Wi e kisi yepi fu a „Gado di e meki wi horidoro èn di e gi wi trowstu”

SOWAN 2000 yari pasa, a Bijbel skrifiman Paulus taki dati Yehovah na a „Gado di e meki wi horidoro èn di e gi wi trowstu” (Romesma 15:5). Fu di Bijbel e gi wi a dyaranti taki Yehovah no e kenki, meki wi kan abi a frutrow taki te now ete Gado e trowstu den sma di e dini en (Yakobus 1:17). Fu taki en leti, Bijbel e sori taki Yehovah e trowstu sma na difrenti fasi. Na sortu fasi a e du dati? Gado e tranga den sma di e begi en fu kisi yepi. Boiti dati, a e meki tru Kresten trowstu den brada nanga sisa fu den. Èn Yehovah gi libisma a Wortu fu en, namku Bijbel, pe moi tori skrifi na ini di e tranga papa nanga mama di e sari fu di den lasi wan pikin fu den na ini dede. Meki wi go luku den dri fasi disi fa Yehovah e trowstu wi.

’Yehovah yere mi’

Kownu David ben skrifi fu wi Mekiman, Yehovah: „Frutrow na en tapu ala ten, o pipel. Taigi en san de na tapu un ati. Gado na wan kibripresi gi wi” (Psalm 62:8). Fu san ede David ben abi so wan tranga frutrow tapu Yehovah? David ben skrifi san ensrefi ben ondrofeni: „Di mi ben nyan pina, mi kari Yehovah, èn a yere mi. A puru mi na ini ala den banawtu fu mi” (Psalm 34:6). Ala leisi te David ben de na ini muilek situwâsi, a ben begi Gado fu yepi en, èn ala ten Yehovah ben yepi en. David ben sabi taki Gado ben o horibaka gi en èn taki A ben o yepi en fu horidoro, fu di Gado ben yepi en kaba.

Papa nanga mama di e sari srefisrefi, musu frustan taki Yehovah sa yepi den fu horidoro te  den no man moro, neleki fa a ben yepi David. Den kan taki nanga a „Yereman fu begi”, èn den kan abi a frutrow taki a sa yepi den (Psalm 65:2). William, di wi ben taki fu en na ini na artikel na fesi, ben taki: „Furu leisi mi ben denki taki mi no man libi go doro sondro a boi fu mi, èn na den momenti dati mi aksi Yehovah fu yepi mi. Ala ten Yehovah gi mi a krakti nanga a deki-ati fu libi go doro.” Efu yu e begi Yehovah tu èn e poti bribi na ini en, dan a bigi Gado fu hemel sa yepi yu. Fu taki en leti, Yehovah Gado e pramisi den sma di e meki muiti fu dini en, a sani disi: „Mi, Yehovah yu Gado, e grabu yu hori na yu reti-anu. Mi na a wan di e taigi yu: ’No frede. Misrefi o yepi yu.’”—Yesaya 41:13.

A yepi di bun mati e gi

Nofo tron a de so taki papa nanga mama di lasi wan pikin na ini dede abi ten fanowdu fu de den wawan, fu krei, èn fu kisi densrefi baka. Ma a no de wan koni sani te den no wani abi demakandra nanga trawan fu wan langa pisi ten. Soleki fa Odo 18:1 e taki, dan „wan sma di e hori ensrefi aparti”, kan abi en moro muilek srefi. Fu dati ede, den sma di e sari fu di wan lobiwan fu den dede, musu luku bun taki den no e hori densrefi aparti fu tra sma.

Wan prenspari sani di kan yepi den wan di e sari, na te den e kisi yepi fu mati di abi frede gi Gado. Odo 17:17 e taki: „Wan trutru mati abi lobi ala ten, èn a de wan brada di en mama meki fu te banawtu de.” Lucy, di wi ben taki fu en tu na ini na artikel na fesi, ben kisi trowstu fu bun mati, baka di a boi fu en lasi libi. A ben taki disi fu den brada nanga sisa na ini a gemeente: „A ben yepi wi trutru di den ben kon luku wi, aladi son leisi den no ben e taki furu. Wan fu den mati fu mi ben kon luku mi tapu den dei te mi ben de mi wawan na oso. A ben sabi taki mi ben o sidon krei, èn nofo tron a ben kon na mi èn a ben e krei tu. Wan tra mati ben bel mi ibri dei fu gi mi deki-ati. Trawan ben kari wi kon na den oso fu nyan makandra nanga den, èn te now ete den e du dati.”

Aladi papa nanga mama e sari srefisrefi te den lasi wan pikin na ini dede èn a firi dati no e gowe wantronso, toku den sa kisi trutru trowstu te den e begi Gado èn te den abi demakandra nanga brada nanga sisa fu a  gemeente. Furu Kresten papa nanga mama di lasi wan pikin na ini dede, firi taki Yehovah de nanga den trutru. Iya, Yehovah „e dresi den wan di brokosaka, èn a e tai den soro fu den”.—Psalm 147:3.

