iha laran, katak aliansa+ neʼebé Jeová halo ona ho ita-nia beiʼala sira bainhira nia lori sira sai husi rai-Ejitu.” 22  Tuirmai Salomão hamriik iha Jeová nia altár oin neʼebé iha kongregasaun Izraél hotu nia oin, no nia loke ninia liman ba lalehan,+ 23  hodi dehan: “Oh Jeová, Izraél nia Maromak, la iha Maromak ida mak hanesan Ita-Boot+ iha lalehan no iha rai, Ita kumpre aliansa no hatudu domin neʼebé laran-metin+ ba Ita-nia atan sira neʼebé adora Ita ho laran tomak.*+ 24  Ita kumpre ona promesa neʼebé Ita halo ho Ita-nia atan David, haʼu-nia aman. Ita promete ho Ita-nia ibun rasik, no ohin Ita kumpre ona ida-neʼe ho Ita-nia liman rasik.+ 25  Agora, oh Jeová, Izraél nia Maromak, favór ida, kumpre promesa neʼebé Ita halo ona ho Ita-nia atan David, haʼu-nia aman. Uluk Ita-Boot dehan: ‘Se ó-nia oan-mane sira kuidadu didiʼak sira-nia hahalok iha haʼu-nia oin, hanesan ó halo* ona iha haʼu-nia oin,+ entaun sei iha nafatin mane ida husi ó-nia jerasaun neʼebé sei tuur iha kadunan atu ukun Izraél.’ 26  Agora, oh Izraél nia Maromak, favór ida, halo tuir Ita-nia promesa neʼebé Ita halo ona ho Ita-nia atan David, haʼu-nia aman. 27  “Maibé, Maromak sei hela duni iha rai ka lae?+ Lalehan, sin, lalehan neʼebé aas liu mós la toʼo atu sai Ita-nia hela-fatin,+ sá tan ho uma neʼebé haʼu harii ona ba Ita!+ 28  Agora, oh Jeová haʼu-nia Maromak, favór ida rona Ita-nia atan nia orasaun atu husu laran-diʼak, no rona Ita-nia atan nia halerik atu husu ajuda, no orasaun neʼebé Ita-nia atan hasaʼe daudaun ba Ita ohin. 29  Haʼu hein katak Ita-nia matan sei hateke ba uma neʼe loron no kalan, ba fatin neʼebé Ita dehan: ‘Haʼu-nia naran sei iha neʼebá’,+ no rona orasaun neʼebé Ita-nia atan halo hodi hateke ba fatin neʼe.+ 30  Favór ida, rona ba Ita-nia atan neʼebé husu laran-sadiʼa no mós rona ba Ita-nia povu Izraél bainhira sira halo orasaun hodi hateke ba fatin neʼe, no favór ida, rona sira husi Ita-nia hela-fatin iha lalehan.+ Sin, rona sira no fó perdua ba sira.+ 31  “Se mane ida halo sala kontra ninia maluk no mane neʼe tenke halo juramentu* no bainhira nia sei iha hela juramentu* neʼe nia okos, no nia mai iha Ita-nia altár oin iha uma neʼe hodi harohan,+ 32  favór ida rona husi lalehan no tesi-lia ba Ita-nia atan sira hodi fó sai katak ema aat mak halo ona sala* no halo nia lori todan ba ninia sala rasik, no hodi fó sai katak ema laran-loos mak la halo sala no fó kolen ba nia tuir ninia hahalok loos.+ 33  “Se inimigu manán Ita-nia povu Izraél tanba sira kontinua halo sala kontra Ita,+ maibé sira fila fali ba Ita no fó glória ba Ita-nia naran+ no halo orasaun hodi husu laran-sadiʼa husi Ita iha uma neʼe,+ 34  favór ida rona ba sira husi lalehan no perdua Ita-nia povu Izraél nia sala no lori sira fila fali ba rai neʼebé Ita fó ona ba sira-nia beiʼala.+ 35  “Se lalehan mak taka tiha no la iha udan+ tanba sira kontinua halo sala kontra Ita,+ maibé sira halo orasaun hodi hateke ba fatin neʼe no fó glória ba Ita-nia naran no husik tiha sira-nia sala tanba Ita kastigu* ona sira,+ 36  favór ida rona ba sira husi lalehan no perdua Ita-nia atan sira-nia sala, Ita-nia povu Izraél nia sala, tanba Ita sei hanorin sira+ kona-ba dalan neʼebé diʼak atu sira tenke laʼo tuir. Favór ida halo udan tun ba Ita-nia rai+ neʼebé Ita fó ona nuʼudar liman-rohan ba Ita-nia povu. 