Agaʻi Atu i le Malamalama

E TELE ola ua faasaoina e molī o le āva. Mo se faigāmalaga ua vāivai, o le iloa atu o se molī i se mea mamao e tele atu ni aogā na i lo le lapataʻi mai o aʻau mataʻutia. E faailoa mai foʻi ua latalata i le nofoaga o loo ia agaʻi atu i ai. E faapena foʻi Kerisiano i aso nei, ua latou lata i le iʻuga o se faigāmalaga umi, i se lalolagi ua faapogisaina ma tele ni lamatiaga faaleagaga. I le Tusi Paia, o tagata lautele ua ō ese mai le Atua, ua “tusa i latou ma le sami ua sousou, e lē mafai ona toʻa filemu; a e lafoia aʻe e le suāsami le eleele ma le palapala.” (Isaia 57:20) Ua siʻomia tagata o le Atua i lenā ituaiga o siʻomaga. E ui i na tulaga, ae o loo iai le latou faamoemoe pupula o le faaolataga, o se malamalama faafaatusa e maufaatuatuaina. (Mika 7:8) E faafetaia Ieova mo lana Afioga tusia, ona “ua lūlūina le malamalama mo lē amiotonu, ua lūlūina foʻi le olioli mo ē ua loto faamaoni.”—Salamo 97:11. *

Peitaʻi, ua faataga e nisi Kerisiano faatosinaga e taaʻina ese ai i latou mai le malamalama o Ieova, ma iʻu ai ina faavaatuʻia lo latou faatuatua i mea e pei o ni papa, o le matapeʻapeʻa, amioga lē mamā, po o le tetee i le upu moni. Ioe, e pei o le uluaʻi senituri, o nisi i aso nei “ua faavaatuʻia i latou i la le faatuatua.” (1 Timoteo 1:19; 2 Peteru 2:13-15, 20-22) Ua pei le lalolagi fou o le nofoaga o loo tatou agaʻi atu i ai. I le latalata tele mai o le lalolagi fou, pagā se iʻuga lē lelei pe a lē maua e se tasi le finagalo malie o Ieova!

ʻAlofia le ‘Faavaatuʻia o Lou Faatuatua’

I senituri ua teʻa, e mafai ona saogalemu se vaa a o folau i le vasa loloa, ae toe afāina lava ua taunuu i le uafu. O le tele o taimi, e faatoʻā iai lava lamatiaga i le faigāmalaga pe a lata le vaa i le laueleele. E faapena foʻi i le toʻatele, o le taimi e sili ona mataʻutia i le talafaasolopito o tagata, o “aso e gata ai” o lenei faiga o mea. O loo faamatala e le Tusi Paia nei aso o “aso faigatā,” aemaise lava mo Kerisiano tuuina atu.—2 Timoteo 3:1-5.

Aiseā ua faigatā ai nei aso e gata ai? Auā ua iloa e Satani “ua saasaa ona pō” e faasagatau ai i tagata o le Atua. O lea la, ua faatupulaʻia ana faiga mataʻutia e faavaatuʻia ai lo tatou faatuatua. (Faaaliga 12:12, 17) E ui i lea, o loo tatou maua pea le fesoasoani ma le taʻitaʻiga. O loo avea pea Ieova ma talita mo ē e utagiaina ana fautuaga. (2 Samuelu 22:31) Ua ia tuuina mai iā i tatou ni faaaʻoaʻoga o lamatiaga, lea e faaalialia ai togafiti atamai ma le leaga a Satani. Seʻi o tatou iloiloina ni faaaʻoaʻoga se lua, lea na aafia ai le nuu o Isaraelu a o latou tau lata atu i le Nuu o le Folafolaga.—1 Korinito 10:11; 2 Korinito 2:11.

Ua Latalata i le Nuu o le Folafolaga

I le taʻitaʻiga a Mose, na mafai ai e tagata o Isaraelu ona sosola mai Aikupito. E leʻi umi, ae latou latalata loa i le tuaoi i saute o le Nuu o le Folafolaga. Na auina atu e Mose ni tamāloloa e toʻasefulu lua e asiasia le nuu. E toʻasefulu na lē faatuatua ma toe foʻi mai ma ni lipoti faavaivai loto, i le latou faapea mai, e lē mafai ona manumalo Isaraelu i tagata o Kanana ona “o tagata tino eese lava i latou,” toe malosi a latou vaegaau. Na faapefea ona aafia tagata Isaraelu i lenā mea? Na amata ona muimui tagata Isaraelu iā Mose ma Arona, i le  latou faapea mai: “Se a ea le mea ua au mai ai Ieova iā te i matou i lenei nuu ia oti i le pelu, e avea foʻi o matou fafine ma o matou tama iti o tagata o taua? . . . Seʻi tatou tofia so tatou taʻitaʻi, ma tatou foʻi atu i Aikupito.”—Numera 13:1, 2, 28-32; 14:1-4.