Tori na ini Bijbel di e trowstu sma

Boiti taki den wan di e row e kisi trowstu te den e begi èn te den abi demakandra nanga bun mati, a Wortu fu Gado e trowstu den tu. Tori di skrifi na ini Bijbel e sori taki Yesus wani trutru taki papa nanga mama di e sari, kon de nanga prisiri baka. Yesus sori disi fu di a gi den lobiwan fu den wan opobaka. Den sortu tori dati trutru e trowstu den sma di e sari. Meki wi luku tu fu den sortu tori dati.

Lukas kapitel 7 e fruteri san ben pasa di Yesus miti wan grupu sma di ben go na wan beri na ini a foto Nain. Den sma ben o beri a wan-enkri manpikin fu wan uma di lasi en masra na ini dede kaba. Na ini vers 13 fu a kapitel skrifi: „Di Masra si na uma, a firi sari gi en, èn a taigi na uma: ’No krei moro.’”

Furu sma no ben o prefuru fu taigi wan mama fu no krei moro na a beri fu en manpikin. Fu san ede Yesus ben taki a sani dati? Fu di a ben sabi taki a mama disi no ben o sari moro. A tori e taki moro fara: „[Yesus] waka go moro krosibei, dan a fasi a dragi, èn den sma di ben e tyari a dedeskin tan tanapu. Ne a taki: ’Yonkuman, mi e taigi yu: Opo!’ Ne a dede man opo sidon, dan a bigin taki, èn Yesus gi en baka na en mama” (Lukas 7:14, 15). Na a momenti dati a ben musu fu de so taki a mama bigin krei baka, ma a leisi dati a ben e krei fu di a ben prisiri.

 Wan tra leisi, wan man di nen Yairus ben kon aksi Yesus fu yepi en umapikin di ben e siki seryusu. Syatu baka dati, Yairus kon yere taki na umapikin fu en di ben abi 12 yari, lasi libi. A nyunsu disi meki Yairus sari trutru, ma Yesus taigi en: „No frede, na bribi yu musu bribi nomo.” Di Yesus doro na a oso fu a famiri, dan a go na inisei pe a dede meisje ben de. A hori na anu fu a meisje, èn a taki: „Meisje, mi e taigi yu: Opo!” San ben pasa dan? ’Wantewante a meisje opo èn a bigin waka.’ San a papa nanga mama fu en du? ’Den bigin prisiri srefisrefi.’ Yairus nanga en wefi brasa na umapikin fu den, èn den ben firi koloku trutru. A ben de neleki den ben e dren.—Markus 5:22-24, 35-43.

Den sortu tori disi na ini Bijbel di e fruteri krin fa pikin kisi wan opobaka, e sori papa nanga mama di e sari na ini a ten disi san den kan fruwakti na ini a ten di e kon. Yesus ben taki: „A yuru o kon te ala den sma di de na ini den grebi o yere en sten, èn den o komopo drape” (Yohanes 5:28, 29). Yehovah seti sani so taki en Manpikin kan gi den sma di dede wan opobaka. Milyunmilyun pikin di dede, sa „yere en sten” te a o taigi den: „Mi e taigi yu: Opo!” Den yonguwan dati o bigin waka èn taki baka. Neleki Yairus nanga a wefi fu en, na so den papa nanga mama fu den pikin dati sa „prisiri srefisrefi”.

Efu yu lasi wan manpikin noso wan umapikin na ini dede, dan a ben o bun fu hori na prakseri taki Yehovah man meki yu firi prisiri baka fu di a man gi yu pikin wan opobaka. Efu yu wani ondrofeni a tumusi moi sani disi di Yehovah o du, dan yu musu gi yesi na a frumane disi fu a psalm skrifiman: ’Suku Yehovah èn suku a krakti fu en. Suku yepi na en doronomo. Memre den wondru di a du’ (Psalm 105:4, 5). Iya, dini a tru Gado, Yehovah, èn anbegi en na a fasi di a feni bun.

Sortu wini yu sa kisi nownow kaba te yu e „suku Yehovah”? Yu sa kisi krakti te yu e begi Gado, yu sa kisi trowstu fu Kresten brada nanga sisa di e broko den ede nanga yu èn di lobi yu, èn yu sa kisi deki-ati te yu e studeri Gado Wortu. Boiti dati, ete wan syatu pisi ten, dan yu o si taki Yehovah sa ’du wondru’. Na so fasi a sa meki yu nanga a pikin fu yu di yu lasi na ini dede, kisi têgo libi.

