Yonguwan, yu kan meki yu papa nanga mama prisiri noso yu kan meki den sari

„NOWAN tra sani e gi mi moro prisiri leki te mi e yere taki den pikin fu mi e tan waka na ini a waarheid”, na so na owru apostel Yohanes ben skrifi (3 Yohanes 4). Den pikin di kari na ini a bijbeltekst disi a no trutru pikin, ma den na disipel fu Krestes. Papa nanga mama di lobi Gado kan frustan fa Yohanes ben firi di a ben e taki den wortu disi. Neleki fa papa nanga mama e du sani di abi furu krakti tapu den pikin fu den, na so pikin e du sani di abi krakti tapu den papa nanga mama.

Kownu Salomo fu Israel ben sabi taki pikin kan du sani di abi furu krakti tapu den papa nanga mama. A ben skrifi: „Wan koni manpikin e gi wan papa prisiri, èn wan don manpikin e meki en mama sari” (Odo 10:1). Fu dati ede ala pikin, srefi den moro owruwan, musu hori na prakseri taki a fasi fa den e tyari densrefi abi krakti tapu a papa nanga a mama fu den. Fu san ede a bun fu du dati?

Prakseri o furu sani yu Kresten papa nanga mama du gi yu teleki yu kon bigi! Srefi bifo yu gebore, den ben e broko den ede nanga yu èn den begi gi yu. Baka di yu gebore, yu papa nanga mama ben kon lobi yu moro, èn a no de fu taki dati den taki Gado tangi gi a moi grani di den kisi fu sorgu gi yu. Den ben e frustan tu taki disi na wan seryusu frantwortu. Den ben musu sorgu gi wan beibi, èn fu di den e anbegi Yehovah meki den ben e si disi leki wan seryusu sani.

Fu di yu papa nanga mama na tru Kresten, meki den ben e suku bun rai na ini Bijbel nanga Bijbel publikâsi di ben yepi den fu sorgu bun gi yu, èn den ben aksi tra papa nanga mama rai tu. Den ben tan begi Yehovah fu aksi en san den ben musu du (Krutuman 13:8). Di yu ben e gro kon bigi, dan yu papa nanga mama ben si den bun fasi fu yu, ma sosrefi den swakifasi fu yu (Yob 1:5). Di yu tron wan tini, dan tra problema kon. Son leisi di yu ben trangayesi, yu papa nanga mama ben begi moro, den ben leisi moro, èn den ben broko den ede moro fa fu yepi yu fu tan anbegi yu hemel Tata, Yehovah.

Ala ten yu papa nanga mama sa lobi yu. Srefi te yu kon bigi, den wani taki ala sani musu go bun nanga yu, taki yu tan gosontu, èn taki yu tan wan bun mati fu Yehovah. Ma te den e kweki yu èn srefi te yu kon bigi, yu papa nanga mama e hori na prakseri taki yu kan teki yu  eigi bosroiti, èn den no sabi na fesi fa yu libi o waka. Te fu kaba, na yu o bosroiti san yu o du nanga yu libi.

A no de fu taki dati ’nowan tra sani e gi papa nanga mama moro prisiri’, leki te den e yere taki den pikin fu den „e tan waka na ini a waarheid”. Ma na a tra sei a de so tu taki papa nanga mama e sari te den pikin fu den no e anbegi Yehovah moro. Fu tru, pikin di e teki don bosroiti e meki den papa nanga mama sari. Salomo ben taki: „Wan don manpikin e meki en papa atibron, èn a e meki en mama sari” (Odo 17:25). Iya, papa nanga mama e sari srefisrefi te wan pikin fu den no wani dini a tru Gado moro!

Yonguwan, yu kan si krin taki a fasi fa yu e tyari yusrefi abi furu krakti tapu yu famiri èn tapu tra sma. Efu yu no wani dini Gado moro èn yu no wani du san A e taki, dan yu sa meki yu papa nanga mama sari trutru. Ma efu yu e tan getrow na Yehovah èn efu yu e tan gi yesi na en, dan yu papa nanga mama sa prisiri. Abi a fasti bosroiti fu meki yu papa nanga mama prisiri! Wan moro bun sani no de di yu kan du gi yu papa nanga mama di kweki yu, di sorgu taki ogri no miti yu, èn di sori lobi gi yu, a no so?