Lukas skrifi en 3:1-38
3 Na ini a di fu 15 yari di Grankownu* Tiberius ben e tiri, Pontius Pilatus ben de granman fu Yudea. Herodes* ben de tiriman fu Galilea èn en brada Filipus ben de tiriman fu a kontren Itureya nanga Trakonitis. Lisanias ben de tiriman fu Abileine
2 èn Anas nanga Kayafas ben de granpriester. Na a ten dati Gado gi Yohanes, a manpkin fu Sakaria, wan boskopu na ini a sabana.
3 Baka dati, Yohanes waka a heri kontren fu Yordan-liba fu preiki taki sma musu dopu fu sori taki den abi berow. Na so den ben o man kisi pardon fu sondu
4 soleki fa a skrifi na ini a buku fu a profeiti Yesaya. A profeiti ben taki: „Wan sma e bari na ini a sabana: ’Sreka a pasi fu Yehovah!* Meki den pasi fu en kon reti.
5 Ibri lagipresi musu kon hei èn ibri bergi nanga hei presi musu kon plata. Den pasi di abi boktu musu tron pasi di reti èn den olo-olo pasi musu tron grati pasi.
6 Dan ala sma o si fa Gado o tyari ferlusu kon.’”
7 Fu dati ede a taigi den sma di ben kon na en fu teki dopu: „Un snekipkin, suma taigi unu taki unu o man lowe gi a dei fu Gado en atibron?
8 Un musu du sani di e sori taki unu abi berow. No bigin prakseri: ’Wi p’pa na Abraham.’ Bika mi e taigi unu taki Gado man meki pkin gi Abraham fu den ston disi.
9 Iya, na aksi de na a rutu fu den bon kba. Fu dati ede, den o koti ibri bon di no e meki bun froktu èn den o iti en go na ini faya.”
10 Ne den sma aksi en: „San wi musu du dan?”
11 A taigi den: „Meki a sma di abi tu krosi,* gi wan fu den na a sma di no abi èn meki a sma di abi n’nyan, du a srefi sani tu.”
12 Srefi den sma di e teki belasting gi lanti kon na en fu dopu èn den aksi en: „Leriman, san wi musu du?”
13 A taigi den: „No aksi moro belasting leki san sma musu pai.”
14 Den srudati aksi en tu: „San wi musu du dan?” Ne a taigi den: „No trobi nowan sma èn no lei gi nowan sma. Un musu breiti te unu abi den sani di sma abi fanowdu fu tan na libi.”*
15 A pipel ben ferwakti a Krestes èn den alamala ben e aksi densrefi efu Yohanes na a Krestes.
16 Dati meki Yohanes piki den alamala: „Mi e dopu unu nanga watra. Ma a sma di o kon bigi moro mi èn mi no warti srefi fu lusu a banti fu en susu. A o dopu unu nanga santa yeye èn nanga faya.
17 A abi en skopu* na ini en anu kba. A o krin a heri gron pe a e fon tarwe* èn a o poti a tarwe na ini a maksin. Ma a buba fu a tarwe a o bron nanga faya di nowan sma man kiri.”
18 Yohanes ben gi den sma furu tra rai èn a ben e ferteri a pipel bun nyunsu.
19 Ma a pir’ai gi a tiriman Herodes fu di a ben de nanga Herodias, a frow fu en brada, èn fu di a ben e du ala sortu ogri.
20 Ma Herodes ben du ete wan ogri: A poti Yohanes na straf’oso.
21 Yohanes dopu furu sma èn a dopu Yesus tu. Di Yesus ben e begi, hemel opo.
22 Ne santa yeye saka kon na en tapu leki wan doifi, dan wan sten taki kmoto fu hemel: „Yu na mi Manpkin, mi lobi yu èn mi feni yu bun.”
23 Di Yesus bigin nanga a wroko fu en, a ben abi sowan 30 yari. Sma ben sabi en leki a manpkinfu Yosef,a manpkin fu Eli,
24 a manpkin fu Matat,a manpkin fu Leifi,a manpkin fu Melki,a manpkin fu Yanai,a manpkin fu Yosef,
25 a manpkin fu Matatias,a manpkin fu Amos,a manpkin fu Nahum,a manpkin fu Esli,a manpkin fu Nagai,
26 a manpkin fu Mat,a manpkin fu Matatias,a manpkin fu Semeyin,a manpkin fu Yosek,a manpkin fu Yoda,
27 a manpkin fu Yoanan,a manpkin fu Resa,a manpkin fu Serubabel,a manpkin fu Seyaltiyel,a manpkin fu Neri,
28 a manpkin fu Melki,a manpkin fu Adi,a manpkin fu Kosam,a manpkin fu Elmadan,a manpkin fu Er,
29 a manpkin fu Yesus,a manpkin fu Eliyeser,a manpkin fu Yorim,a manpkin fu Matat,a manpkin fu Leifi,
30 a manpkin fu Simeon,a manpkin fu Yuda,a manpkin fu Yosef,a manpkin fu Yonam,a manpkin fu Eliakim,
31 a manpkin fu Meleya,a manpkin fu Mena,a manpkin fu Matata,a manpkin fu Natan,a manpkin fu David,
32 a manpkin fu Isai,a manpkin fu Obed,a manpkin fu Boas,a manpkin fu Salmon,a manpkin fu Naheson,
33 a manpkin fu Aminadab,a manpkin fu Arni,a manpkin fu Hesron,a manpkin fu Peres,a manpkin fu Yuda,
34 a manpkin fu Yakob,a manpkin fu Isak,a manpkin fu Abraham,a manpkin fu Tera,a manpkin fu Nahor,
35 a manpkin fu Seiruk,a manpkin fu Rehu,a manpkin fu Pelek,a manpkin fu Heiber,a manpkin fu Sela,
36 a manpkin fu Kainan,a manpkin fu Arpaksad,a manpkin fu Sem,a manpkin fu Noa,a manpkin fu Lamek,
37 a manpkin fu Metusala,a manpkin fu Heinok,a manpkin fu Yered,a manpkin fu Mahalaleyel,a manpkin fu Kainan,
38 a manpkin fu Enos,a manpkin fu Set,a manpkin fu Adam,a manpkin fu Gado.
Futuwortu
^ Grikitongo: „Caesar”. Luku Wortubuku.
^ Luku „Tra prenspari sani” A5.
^ Noso: „ete wan krosi”.
^ Noso: „Un musu breiti nanga a moni di unu e kisi”.
^ Disi na wan wrokosani fu udu di sma ben e gebroiki fu iti sani soleki aleisi go na loktu, baka te den ben masi en. Na so a winti ben kan wai den buba gwe.
^ Tarwe na wan sani di gersi aleisi.