[Faki na tapu bladzijde 5]

„Tyari na uma kon di lasi tu pikin na ini dede”

Kehinde nanga Bintu na wan trowpaar di e libi na ini Nigeria. A trowpaar disi na Kotoigi fu Yehovah èn den lasi tu fu den pikin na ini wan ongoloku di ben pasa nanga oto. Sensi a ten dati, den ben e sari srefisrefi fu di so wan sani pasa. Ma toku den man horidoro fu di den e frutrow tapu Yehovah, èn den e tan fruteri den birtisma a boskopu fu Bijbel di e gi sma howpu.

Tra sma si taki Kehinde nanga Bintu no ben brokosaka èn taki den ben abi deki-ati. Wan dei, wan uma di nen Ukoli ben taigi wan fu den mati fu Bintu: „Tyari na uma kon di lasi tu pikin fu en na ini dede na a srefi ten, èn di e tan preiki a boskopu fu Bijbel ete. Mi wani sabi san e gi en deki-ati fu go doro nanga en libi.” Di Bintu doro na a oso fu Misi Ukoli, dan na uma disi taigi en: „Mi wani sabi fu san ede yu e tan preiki fu a Gado di kiri den pikin fu yu. Gado teki a wan-enkri umapikin fu mi. Sensi a ten dati, mi no wani sabi notinoti fu Gado.” Bintu gebroiki Bijbel fu sori na uma fu san ede libisma e dede, èn fu san ede wi kan abi a howpu taki den lobiwan fu wi di dede, sa kisi wan opobaka trutru.—Tori fu den Apostel 24:15; Romesma 5:12.

Bakaten, Misi Ukoli ben taki: „Mi ben e denki taki na Gado e meki sma dede. Now mi sabi taki a no en e du dati.” Na uma disi bosroiti fu studeri Bijbel nanga Yehovah Kotoigi so taki a kan kon sabi moro fu den pramisi fu Gado.

[Faki na tapu bladzijde 6]

’Mi wani yepi den, ma mi no sabi fa’

Te wan pikin dede, dan en papa nanga mama èn den brada nanga sisa fu en e sari srefisrefi. Ma kande den mati fu den e broko den ede nanga na osofamiri. Den wani yepi a famiri, ma den no sabi fa, fu di den no wani taki noso du wan sani di kan meki a famiri sari moro. Meki wi go luku wan tu sani di kan yepi den sma di e taki: ’Mi wani yepi den, ma mi no sabi fa.’

❖ No wai pasi gi den sma di e sari, soso fu di yu no sabi san yu musu taki noso du. A sa gi den deki-ati kaba te yu de drape nanga den. Efu yu no sabi san yu musu taki, dan yu kan brasa den èn yu kan taigi den taki yu e sari taki so wan sani pasa. Na so fasi den e si taki yu e broko yu ede nanga den. A de so taki yu e frede taki yu o meki den sari moro te yu o bigin krei? Bijbel e taki: „Krei nanga sma di e krei” (Romesma 12:15). Te yu e krei, dan dati e sori taki yu e sari nanga den, èn a sani dati e trowstu den.

❖ Bigin du wan sani fu yepi den. Yu kan bori wan pikin sani gi a famiri? Yu kan wasi den dotisani gi den? Yu kan du wan tu boskopu gi den? Yu no musu taki: „Efu yu abi iniwan sani fanowdu, dan yu kan taigi mi.” Kande yu e taki a sani dati fu di yu wani yepi den trutru, ma te yu e taki so, dan a furu papa nanga mama di e sari feni taki a gersi leki yu abi tumusi furu fu du èn fu dati ede yu no man yepi den. Na presi fu dati, yu kan aksi den: „San mi kan du fu yepi yu nownow?” Dan yu musu du tu san den aksi yu. Ma luku bun taki yu no e go na ini kamra noso tra presi fu na oso pe tra sma no mag go, èn luku bun taki yu no e bumui na ini den tori.

❖ No taigi den: „Mi sabi fa unu e firi.” Ibri sma e firi tra fasi te wan lobiwan fu en dede. Srefi efu yu lasi wan pikin na ini dede tu, yu no sabi soifri fa den e firi.

❖ Wan heri pisi ten o pasa, fosi a famiri kan bigin du wan tu fu den sani baka, di den ben gwenti fu du. Tan yepi den so furu leki yu man. Nofo tron a de so taki na a bigin furu sma e yepi na osofamiri, ma den abi yepi fanowdu srefi baka wan tu wiki. Tan yepi den nanga den sani di den abi fanowdu, srefi baka wan heri pisi ten. *

[Futuwortu]

[Prenki na tapu bladzijde 7]

Tori di skrifi na ini Bijbel e sori krin taki Yesus man gi pikin-nengre libi baka, èn taki a wani du a sani disi trutru