O le Tusi Muamua a Ioane 1:1-10
1 Ua matou tusi atu iā te outou e faatatau i lē na iai mai le amataga, o le upu o le ola+ lea na matou faalogologo i ai, ma vaavaai i ai o matou mata, na matou uaʻi atu i ai ma fetagofi i ai o matou lima,
2 (ioe, ua faaalia mai le ola, na matou vāai ma molimau i ai,+ ma faamatala atu iā te outou le ola e faavavau+ mai i le Tamā, ma ua faaalia mai iā i matou),
3 o loo matou faamatala atu foʻi iā te outou o mea na matou vāai ma faalogo i ai,+ ina ia outou mafuta faatasi ai ma i matou. E lē gata i lea, o loo tatou mafuta faatasi ma le Tamā ma lona Alo o Iesu Keriso.+
4 O lea foʻi ua matou tusi atu ai nei mea, ina ia atoatoa ai lo tatou olioli.
5 O le feʻau lenei ua matou faalogo ai mai iā te ia ma o loo matou faalauiloa atu iā te outou: O le Atua o le malamalama,+ ma e leai lava se pōuliuli o iā te ia.*
6 Afai e tatou te faapea atu, “Ua tatou mafuta faatasi ma ia,” ae o loo tatou savavali pea i le pōuliuli, ua tatou pepelo ma e tatou te lē o faatatauina le upu moni.+
7 Ae afai o loo tatou savavali i le malamalama e pei foʻi ona iai o ia i le malamalama, ona tatou mafuta faatasi ai lea o le tasi ma le isi, e faamamāina foʻi i tatou mai i agasala uma i le toto o lona Alo o Iesu.+
8 Afai e tatou te faapea atu, “E leai sa tatou agasala,” ua tatou faasesēina i tatou lava+ ma e lē o i totonu iā i tatou le upu moni.
9 Afai e faailoa atu a tatou agasala, e faamaoni ma amiotonu o ia e na te faamagaloina a tatou agasala, ma faamamāina ai i tatou mai i amioga lē tonu uma lava.+
10 Afai e tatou te faapea atu, “E tatou te leʻi agasala lava,” ua tatou faia ai o ia ma pepelo, ma e lē o i totonu iā i tatou lana afioga.
Faamatalaga Pito i Lalo
^ Po o le “pōuliuli e autasi ma ia.”