Seʻi manatu foʻi! O tagata lava nei na molimauina le faaoo ane e Ieova i le nuu malosi o Aikupito—le malo e aupito i malosi i le lalolagi i lenā taimi—lona faaumatiaga e ala mai i mala mataʻutia e sefulu ma le vavega mataʻutia i le Sami Ulaula. Ua taatia mai le Nuu o le Folafolaga i o latou luma, ona latou agaʻi atu lea e pei o se vaa o loo agaʻi atu i se molī e iloa ai le mea e taunuu i ai. Nai lo lea, na latou talitonu e lē mafai e Ieova ona faatoʻilalo le nuu fevaevaeaʻi toe faatauvaa o Kanana. Pagā se lē fiafia o le Atua ma le ʻauasiasi totoa o Iosua ma Kalepo, i lenā lē faatuatua, ona sa la manatu o Kanana o se “mea e ʻai mā [Isaraelu]”! Na iā i laʻua uluaʻi faamatalaga, ona sa la āsā Kanana atoa. Ina ua lē ulu atu tagata i le Nuu o le Folafolaga, na faaauau foʻi ona iai Iosua ma Kalepo i le vao mo le faitau sefulu o tausaga, ae la te leʻi feoti i inā faatasi ma ē leai se faatuatua. Na fesoasoani Iosua ma Kalepo e taʻitaʻi ese le tupulaga fai aʻe mai le vaomatua ma agaʻi atu i le Nuu o le Folafolaga. (Numera 14:9, 30) I le latou latalata atu faalua i le Nuu o le Folafolaga, o le a ese tofotofoga e fesagaʻi ma Isaraelu. O le a faapefea ona latou tali atu?

Na taumafai le tupu o Palako e faamalaia Isaraelu e ala i le perofeta pepelo a Palaamo. Peitaʻi, na faalavelavea e Ieova lenei faufauga leaga e ala i le fai atu o Palaamo o ni faamanuiaga nai  lo o le faamalaiaina. (Numera 22:1-7; 24:10) E leʻi fiu Palaamo, na ia toe faia se isi fuafuaga leaga, e ala i le fuafuaina o se auala e lē agavaa ai tagata o le Atua i le mauaina o le nuu. E faapefea? E ala i le faatosinaina o i latou i le faia o amioga lē mamā ma le tapuaʻi iā Paala. E ui e leʻi taulau atoatoa lenei fuafuaga, ae sa mafai ona maileia ai le 24,000 o tagata Isaraelu. Na latou faia feusuaʻiga lē mamā ma fafine o Moapi, ma faatasia foʻi i latou ma Paalapeoro.—Numera 25:1-9.

Seʻi manatu i lenei mea! O le toʻatele o na tagata Isaraelu, na molimauina le taʻitaʻia ma le saogalemu e Ieova o i latou i le “vao uma e lautele ma le mataʻutia.” (Teuteronome 1:19) E ui ua latou latalata atu i le latou tofi, ae na lolo atu le 24,000 o tagata o le Atua i tuʻinanauga o le tino ma feoti ai i aao o Ieova. O se lapataʻiga lenei mo auauna a le Atua i aso nei, a o latou lalata atu i le mauaina o le tofi e aupito i tāua!

I ana taumafaiga mulimuli e teena auauna a Ieova i aso nei mai le mauaina o le latou taui, e lē manaʻomia e Satani ona suia ana metotia. Na ia faaaogāina metotia e pei o le taimi muamua na latalata atu ai Isaraelu i le Nuu o le Folafolaga, na taumafai Satani e faaoo iā i latou le fefe ma le masalosalo, e ala atu i le taufaamataʻu, sauāga, po o tauemuga. Ua lolo atu nisi Kerisiano i na taufaamataʻuga. (Mataio 13:20, 21) O se isi metotia ua faaaogā e Satani, o le faaleagaina lea o amioga tatau. I nisi o taimi, ua ō mai nisi i totonu o le faapotopotoga Kerisiano ma ni uunaʻiga sesē, ma taumafai e faavaivaia atili ē o loo vaivai faaleagaga, ma ē o loo lē savavali ma le mautinoa i le malamalama mai le Atua.—Iuta 8, 12-16.

Mo ē matutua faaleagaga ma ē mataala, ua avea le matuā paū maulalo o le tulaga tau amio a le lalolagi, ma se māfuaaga tatau e iloa ai le malolosi o taumafaiga a Satani. Ioe, ua iloa e Satani ua toeitiiti ona ia lē toe mafaia lea ona fai se mea i auauna faamaoni a le Atua. O le taimi la lenei e tatou te tumau ai i le mataala faaleagaga mai taumafaiga a Satani.