37  “Se mosu hamlaha boot iha rai neʼe,+ ka moras-peste,* anin neʼebé manas, kulapur,+ gafañotu lubun boot, ka gafañotu neʼebé estraga buat barak, ka se sira-nia inimigu halo serku ba sira-nia sidade ida iha rai neʼe ka se susar no moras naran deʼit mosu,+ 38  ka se Ita-nia povu Izraél tomak ka ema ida-idak halo orasaun atu husu Ita-nia laran-sadiʼa,+ ka orasaun hotu neʼebé sira hasaʼe, tanba sira ida-idak hatene sira-nia terus iha sira-nia laran,+ no kuandu sira loke sira-nia liman ba uma neʼe, 39  favór ida rona ba sira husi Ita-nia hela-fatin iha lalehan,+ fó perdua ba sira-nia sala+ no ajuda sira. Fó kolen ba ema ida-idak tuir sira-nia hahalok hotu,+ tanba Ita hatene sira-nia laran. Ita mesak deʼit mak hatene ho loloos ema ida-idak nia laran.+ 40  Hodi nuneʼe, sira sei hamtaʼuk Ita durante tempu hotu neʼebé sira moris iha rai neʼebé Ita fó ona ba ami-nia beiʼala sira. 41  “No mós se ema estranjeiru neʼebé laʼós parte ba Ita-nia povu Izraél mai husi rai dook tanba Ita-nia naran,*+ 42  (tanba sira sei rona kona-ba Ita-nia naran neʼebé boot+ no Ita-nia liman neʼebé forte no liman neʼebé iha kbiit) no sira mai halo orasaun hodi hateke ba uma neʼe, 43  favór ida rona husi Ita-nia hela-fatin iha lalehan,+ no kumpre buat hotu neʼebé ema estranjeiru husu ba Ita, atu nuneʼe ema hotu iha mundu bele hatene Ita-nia naran no hamtaʼuk Ita+ hanesan ho Ita-nia povu Izraél, no atu sira bele hatene katak uma neʼe neʼebé haʼu harii ona mak lori Ita-nia naran. 44  “Oh Jeová, se Ita-Boot haruka Ita-nia povu atu bá fatin ruma atu halo funu hasoru sira-nia inimigu,+ no sira halo orasaun+ ba Ita hodi hateke ba sidade neʼe, neʼebé Ita hili ona+ no ba uma neʼebé haʼu harii ona ba Ita-nia naran,+ 45  favór ida rona ba sira-nia orasaun husi lalehan no rona ba sira-nia liafuan atu husu laran-sadiʼa no lori justisa ba sira. 46  “Se sira halo sala hasoru Ita, tanba la iha ema ida mak la halo sala,+ no Ita sai hirus hasoru sira no husik inimigu manán sira, no inimigu kaer sira no lori sira ba dadur iha inimigu nia rai neʼebé dook ka besik,+ 47  no sira arrepende an iha rai neʼebé sira sai nuʼudar dadur,+ no sira fila fali ba Ita+ hodi husu Ita-nia laran-sadiʼa iha inimigu nia rai,+ hodi dehan: ‘Ami halo ona sala, ami halo buat neʼebé la loos no hatudu ona hahalok aat’,+ 48  no sira fila fali ba Ita ho sira-nia laran tomak+ no ho sira-nia moris tomak iha rai neʼebé sira-nia inimigu lori sira bá nuʼudar dadur, no sira halo orasaun ba Ita hodi hateke ba sira-nia rai neʼebé Ita fó ona ba sira-nia beiʼala no hateke ba sidade neʼebé Ita hili ona no ba uma neʼebé haʼu harii ona ba Ita-nia naran,+ 49  favór ida rona sira-nia orasaun husi Ita-nia hela-fatin iha lalehan,+ no rona ba sira-nia liafuan atu husu laran-sadiʼa no lori justisa ba sira 50  no perdua Ita-nia povu neʼebé halo ona sala hasoru Ita, perdua sira-nia sala hotu neʼebé sira halo ona. Ita sei halo sira-nia inimigu hanoin sira, no inimigu sei hanoin duni sira+ 51  tanba sira mak Ita-nia povu no Ita-nia liman-rohan+ neʼebé Ita lori sai husi rai-Ejitu+ neʼebé hanesan ahi-matan atu halo besi nabeen.+ 52  Favór ida, loke Ita-nia matan no rona ba Ita-nia atan nia orasaun atu husu laran-sadiʼa+ no rona ba Ita-nia povu Izraél nia orasaun atu husu laran-sadiʼa iha tempu naran deʼit neʼebé sira bolu Ita.