A kownu fu Siria ben wani kisi Elisa, a profeiti fu Gado. A ben yere taki Elisa de na ini a foto Dotan di ben abi hei skotu èn di ben de na tapu wan bergi. Na neti, a kownu fu Siria seni den srudati fu en na tapu asi nanga asiwagi go na Dotan. Di son opo, a legre ben lontu a heri foto.—2 Kow. 6:13, 14.

Di a futuboi fu Elisa opo go na dorosei, a si a legre di ben kon fu teki Elisa. A bari: „Ke, mi masra! San wi o du?” Elisa taigi en: „No frede, bika den wan di de nanga wi, de moro leki den wan di de nanga den.” Baka dati a profeiti begi Gado: „Ke Yehovah, mi e begi yu, opo en ai, so taki a kan si.” Bijbel e sori san pasa baka dati: „Wantewante Yehovah opo den ai fu a futuboi, so taki a ben kan si. Di a futuboi luku moro fini, a si taki a heri bergikontren ben lai nanga asi èn nanga fetiwagi. Den asi nanga den fetiwagi ben de leki faya. Na ala sei den ben lontu Elisa” (2 Kow. 6:15-17). San wi kan leri fu a tori disi èn fu tra sani di pasa na ini a libi fu Elisa?

Elisa no ben bruya di a si taki a legre fu Siria lontu den, fu di a ben e frutrow na tapu Yehovah èn a ben si taki Yehovah ben o kibri en. Na ini a ten disi wi no e fruwakti taki Yehovah o du wondru fu kibri wi. Ma wi kan si krin taki Yehovah e kibri a pipel fu en. A de neleki wi e si a legre fu Gado na wi lontu. Efu wi e bribi taki Yehovah e kibri en pipel èn efu wi e frutrow na en tapu ala ten, dan wi no o frede èn a o blesi wi (Ps. 4:8). Meki wi luku san wi kan leri fu tra sani di pasa na ini a libi fu Elisa.

Wan dei di Elisa ben e plugu wan gron, a profeiti Elia go na en èn a poti en dyakti na Elisa tapu. Elisa ben sabi taki na so Elia aksi en fu tron en futuboi. Elisa hori wan fesa, a taki en papa nanga en mama odi, dan a gowe libi oso fu tron a futuboi fu Elia (1 Kow. 19:16, 19-21). Elisa ben de klariklari  fu du iniwan sani di Yehovah ben o taigi en fu du. Fu dati ede Yehovah meki a du furu sani èn te fu kaba A meki Elisa teki a presi fu Elia.

Elisa ben de Elia futuboi sowan siksi yari langa. Na ini den yari dati, Elisa „ben e kanti watra gi Elia fu wasi en anu” (2 Kow. 3:11). Na a ten dati sma ben gwenti nyan nanga den anu. Te den ben kaba nyan, dan wan futuboi ben kanti watra gi en masra fu wasi en anu. Sobun, wan tu fu den wroko di Elisa ben musu du ben de pikinpikin sani. Toku a ben si en leki wan grani fu de a futuboi fu Elia.

Na ini a ten disi, Kresten de klariklari fu du difrenti sortu furuten diniwroko. Fu san ede? Fu di den abi bribi na ini Yehovah èn den wani dini en nanga den heri ati. Sonwan fu den e gowe libi den oso fu go wroko na Betel noso fu go yepi bow Kownukondre zaal. Son leisi den e du wroko di furu sma e si leki pikinpikin sani di no de so prenspari. Ma nowan fu wi musu denki so. Yehovah abi furu warderi gi ala den sani di den futuboi fu en e du.—Hebr. 6:10.

Fosi Gado „seni wan bigi winti kon fu opo Elia tyari go na loktu”, a seni Elia fu Gilgal go na Betel. Elia taigi Elisa taki a no ben abi fu go nanga en, ma toku Elisa taki: „Mi no o gowe libi yu.” Di den ben de na pasi, Elia taigi Elisa ete tu leisi fu tan na baka, ma Elisa no ben wani (2 Kow. 2:1-6). Neleki fa Rut tan nanga Naomi, na so Elisa tan nanga Elia (Rut 1:8, 16, 17). Fu san ede? Elisa ben si en leki wan grani fu de a futuboi fu Elia fu di dati na a wroko di Gado ben gi en.

Elisa na wan moi eksempre gi wi. Iniwan sortu wroko di wi kisi fu du na ini Yehovah organisâsi, wi o si leki wan bigi grani te wi tan hori na prakseri taki na Yehovah wi e dini. Moro bigi grani leki dati no de.—Ps. 65:4; 84:10.

