Deuteronómio 10:1-22

  • Halo fali fatuk-belar rua (1-11)

  • Buat neʼebé Jeová hakarak ema Izraél atu halo (12-22)

    • Hamtaʼuk no hadomi Jeová (12)

10  “Iha tempu neʼebá, Jeová dehan mai haʼu: ‘Ó rasik bahat fatuk-belar rua hanesan fatuk-belar uluk nian,+ no saʼe mai hasoru haʼu iha foho neʼe; no ó mós tenke halo arka* ida husi ai.  No haʼu sei hakerek iha fatuk-belar sira-neʼe liafuan hotu neʼebé iha fatuk-belar uluk nian neʼebé ó harahun ona, no ó tenke tau fatuk-belar sira-neʼe iha arka neʼe nia laran.’  Entaun haʼu halo arka ida husi ai-akásia no bahat fatuk-belar rua hanesan fatuk-belar uluk nian no haʼu saʼe ba foho neʼe hodi lori mós fatuk sira-neʼe iha haʼu-nia liman.+  Tuirmai nia hakerek iha fatuk-belar sira-neʼe liafuan hotu neʼebé nia hakerek uluk,+ katak Ukun-Fuan Sanulu,*+ neʼebé Jeová fó sai ona ba imi iha foho neʼe husi ahi laran+ iha tempu neʼebé povu halibur hamutuk;+ no Jeová fó buat sira-neʼe ba haʼu.  Depois neʼe, haʼu fila no tun husi foho.+ Tuirmai haʼu tau fatuk-belar sira-neʼe iha arka neʼebé haʼu halo ona, no buat sira-neʼe rai hela iha neʼebá toʼo agora, hodi halo tuir mandamentu neʼebé Jeová fó sai ona mai haʼu.  “Tuirmai ema Izraél sai husi Beerot Bene-Jakan hodi bá Mosera. Iha neʼebá mak Arão mate no hakoi tiha,+ no ninia oan-mane Eleazar hahú serbí nuʼudar amlulik hodi troka ninia fatin.+  No sira sai husi neʼebá hodi bá Gudgoda, no husi Gudgoda sira bá Jotbata,+ neʼe mak rai neʼebé iha bee-dalan barak.  “Iha tempu neʼebá, Jeová haketak suku Levi+ hodi halaʼo knaar atu lori Jeová nia Arka Aliansa nian,+ atu hamriik iha Jeová nia oin hodi serbí nia, no atu fó bensaun ba povu hodi ninia naran,+ hanesan sira halo toʼo ohin loron.  Tan neʼe mak Levi la hetan parte no la simu liman-rohan hanesan ho ninia maun-alin sira. Jeová mak ninia liman-rohan,* hanesan Jeová, imi-nia Maromak, hatete ona ba nia.+ 10  No haʼu hela mesak iha foho leten durante loron 40 no kalan 40+ hanesan haʼu halo uluk, no iha tempu neʼebá Jeová mós rona mai haʼu.+ Jeová lakohi halakon imi. 11  Tuirmai Jeová dehan ba haʼu: ‘Laʼo iha povu neʼe nia oin, no prepara atu sai husi neʼe, hodi nuneʼe sira bele tama no foti rai neʼebé haʼu jura ona ba sira-nia beiʼala atu fó ba sira.’+ 12  “Agora, oh ema Izraél, saida mak Jeová, imi-nia Maromak, husu ba imi?+ Nia husu deʼit buat tuirmai neʼe: atu imi hamtaʼuk Jeová, imi-nia Maromak,+ atu laʼo iha ninia dalan hotu,+ atu hadomi nia, atu serbí Jeová, imi-nia Maromak, ho imi-nia laran tomak no ho imi-nia moris tomak,+ 13  no atu halo tuir Jeová nia mandamentu no ukun-fuan sira neʼebé haʼu fó sai ba imi ohin, tanba neʼe ba imi-nia diʼak.+ 14  Haree bá, lalehan mak imi-nia Maromak Jeová nian, neʼe inklui mós lalehan neʼebé aas liu, no rai hamutuk ho buat hotu neʼebé iha rai laran mak ninian.+ 15  Maibé Jeová hakbesik ba imi-nia beiʼala sira deʼit no nia hatudu ninia domin ba sira, no nia hili ona sira-nia bei-oan,+ neʼe mak imi, husi povu hotu nia leet, no imi sai ona ninian hanesan agora. 16  Agora imi tenke hamoos* imi-nia laran+ no labele ulun-toos nafatin.+ 17  Tanba Jeová, imi-nia Maromak, mak Maromak neʼebé aas liu maromak sira seluk,+ no Naʼi neʼebé aas liu naʼi sira seluk. Nia mak Maromak neʼebé boot, iha kbiit, no kmanek tebes,* neʼebé la todan ba sorin+ no la simu prezente hodi bobar lia-loos. 18  Nia tesi-lia ho loloos hodi defende oan-kiak* no feto-faluk sira,+ no nia hadomi ema estranjeiru+ hodi fó ai-han no hatais. 19  Imi mós tenke hadomi ema estranjeiru, tanba uluk imi hela iha rai-Ejitu nuʼudar ema estranjeiru.+ 20  “Imi tenke hamtaʼuk Jeová, imi-nia Maromak, no imi tenke serbí deʼit nia,+ no kaer metin deʼit ba nia, no imi tenke jura deʼit hodi ninia naran. 21  Imi tenke hahiʼi deʼit ba nia.+ Nia mak imi-nia Maromak, neʼebé halo ona buat boot no buat kmanek hotu ba imi,* no imi haree ona buat sira-neʼe ho imi-nia matan rasik.+ 22  Bainhira imi-nia beiʼala sira muda ba rai-Ejitu,+ sira hamutuk ema* naʼin-70 deʼit, no agora Jeová, imi-nia Maromak, halo imi sai barak ona hanesan fitun iha lalehan.+

Nota-rodapé

Ka “kaixote”.
Orj., “Liafuan Sanulu”.
Ka “Jeová sei tau matan ba ninia presiza”.
Orj., “halo sirkunsizaun ba”.
Ka “no merese atu ema hamtaʼuk”.
Ka “labarik neʼebé la iha aman”.
Ka “no halo ba imi buat neʼebé merese atu ema hamtaʼuk”.