Lukas skrifi en 18:1-43
18 Baka dati, a ferteri den wan agersitori fu sori den taki a de fanowdu fu begi ala ten èn fu no kon weri fu du dati.
2 A taki: „Na ini wan foto yu ben abi wan krutuman di no ben e frede Gado èn a no ben abi lespeki gi nowan sma.
3 Wan uma di masra ben dede kba, ben de na ini a foto dati tu. Ala yuru a ben e go na a krutuman èn a ben e taki: ’Yepi mi, so taki mi kan kisi reti na ini a krutu-afersi di mi abi nanga wan tra sma.’
4 We, wan heri pisi ten a krutuman no ben wani yepi en. Ma bakaten a prakseri: ’Mi no e frede Gado èn mi no e span nanga nowan sma.
5 Ma ala yuru a frow disi e kon dyaso fu trobi mi. Mi o sorgu taki a kisi reti, dan a no o kon ferferi mi moro èn a no o tan aksi mi fu du sani gi en.’”*
6 Ne Masra taki: „Un yere san a krutuman taki aladi a no ben de wan ret’ati sma?
7 Un no denki taki Gado o sorgu taki den sma di a kari èn di e begi en dei nanga neti o kisi reti? Un denki taki a no o abi pasensi nanga den tu?
8 Mi e taigi unu: A o sorgu taki den o kisi reti heri esi. Ma te a Manpkin fu libisma doro, a o feni sma na grontapu di e sori a srefi bribi disi?”
9 Ne Yesus ferteri wan agersitori na den sma di ben e si densrefi leki bun sma èn di ben e si tra sma leki noti. A taki:
10 „Tu man ben go na a tempel fu begi. A wan ben de wan Fariseiman èn a trawan ben de wan sma di e teki belasting gi lanti.
11 A Fariseiman go tnapu, dan a bigin begi na ini en ati: ’Mi Gado, mi e taki yu tangi taki mi no de leki den tra sma disi, den sma di e pina trawan, den sma di no bun, den sma di e waka gi den trowpatna èn srefi leki a man disi di e teki belasting gi lanti.
12 Tu leisi wan wiki mi e faste* èn mi e gi a di fu tin pisi fu ala san mi e kisi.’
13 Ma a man di ben e teki belasting gi lanti ben e tnapu farawe. A no ben wani opo en ede srefi fu luku go na hemel. Na presi fu dati a tan naki tapu en borsu èn a ben e taki: ’Mi Gado, mi na wan sondari. Mi e begi yu, sori sar’ati gi mi.’
14 Mi e taigi unu: Di a man disi go na en oso, a ben bun moro a Fariseiman. Bika den o saka a sma di e hei ensrefi, ma den o hei a sma di e saka ensrefi.”
15 Baka dati, sma tyari den pkin fu den kon gi Yesus, so taki a ben kan fasi den. Ma di den disipel si disi, den bari den sma.
16 Tòg Yesus kari den pkin kon na en èn a taki: „Meki den pkin kon na mi èn no tapu den. Bika den sma di de leki den pkin disi o kisi a Kownukondre fu Gado.
17 Un kan bribi mi te mi e taigi unu a sani disi: Efu wan sma no e saka ensrefi ondro a Kownukondre fu Gado leki wan yongu pkin, dan noiti a no o go na ini a Kownukondre.”
18 Baka dati, wan fu den tiriman kon aksi en: „Bun Leriman, san mi musu du fu kisi têgo libi?”
19 Yesus taigi a man: „Fu san ede yu e taki dati mi bun? Nowan sma bun. A wan-enkri sma di bun, na Gado.
20 Yu sabi den wet disi: ’No waka gi yu trowpatna, no kiri sma, no fufuru, no lei gi sma, lespeki yu p’pa nanga m’ma.’”
21 Dan a man taki: „Sensi di mi ben pkin, mi e du ala den sani disi.”
22 Di Yesus yere disi, a taigi en: „Ma tòg wán sani de di yu no e du ete: Go seri ala den sani di yu abi èn prati a moni gi den pôtisma, dan yu o kisi wan gudu ini hemel. Baka dati, tron wan bakaman fu mi.”
23 Di a man yere disi, a sari trutru, bika a ben gudu srefsrefi.
24 Yesus luku en èn a taki: „A o muilek trutru gi den sma di abi moni, fu go na ini a Kownukondre fu Gado!
25 A moro makelek gi wan kameili fu psa na ini wan n’nai-olo, leki gi wan guduman fu go na ini a Kownukondre fu Gado.”
26 Den sma di yere disi taki: „Dan suma o man kisi ferlusu?”
27 A taki: „San libisma no man du, na dati Gado man du.”
28 Ma Petrus taki: „Wi gwe libi den sani fu wi èn wi kon waka na yu baka.”
29 Yesus taigi den: „Mi e taigi unu: Ibri sma di gwe libi en oso, en frow, en brada, en p’pa, en m’ma nanga en pkin fu a Kownukondre fu Gado ede,
30 o kisi moro leki dati na ini a ten disi. Èn na ini a ten di e kon* a o kisi têgo libi.”
31 Baka dati, a kari den 12 apostel kon na wan sei èn a taigi den: „Luku, wi e go na Yerusalem èn ala den sani di den profeiti skrifi fu a Manpkin fu libisma o kon tru.
32 Den o tyari en go na den trakondre sma, den o spotu en, den o du ogri nanga en èn den o spiti na en tapu.
33 Baka te den wipi en, den o kiri en. Ma a o opo baka na a di fu dri dei.”
34 Ma den apostel no ben sabi san den sani disi ben wani taki. Den sani di Yesus taki ben muilek fu ferstan fu di a ben de leki wan kibritori gi den.
35 Di a ben de krosbei fu Yerikow, wan breniman ben sdon na seipasi e begi sma sani.
36 Di a man yere taki wan bigi grupu sma ben e waka psa, a aksi den san e psa.
37 Den sma taigi en: „Na Yesus fu Nasaret e waka psa!”
38 Di a man yere disi, a bari: „Yesus, Manpkin fu David, abi sar’ati nanga mi!”
39 Ma den sma di ben e waka na fesi, bari a man fu a tapu en mofo. Tòg a man bari moro tranga: „Manpkin fu David, abi sar’ati nanga mi!”
40 Dan Yesus tan tnapu èn a taigi sma fu tyari a man kon na en. Di a man kon na Yesus, Yesus aksi en:
41 „San yu wani mi du gi yu?” A man taki: „Masra, meki mi si baka.”
42 Dati meki Yesus taigi en: „Yu musu si baka. A bribi fu yu meki yu kon betre.”
43 Direk a man ben man si baka. Ne a bigin waka na Yesus baka èn a bigin prèise Gado. Ala den sma di si disi bigin prèise Gado tu.
Futuwortu
^ Noso: „a no o naki mi na ini mi fesi”.
