A fosi brifi gi den Korentesma 6:1-20
6 Kow taki dati wan fu unu abi wan trobi nanga wan trawan. A sma dati ben o abi a dek’ati fu tyari a trawan go na fesi krutuman di no de na bribi, na presi fu tyari en go na fesi den santawan?
2 Unu no sabi taki na den santawan o krutu grontapu? We, efu na unu o krutu grontapu, dan fu san ede unu no man krutu pkinpkin tori?
3 Unu no sabi taki wi o krutu den engel? Dan wi musu man krutu den tori fu a libi disi tu tòg?
4 Efu unu musu krutu den tori fu a libi disi, dan fu san ede unu e meki sma di a gemeente no feni bun, tron un krutuman?
5 Mi e taki disi fu meki unu firi syen. Nowan koni man no de na un mindri, di man koti krutu na mindri den brada fu en?
6 Tòg a wan brada e tyari a trawan go na fesi krutu, so taki sma di no de na bribi kan koti krutu gi den!
7 Mi e taigi unu, efu unu e tyari makandra go na fesi krutu, dan unu lasi kba. Fu san ede unu no e libi a trawan fu du ogri nanga unu? Fu san ede unu no e libi a trawan fu bedrigi unu?
8 Na presi fu dati, na unu e du ogri nanga trawan èn na unu e bedrigi trawan. Unu e du dati nanga un brada srefi!
9 Unu no sabi taki ogrisma no o kisi a Kownukondre fu Gado? No kori unsrefi. Sma di e huru,* sma di e anbegi falsi gado, sma di e waka gi den trowpatna, mansma di e poti densrefi fu tra mansma abi seks nanga den, mansma di e d’don nanga tra mansma,
10 fufurman, gridiman, drunguman, sma di e kosi trawan, nanga sma di e puru sani na tra sma anu nanga tranga no o kisi a Kownukondre fu Gado.
11 Tòg sonwan fu unu ben e du den sani disi. Ma Gado wasi unu kon krin, a meki unu kon santa èn a e si unu leki ret’ati sma na ini a nen fu wi Masra Yesus Krestes èn nanga a yeye fu Gado.
12 Mi kan du ala sani, ma a no ala sani bun fu du. Mi kan du ala sani, ma mi no o meki nowan sani basi mi.
13 N’nyan na gi a bere èn a bere na gi n’nyan, ma Gado o meki ala tu kon tron noti. A skin no meki fu huru,* ma na fu du a wroko fu Masra, èn Masra e sorgu a skin.
14 Gado ben gi Masra libi baka èn a o gi wi libi baka tu nanga a krakti fu en.
15 Unu no sabi taki un skin na wan pisi fu a skin fu Krestes? We, mi musu puru den pisi fu Krestes skin fu meki den tron pisi fu a skin fu wan huru-uma? Kwetkweti!
16 Unu no sabi taki a sma di abi seks nanga wan huru-uma de wán skin nanga en? Bika „den tu sma dati o de wán skin”, na so Gado taki.
17 Ma a sma di de wán nanga Masra, abi a srefi denki leki en.
18 Lowe gi hurudu!* Ibri tra sondu di wan sma kan du, a no wan sondu teige en skin. Ma a sma di e huru, e sondu teige en eigi skin.
19 Unu no sabi taki a skin fu unu na a tempel fu a santa yeye di de na ini unu èn di unu kisi fu Gado? Boiti dati, unu a no fu unsrefi,
20 bika di Gado bai unu a pai nanga wan sani di abi bun furu waarde. Dati meki un musu gi Gado glori nanga un skin.