Di Elia nanga Elisa ben de na pasi, dan Elia taigi Elisa: „Taigi mi san mi musu du gi yu, fosi Gado teki mi puru na yu.” Elisa taki: „Mi e begi yu, gi mi [tu pisi] fu a yeye di Gado gi yu.” Neleki fa Salomo ben aksi Yehovah furu yari na fesi fu yepi en, na so Elisa aksi wan sani di ben o yepi en fu dini Yehovah moro bun (1 Kow. 3:5, 9; 2 Kow. 2:9). Te wan man na ini Israel ben e prati a famirigudu fu en, dan a fosi manpikin fu en ben e kisi tu tron moro furu leki den tra pikin (Deut. 21:15-17). Sobun, Elisa ben aksi efu a ben kan teki Elia en presi leki profeiti. A sani di Elisa aksi ben sori tu taki a ben wani abi den srefi fasi fu Elia. A ben wani abi deki-ati neleki en èn a ben wani anbegi Yehovah fayafaya neleki en.—1 Kow. 19:13, 14.

San Elia piki a futuboi fu en? A taki: „Yu aksi mi wan muilek sani. Efu yu si nanga yu eigi ai fa Gado e teki mi puru na yu, dan yu o kisi san yu aksi. Ma efu yu no si a sani disi, dan yu no o kisi en” (2 Kow. 2:10). A piki fu Elia ben wani taki tu sani. A fosi sani na taki Gado wawan ben kan bosroiti efu Elisa ben o kisi san a aksi. A di fu tu sani na taki Elisa ben musu tan nanga Elia awinsi san e pasa.

Gado gi Elisa san a aksi? Bijbel e taki: „Now Elia nanga Elisa waka go moro fara. Den ben e taki nanga makandra ete di den si wan fetiwagi nanga asi e kon. A fetiwagi nanga den asi ben de leki faya. Dan den prati Elia nanga Elisa fu makandra. Baka dati wan bigi winti opo Elia go na loktu. . . . Elisa si san pasa.” * Na so Yehovah piki na aksi fu Elisa. Elisa si fa Elia gowe libi en èn a kisi tu pisi fu a yeye fu Elia. Na so a tron Gado profeiti na presi fu Elia.—2 Kow. 2:11-14.

Elisa teki Elia en dyakti di ben fadon na gron, dan a weri en. Di sma si Elisa e weri a dyakti fu Elia, den ben sabi taki now Elisa na a profeiti fu Gado. Bakaten di a prati a watra fu Yordan-liba a ben de moro krin fu si taki en na Gado profeiti.

Noiti moro Elisa ben o frigiti san a si di a bigi winti opo Elia tyari gowe. Iniwan sma ben o fruwondru efu a ben o si wan fetiwagi nanga asi di de leki faya. Ma den sani disi sori Elisa krin taki Yehovah gi en san a ben aksi. Te Gado e piki den begi fu  wi, dan wi no e kisi fisyun fu fetiwagi nanga asi di de leki faya. Ma wi abi krin buweisi taki Gado e gebroiki en bigi krakti fu meki a wani fu en kon tru. Te wi e si taki Yehovah e blesi en pipel na grontapu, dan a de neleki wi e si fa en hemel wagi e go na fesi.—Esek. 10:9-13.

Elisa ondrofeni furu sani di gi en na overtoigi taki Yehovah abi bigi krakti. Fu taki en leti, a santa yeye fu Gado meki a profeiti du 16 wondru, dati na tu tron moro furu leki Elia. * A di fu tu leisi di Elisa si fetiwagi nanga asi di de leki faya, na di a ben de na Dotan, di a legre fu Siria ben lontu a foto.

Elisa no ben frede di den feanti fu en ben lontu a foto Dotan. Fu san ede? Fu di a ben abi wan tranga bribi na ini Yehovah. Wi musu abi so wan bribi tu. Fu dati ede, meki wi begi Gado fu gi wi en santa yeye so taki wi kan abi bribi èn den tra fasi di a santa yeye e meki sma abi.—Luk. 11:13; Gal. 5:22, 23.

A musu fu de so taki a sani di pasa na Dotan meki Elisa frutrow moro na tapu Yehovah nanga den engel fu en. Gado ben seni den engel fu en fu lontu a foto èn fu kibri Elisa. Dan Gado breni den feanti èn na so a frulusu Elisa nanga en futuboi (2 Kow. 6:17-23). Srefi na ini a muilek situwâsi disi Elisa sori taki a ben abi wan tranga bribi èn taki a ben e frutrow dorodoro na tapu Yehovah.

Meki wi frutrow na tapu Yehovah Gado neleki Elisa (Odo 3:5, 6). Efu wi e du dati, dan „Gado srefi o du bun gi wi èn a o blesi wi” (Ps. 67:1). A tru taki fetiwagi nanga asi di de leki faya no de na wi lontu. Ma na a ten fu a „bigi banawtu” Yehovah o kibri en pipel na heri grontapu (Mat. 24:21; Openb. 7:9, 14). Ma nownow kaba wi musu hori na prakseri taki „Gado na wi kibripe”.—Ps. 62:8.