Fesoasoani Ina ia Mataala Faaleagaga

Na faamatalaina e le aposetolo o Peteru afioga faavaloaga a le Atua, “o se molī e mumū i le mea pogisa,” auā e mafai ai e Kerisiano ona maua le utaga mamao i auala e faagaoioi ai fuafuaga a le Atua. (2 Peteru 1:19-21) O ē ati aʻe le naunau mo le Tusi Paia ma faaauau ona taʻitaʻiina ai i latou, o le a latou mātauina le faatonutonuina e Ieova o o latou ala. (Faataoto 3:5, 6) O le faatumulia o i latou i le faamoemoe, ua ‘alalaga ai ana auauna ona o le loto fiafia,’ a o i latou e lē iloa Ieova pe tuua foʻi ona ala, o le a lagona le “loto tigā” ma le “loto momomo.” (Isaia 65:13,14) O le tinoū e suʻesuʻe le Tusi Paia ma faatatau mea ua tatou aʻoaʻoina, o le a mafai ai ona tatou uaʻi atu i le faamoemoe mautinoa nai lo mea faafiafia lē tumau o lenei lalolagi.

E matuā tāua le tatalo ina ia tumau ona mataala faaleagaga. Na faapea mai Iesu e faatatau i le iʻuga o lenei faiga o mea: “O lea ia outou mataala e lē aunoa ma tatalo ina ia outou maua le malosi e sao mai ia mea uma ua tali oo mai, ma ia tutū i luma o le Atalii o le tagata.” (Luka 21:34-36) Mātau, na faaaogā e Iesu le upu “tatalo.” Na silafia e Iesu le faigofie ona lamatia le ola faavavau i nei aso faigatā. Po o atagia i au tatalo le malosi o ou faanaunauga e tumau i le mataala faaleagaga?

Aua nei galo e aupito i tele lamatiaga i vaega mulimuli o le faigāmalaga i lo tatou tofi. E tāua tele le aua neʻi teʻa ese mai i o tatou mafaufau le malamalama lea e oo ai i le faaolataga.

Ia Nofouta i Malamalama Sesē

I vaitaimi a o faaaogā vaafailā e folau ai, sa iai se lamatiaga mai tamāloloa amioleaga, o ē fiafia i pō e leai ai se masina ma faigatā ai i ʻauvaa ona iloa atu le paʻu mātū. Latou te tuuina ni molī i vaega o le sami e iai ni lamatiaga,  ina ia faasesē ai le kapeteni ma suia ai le alāvaa. O i latou e faasesēina atonu e tuʻia le latou vaa, paʻuʻū oloa i le sami, ma feoti ai nisi.

E faapena foʻi Satani, e taufaasesē i lona avea ma “agelu o le malamalama” ma o loo ia manaʻo e aveese mai tagata o le Atua i le latou faiā ma Ia. E ono faaaogā e le Tiapolo “aposetolo pepelo” ma i latou ua liliu ese mai le upu moni ma faapea mai o “auauna a le amiotonu” e faasesē ai ē lē o mataala. (2 Korinito 11:13-15) E pei o se kapeteni ma le ʻauvaa e mataala toe iai le poto masani, e seāseā faasesēina i latou i molī taufaasesē, o Kerisiano o ē “ua masani ona lagonaina ua aʻoaʻo sooina e iloa ai le lelei ma le leaga,” e lē faasesēina i latou e tagata o loo faalauiloa aʻoaʻoga pepelo ma filosofia e tigā ai.—Eperu 5:14; Faaaliga 2:2.

E faaaogā e ʻauvaa se lisi o molī o le āva latou te tau atu ai i alāvaa. E iai i lenei lisi mea e patino i molī o āva taʻitasi, e aofia ai ma ona faailoilo e iloga ai pe ese mai ai. Na faapea mai le tusi The World Book Encyclopedia: “E iloilo e ʻauvaa po o lē fea molī o le āva o loo latou iloa atu, ma iloa ai le latou tulaga, e ala i le mātauina o foliga vaaia o se molī o le āva ma faatusatusa i le lisi.” I se tulaga talitutusa, o loo fesoasoani le Tusi Paia i tagata loto faamaoni e iloa le tapuaʻiga moni ma i latou o loo faamuamuaina, aemaise lava i nei aso e gata ai lea ua faasilisiliina ai Ieova i luga o tapuaʻiga sesē. (Isaia 2:2, 3; Malaki 3:18) I le faia o se faaeseesega i le tapuaʻiga moni ma tapuaʻiga pepelo, o loo faapea mai le Isaia 60:2, 3: “E ufitia le lalolagi i le pōuliuli, e ufitia foʻi nuu i le pogisa; ae afio aʻe Ieova i oʻu luga, ma le pupula o Ieova e aliali mai lea i oʻu luga. E ō mai nuu ese i lou malamalama, o tupu foʻi e ō mai i latou i le pupula o lou alu aʻe.”

A o faaauau e le faitau miliona mai atunuu eseese ona taʻitaʻia i le malamalama o Ieova, o le a lē faavaatuʻia lo latou faatuatua i lenei vaega mulimuli o le faigāmalaga. Na i lo lea, o le a latou faimalaga ma le saogalemu i aso o loo totoe o lenei faiga o mea, ma oo atu i le filemu o le lalolagi fou.

[Faaopoopoga i lalo]

[Ata i le itulau 15]

I le pei o ʻauvaa, e faaeteete Kerisiano ina neʻi faasesēina i latou i malamalama sesē