Wi e pruberi fu sori lobi nanga switi fasi gi ala sma èn fu lespeki den. Efu wan fu den Yehovah Kotoigi no e dini Gado fayafaya moro noso stop fu dini en, dan wi e langa wan anu gi en fu sori en taki un lobi en. Wi e pruberi tu fu yepi en fu abi wan bun matifasi baka nanga Gado.​—Lukas 15:4-7.

 Na ini son situwâsi wan sani di wan sma e du, kan sorgu taki a musu puru fu a gemeente (1 Korentesma 5:13). Ma fu sori taki un lobi den sma ini a gemeente trutru, wi e suku fu yepi den so taki den no puru fu a gemeente. Èn efu toku a puru fu a gemeente dan toku wi e sori lobi nanga lespeki gi en soleki fa Bijbel e sori wi fu du.​—Markus 12:31; 1 Petrus 2:17.

San kan meki taki wan sma musu puru fu a gemeente?

 Bijbel e sori taki efu wan Kresten du wan bigi sondu èn a no wani kenki, dan a musu puru fu a gemeente a (1 Korentesma 5:11-13). A Bijbel e sori sortu bigi sondu kan meki taki wan sma kan puru fu a gemeente. Fu eksempre, te wan sma waka gi en trowpatna, wan sma di e drungu, sma san e kiri sma, sma di e libi wreed nanga den osofamiri, nanga fufurman.​—1 Korentesma 6:9, 10; Galasiasma 5:19-21; 1 Timoteyus 1:9, 10.

 Ma wi no e puru wan sma fu a gemeente wantewante te a du wan bigi sondu. A fosi sani na taki den gemeente owruman b o suku fu yepi en meki a kenki a fasi fa a e tyari en srefi (Romesma 2:4). Den o pruberi nanga wan switifasi en nanga wan safri fasi fu wini en ati (Galasiasma 6:1). Nanga a fasi disi a sondu sma kan si taki a meki wan fowtu èn a kan sori berow (2 Timoteyus 2:24-26). Efu baka te den brada pruberi fu yepi en omeni leisi a e tan tranga yesi den wet fu bijbel èn no e sori berow dan un musu puru en fu a gemeente. Den owruman e taigi a gemeente taki a sma disi no de wan Kotoigi fu Yehovah moro.

 Sortu bun bakapisi a abi te un puru wan sma fu a gemeente te a e tan du wan ogri? Wan bakapisi na taki a gemeente e hori den wet hei di e taki fa wi musu tyari un srefi. Na so fasi a sma no kan pori a gemeente (1 Korentesma 5:6; 15:33; 1 Petrus 1:16). Ete wan bakapisi na taki a sma kan tapu nanga na ogri di a ben du èn tyari kenki kon di ben de fanowdu.​—Hebrewsma 12:11.

Fa Yehovah Kotoigi e behandel sma di puru fu a gemeente?

 Bijbel e taki dati Kresten „no musu bemui” nanga wan sma di puru fu a gemeente. Den „no musu nyan srefi” nanga so wan sma (1 Korentesma 5:11). Fu dati ede wi no abi demakandra nanga wan sma di puru fu a gemeente. Ma wi no e du neleki unu no e si en kwetkweti. Wi e behandel en nanga lespeki. A de welkom fu kon na den konmakandra fu wi. Na den konmakandra fu wi den Yehovah Kotoigi mag gi en odi. c A mag aksi den owruman fu yepi en fu de wan pisi baka fu a gemeente.

 Ma san wi e du te wan sma di puru fu a gemeente abi wan trowpatna noso pkin di de Yehovah Kotoigi? Awinsi fa a no e dini Yehovah moro nanga en osofamiri toku den de famiri ete.Fu di en nanga en frow nanga den pkin de wan osofamiri ete den abi wan relatie èn den musu sori lobi gi makandra ete

 Wan sma di puru fu a gemeente kan aksi den owruman fu den kon luku en, èn fu gi en Bijbel rai. Na wan switi fasi den o gi en dek’ati fu abi berow èn fu drai kon baka na Gado (Sakaria 1:3). Efu a stop nanga den ogri fu èn a e sori taki a wani libi leki fa Bijbel e taki dan a de welkom fu de wan pisi fu a gemeente baka. A gemeente „musu gi en pardon nanga den heri ati èn trowstu en,” neleki fa den Kresten fu Korente ben du di a man di ben sondu kenki den fasi fu en.​—2 Korentesma 2:6-8.

Fa den sma ben firi di ben puru fu a gemeente?

 Luku san wan tu Yehovah Kotoigi di ben puru fu a gemeente èn di drai kon baka na Gado e taki.

 „Di mi besroiti fu drai kon baka na ini a gemeente mi ben denki taki den owruman ben wani sabi ala sani di ben psa na ini den yari san psa di mi ben puru fu a gemeente. Na presi fu dati den taigi mi dati mi musu luku go na fesi. Baka dati mi ben kisi wan korostu firi.”​—Maria, Amerkankondre.

 „A gemeente ben breiti taki mi drai kon baka. Mi ben firi warti. Den Kresten brada nanga sisa yepi mi meki mi firi taki Yehovah gi mi pardon. Ala ten den owruman ben yepi mi fu abi wan bun matifasi nanga Yehovah. Den trowstu mi èn den yepi mi fu si taki mi prenspari gi Yehovah èn taki a lobi mi.”​—Malcom, Sierra Leone.

 „Mi breiti taki fu di Yehovah lobi en pipel meki a e sorgu taki a e hori en organisâsi krin. A kan taki dati den sma na dorosei e feni taki disi na wan wreed sani fu du. Ma a de prenspari èn na wan lob’ati sani fu den. Mi de nanga tangi dati un hemel Papa na wan lob’ati Papa èn taki a de wan Gado di e gi sma pardon.”​—Sandi, Amerkankondre.