O le Tusi Lona Lua i le Faapotopotoga i Korinito 4:1-18
4 O le mea lea matou te lē faavaivai ai, talu ai ua tuuina mai iā i matou lenei faiva, e tusa ma le alofa mutimutivale na faaalia mai iā i matou.
2 Ae ua matou lafoaʻia mea pepelo e māsiasi ai, ua lē savavali ma le faapiʻopiʻo pe faafilogia foʻi le afioga a le Atua;+ ae ua matou faailoa atu le upu moni, ma ua fai i matou ma faaaʻoaʻoga lelei i lotofuatiaifo o tagata uma i le silafaga a le Atua.+
3 O le mea moni, afai ua ufitia le tala lelei o loo matou talaʻia atu, ua ufitia i ē e faaumatia,
4 o ē e lē talitonu, o i latou ia ua faatauasoina o latou manatu e le atua o lenei faiga o mea a le lalolagi,*+ ina neʻi susulu atu iā i latou le malamalama+ o le tala lelei matagofie e uiga iā Keriso, o ia o le faatusa o le Atua.+
5 Auā e matou te lē o talaʻia i matou lava, a o Iesu Keriso o le Alii lea ma o i matou o a outou pologa ona o Iesu.
6 Auā o le Atua o lē na fetalai: “Ia susulu atu le malamalama mai i le pogisa,”+ ma ua faasusulu mai e ia i o matou loto, ina ia malamalama+ ai i le poto faamamaluina o le Atua e ala i fofoga o Keriso.
7 Peitaʻi, ua iā i matou lenei ʻoa+ i ipu omea,+ ina ia matou maua le mana lea e sili atu i le malosi o tagata, o le mana lea e mai i le Atua, ae e lē mai iā i matou lava.+
8 Ua matuā omia i matou i puapuaga, ae e lē taofiofia ai; ua fememeaʻi i matou, ae e lē matuā fememeaʻi ai;+
9 ua sauāina i matou, ae e lē tuulafoaʻiina ai;+ ua lafotūina i matou, ae e lē faaumatia ai.+
10 E onosaia pea e o matou tino faiga leaga e oti ai na oo iā Iesu,+ ina ia faaalia i o matou tino le soifuaga o Iesu.
11 Auā o i matou o loo ola, ua fesagaʻi pea i taimi uma ma le oti+ ona o Iesu, ina ia faaalia ai i o matou tino augavale le soifuaga o Iesu.
12 O lea, ua galue le oti i totonu o i matou, a o le ola i totonu o outou.
13 O lenei, ona ua iā i matou lea lava agaga o le faatuatua e pei ona tusia: “Ua ou faatuatua, o le mea lea ou te tautala atu ai”;+ ua matou faatuatua foʻi, o le mea lea matou te tautatala atu ai,
14 i le iloa o Lē na faatūina Iesu e na te faatutūina foʻi i tatou ina ia autasi ma Iesu, ma tuuina atu i matou faatasi ma outou.+
15 Auā o nei mea uma e mo lo outou lelei, ina ia faateleina le agalelei faifua ma saga faateleina pea, ona ua toʻatele atu tagata ua faafetai atu i le Atua, ma faamamaluina ai o ia.+
16 O le mea lea tatou te lē faavaivai ai, ae e ui lava ina tauau ina uma atu lo tatou tagata i fafo, ae ua faafouina pea lo tatou tagata i totonu i lea aso ma lea aso.
17 E ui lava e puupuu ma māmā puapuaga,* ae e iʻu ai ina maua e i tatou le mamalu, o le mamalu e matuā silisili atu* ma e faavavau;+
18 a o taulaʻi atu la tatou vaai i mea e lē vaaia ae e lē o mea e vaaia.+ Auā o mea ua vaaia e lē tumau ia, a o mea e lē o vaaia e faavavau ia.
