Numera 13:1-33
13 Ona fetalai mai lea o Ieova iā Mose e faapea:
2 “Ia aauina atu ni tane e ō faalilolilo e mataʻi le laueleele o Kanana, lea o le a ou avatu i le fanauga a Isaraelu. O tane taʻitasi tou te aauina atu, ia fai ma sui o le ituaiga o lona tamā, e taʻitasi foʻi ma fai ma taʻitaʻi+ iā i latou.”+
3 O le faatonuga a Ieova ua aauina atu ai e Mose i latou mai i le toafa o Parana.+ O tane uma o ulu ia o le fanauga a Isaraelu.
4 O o latou igoa nei: o Samua le atalii o Sakuro, mai i le ituaiga o Reupena;
5 o Safata le atalii o Hori, mai i le ituaiga o Simeona;
6 o Kalepo+ le atalii o Iefune, mai i le ituaiga o Iuta;
7 o Ikalo le atalii o Iosefa, mai i le ituaiga o Isakara;
8 o Hosea+ le atalii o Nuno, mai i le ituaiga o Efaraima;
9 o Paleti le atalii o Rafo, mai i le ituaiga o Peniamina;
10 o Katieli le atalii o Soti, mai i le ituaiga o Sepulona;
11 o Kati le atalii o Suse, mai i le ituaiga o Iosefa+ mo le ituaiga o Manase;+
12 o Amueli le atalii o Kameli, mai i le ituaiga o Tanu;
13 o Seturi le atalii o Mikaele, mai i le ituaiga o Asera;
14 o Naepi le atalii o Vapese, mai i le ituaiga o Nafatali;
15 o Keueli le atalii o Maki, mai i le ituaiga o Kato.
16 O igoa ia o tane ua aauina atu e Mose e ō faalilolilo e mataʻi le atunuu. Ua faaigoa e Mose Hosea le atalii o Nuno, o Iosua.*+
17 Ina ua aauina atu faalilolilo i latou e Mose e mataʻi le laueleele o Kanana, ua ia fai atu iā i latou: “Ia outou ō aʻe i laufanua o Nekepi,* ma outou ō aʻe i vaega maugā.+
18 E ao ona outou vāai pe faapeʻī le laueleele+ ma tagata o loo nonofo ai, pe malolosi i latou pe vaivai, pe toʻatele foʻi i latou pe toʻalaiti;
19 ma pe faapeʻī le laueleele, pe lelei pe leaga, ma pe faapeʻī foʻi aai o loo latou nonofo ai, pe nonofo i faleʻie po o ni aai ua malupuipuia.
20 Ia vaai pe faapeʻī le fanua pe lauolaola* pe lafulafuā,*+ ma pe iai ni laau pe leai. E ao ona outou lototetele+ ma aumai ni fua o le fanua mai i lea laueleele.” O le taimi lea e maua ai uluaʻi fua matua o le laau o le vine.+
21 Ona latou ō aʻe faalilolilo lea e mataʻi le laueleele mai i le toafa o Tisina+ e oo atu i Reopa,+ e lata i Lepo-amato.*+
22 Ua latou ō aʻe mai i laufanua o Nekepi ma taunuu i Heperona,+ ua nonofo foʻi i inā Aimano, Sesai, ma Talemai,+ o tagata Anakima+ ia. Na fausia Heperona i le fitu tausaga muamua atu a o leʻi fausia Soana i Aikupito.
23 Ua latou oo atu i le vanu* o Esekolo,+ ona latou tā lea i lalo o se lālā ua iai le fuifui vine e tasi, lea na amoina e ni tamāloloa se toʻalua i se amo, faapea foʻi ni rimoni ma ni mati.+
24 Ua latou faaigoa lea mea o le vanu* o Esekolo,*+ ona o le fuifui vine na tā mai i inā e tagata Isaraelu.
25 I le faaiʻuga o aso e 40,+ na latou toe foʻi ai mai i le mataʻiina faalilolilo o le laueleele.
26 Ua latou toe foʻi atu iā Mose ma Arona, ma le faapotopotoga atoa o le fanauga a Isaraelu i Katesa,+ i le toafa o Parana. Ua latou taʻu atu le tala i le faapotopotoga atoa ma faaali atu iā i latou fua o le laueleele.
27 O le tala lea ua latou faamatala atu iā Mose: “Na matou ō atu i le laueleele na e aauina atu i ai i matou, ma e moni o loo tafe ai le suāsusu ma le meli,+ ma o fua nei o lona fanua.+
28 Peitaʻi, o tagata o loo nonofo ai i lea laueleele e malolosi, ma e tetelē o latou aai ua malupuipuia. Na matou vāai ai foʻi i tagata Anakima.+
29 O loo nonofo tagata Amaleka+ i le laufanua o Nekepi,+ ma o loo nonofo le ʻau Hetī, le ʻau Iepusē,+ ma le ʻau Amorī+ i vaega maugā, a o tagata Kanana+ o loo nonofo i le talafatai+ ma i tafatafa ane o Ioritana.”
30 Ua taumafai Kalepo e faafilemu tagata a o latou tutū i luma o Mose e ala i le faapea atu: “Ia tatou ō loa, ma fai mo i tatou le laueleele auā e mautinoa e tatou te manumalo ai.”+
31 Ae ua faapea mai tamāloloa na ō atu faatasi ma ia: “E lē mafai ona tatou ō aʻe e tau ma i latou, ona e latou te malolosi atu nai lo o i tatou.”+
32 Ua latou faamatala mai pea tala leaga i le fanauga a Isaraelu+ e uiga i le atunuu na latou ō atu faalilolilo e mataʻi ma faapea mai: “O le laueleele na matou malaga i ai e mataʻi faalilolilo, e faaumatia e le laueleele ē o loo nonofo ai, o tagata uma foʻi na matou vāai i ai e tinoeese i latou.+
33 Ioe na matou vāai i Nefilimi o atalii ia o Anaki,+ o ē e tupuga mai i Nefilimi, ma ua pei ai i matou o ni sē i o matou lava manatu, ma sa faapea foʻi i matou i o latou manatu.”
Faamatalaga Pito i Lalo
^ Lona uiga “O Ieova o le Faaolataga.”
^ Po o “le itu i saute.”
^ Epe., “paee.”
^ Epe., “lololo.”
^ Po o “i le mea e ulu atu ai i Amato.”
^ Po o le “ālia.”
^ Po o le “ālia.”
^ Lona uiga “Fuifui Vine.”
