TORI FU A KAFTI | FU SAN EDE YESUS PINA ÈN DEDE?
A sani disi pasa trutru?
Na a mofoyari fu a yari 33 den kiri Yesus fu Nasaret. Sma ben lei gi en taki a ben gi a pipel deki-ati fu opo densrefi teige lanti. Boiti dati, den fon en na wan ogri-ati fasi èn den spikri en na wan postu. A ben abi furu pen fosi a dede. Ma Gado gi Yesus libi baka èn baka 40 dei a opo go na hemel.
Wi kan leisi a tori disi na ini den fo Evangelietori noso den Bijbel buku di e taki fu Yesus en libi. Den buku disi de na ini a Nyun Testamenti noso den Kresten Griki Buku fu Bijbel. Ma den sani disi pasa trutru? Disi na wan prenspari aksi. Efu den sani disi no pasa trutru, dan a Kresten bribi na fu soso èn a howpu fu libi fu têgo na ini wan paradijs na soso wan dren (1 Korentesma 15:14). Ma efu den sani disi pasa trutru, dan wan moi ten e wakti libisma èn yu srefi kan de drape. Sobun, san yu e denki? Den sani di skrifi na ini den Evangelietori na anansitori, noso den pasa trutru?
BUWEISI DI E SORI TAKI DEN TORI TRU
Den tori na ini den fo Bijbel buku disi no de leki den anansitori fu owruten. Na presi fu dati, den e taki krin fa sani pasa trutru èn den e taki finifini fu sani. Fu eksempre, yu kan leisi fu presi di ben de trutru èn te now ete yu kan go na furu fu den presi disi. Yu kan leisi tu fu sma di ben e libi na ini owruten èn historia sabiman abi buweisi taki den sma disi ben e libi trutru.—Lukas 3:1, 2, 23.
Syatu baka di Yesus dede èn srefi sowan 100 yari baka dati, yu ben abi skrifiman di ben skrifi fu en. * Den sani di Bijbel e taki fu a fasi fa Yesus dede e kruderi nanga a fasi fa den Romesma fu a ten dati ben e kiri den sma di kisi dedestrafu. Bijbel e fruteri ala sani krin soleki fa den pasa trutru. A e taki srefi fu den swakifasi fu sonwan fu den disipel fu Yesus (Mateyus 26:56; Lukas 22:24-26; Yohanes 18:10, 11). Ala den sani disi e sori taki den Bijbel skrifiman ben de eerlijk èn den sani di den skrifi fu Yesus tru.
FA A DE NANGA NA OPOBAKA FU YESUS?
Aladi furu sma e bribi taki Yesus ben de na libi èn taki a dede, toku sonwan fu den no e bribi taki a kisi wan opobaka trutru. Biginbigin srefi den apostel fu en no ben wani bribi di den yere taki a ben kon na libi baka (Lukas 24:11). Ma den no ben e tweifri moro di den nanga tra disipel si Yesus nanga den eigi ai wan tu leisi baka di a kisi wan opobaka. Fu taki en leti, wan leisi moro leki 500 sma si en.—1 Korentesma 15:6.
Nanga deki-ati den disipel fruteri sma fu na opobaka fu Yesus, aladi skowtu ben kan kisi den èn sma ben kan kiri den. Den fruteri a tori disi srefi na den sma di ben kiri Yesus (Tori fu den apostel 4:1-3, 10, 19, 20; 5:27-32). Yu denki taki so furu disipel ben o teki a deki-ati fu fruteri sma a sani disi efu den no ben de seiker taki Yesus kisi wan opobaka? Fu taki en leti, na fu di den disipel ben bribi taki Yesus kisi wan opobaka, meki a Kresten bribi panya na heri grontapu na a ten dati èn na ini a ten disi.
Den Bijbel buku di e taki fu Yesus libi abi ala buweisi taki a dede èn taki a opo baka trutru. Te yu e leisi den finifini, dan yu srefi o de seiker taki den sani disi na tru tori. Yu bribi kan kon moro tranga srefi te yu e frustan fu san ede den sani disi pasa. A tra artikel o taki fu a tori disi.
^ paragraaf 7 Wan fu den skrifiman disi na Tacitus di gebore na a pisi ten fu a yari 55. A ben skrifi: „A nen [Kresten] komoto fu Krestes, wan man di ben kisi a moro hebi strafu fu wan fu den granman fu wi, Pontius Pilatus, na a ten di Tiberius ben e tiri.” Wan tu tra skrifiman di taki fu Yesus na Suwetonius (69-122 B.K.), a Dyu historia skrifiman Josephus (37-100 B.K.), nanga Plinius a Yonguwan di ben de a tiriman fu Bitinia (61-113 B.K.). (B.K. wani taki Baka Krestes.)