*+ 53  Tanba Ita hili ona sira nuʼudar Ita-nia liman-rohan husi nasaun hotu iha mundu,+ hanesan Ita fó sai ona liuhusi Ita-nia atan Moisés bainhira Ita lori ami-nia beiʼala sira sai husi rai-Ejitu, oh Jeová, Naʼi Ukun-Naʼin Boot Liu.” 54  Bainhira Salomão remata ona ninia orasaun ba Jeová hodi husu laran-sadiʼa, Salomão hamriik husi Jeová nia altár oin, husi fatin neʼebé nia hakneʼak hodi foti saʼe ninia liman ba lalehan.+ 55  Depois neʼe, nia hamriik no haraik bensaun ba kongregasaun Izraél tomak ho lian makaʼas, hodi dehan: 56  “Fó hahiʼi ba Jeová neʼebé fó ona hela-fatin neʼebé hakmatek ba ninia povu Izraél, hanesan nia promete ona.+ Husi promesa diʼak hotu neʼebé nia halo ona liuhusi ninia atan Moisés, la iha ida mak la sai loos.+ 57  Jeová, ita-nia Maromak, sei hamutuk ho ita hanesan nia hamutuk ho ita-nia beiʼala sira.+ Nia sei la hadook an no la husik hela ita.+ 58  Nia sei halo ita-nia laran hadomi nia,+ atu laʼo iha ninia dalan hotu no halo tuir ninia mandamentu, ninia ukun-fuan no ninia desizaun sira, neʼebé nia haruka ona ba ita-nia beiʼala sira atu halo tuir. 59  Haʼu hein katak haʼu-nia liafuan neʼebé haʼu husu ba Jeová atu hatudu laran-sadiʼa sei besik nafatin ba Jeová, ita-nia Maromak, loron no kalan, atu nuneʼe nia bele hatudu justisa ba ninia atan no ba ninia povu Izraél loroloron tuir sira-nia presiza, 60  atu nuneʼe ema hotu iha mundu bele hatene katak Jeová mak Maromak neʼebé loos.+ La iha Maromak seluk!+ 61  Tan neʼe imi tenke serbí* Jeová, ita-nia Maromak, ho laran tomak+ hodi halo tuir ninia ukun-fuan no mandamentu sira hanesan iha loron neʼe.” 62  Liurai no ema Izraél hotu hasaʼe sakrifísiu barak tebes ba Jeová.+ 63  Salomão hasaʼe sakrifísiu dame nian+ ba Jeová, hanesan tuirmai neʼe: Nia hasaʼe karau 22.000 no bibi-malae 120.000. Ho ida-neʼe mak liurai no ema Izraél hotu inaugura Jeová nia uma.+ 64  Iha loron neʼebá liurai presiza halo santu pátiu* nia klaran neʼebé iha Jeová nia uma oin, nia hasaʼe sakrifísiu sunu nian, sakrifísiu trigu* nian no naʼan bokur husi sakrifísiu dame nian iha neʼebá tanba altár husi riti+ neʼebé iha Jeová nia oin mak kiʼik liu atu uza hodi hasaʼe sakrifísiu sunu nian, sakrifísiu trigu nian no naʼan bokur+ husi sakrifísiu dame nian. 65  Iha tempu neʼebá Salomão hamutuk ho ema Izraél hotu halo festa.+ Kongregasaun boot husi Lebo-Hamat* toʼo Uádi* Ejitu+ mai selebra festa neʼe. Sira halaʼo festa neʼe iha ita-nia Maromak Jeová nia oin ba loron 7 no tuirmai loron 7 tan, sura hamutuk loron 14. 66  Iha loron tuirmai,* nia haruka povu sira fila, no sira fó bensaun ba liurai no fila ba sira-nia uma ho haksolok no laran-kontente tanba Jeová hatudu ona laran-diʼak+ ba ninia atan David no ba ninia povu Izraél.

Nota-rodapé

Ka “lori saʼe”.
Neʼe katak Festa Barraka nian.
Orj., “kuartu iha laran liu”.
Orj., “atan sira neʼebé laʼo ho laran tomak iha Ita-nia oin”.
Orj., “laʼo”.
Ka “no ninia maluk fó-malisan ba nia”. Neʼe katak nia sei hetan malisan se nia jura falsu ka kontra ninia juramentu.
Orj., “malisan”.
Orj., “aat”.
Ka “hamoe”.
Ka “reputasaun”.
Ka “rona ba buat naran deʼit neʼebé Ita-nia povu Izraél husu ba Ita”.
Ka “hadomi”.
Neʼe bele refere mós ba sevada. Haree “Sakrifísiu trigu nian” iha Glosáriu.
Ka “fatin atu tama ba Hamat”.
Orj., “loron ualu”. Neʼe katak liutiha loron 14.