Faamaumauga a Ioane 9:1-41
9 A o maliu ane o ia, ona ia silafia ai lea o se tamāloa na fanau mai ua tauaso.
2 Ua fesili mai ona soo iā te ia: “Le Aʻoaʻo e,*+ o ai na agasala, o le tamāloa lenei po o ona mātua, ua māfua ai ona fanau mai o ia ua tauaso?”
3 Ua tali atu Iesu: “E leʻi agasala lenei tamāloa po o ona mātua, ae ina ia faaalia ai galuega a le Atua e ala iā te ia.+
4 E tatau ona tatou faia galuega a Lē na auina mai aʻu manū o ao;+ e oo mai le pō, e lē mafai ona toe galue ai se tasi.
5 A o oʻu iai pea i le lalolagi, o aʻu o le malamalama o le lalolagi.”+
6 Ua uma ona fetalai atu o ia i nei mea, ona feanu lea i le palapala ma palu i ona fāua, ma nini ai mata o le tamāloa+
7 ma faapea atu iā te ia: “Inā alu ia e fufulu i le vai tāʻele o Seloa” (pe a faaliliuina “Ua Auina Atu”). Ona alu ai lea o ia ma fufulu, ma toe foʻi mai, ua pupula o ia.+
8 Ona faapea ane lea o tuaoi ma ē na vāai muamua iā te ia o ʻaisi: “Pe e lē o le tamāloa ea lenei na masani ona nofo ma ʻaisi?”
9 Ua fai mai nisi: “O ia lenei.” A o isi ua faapea mai: “E leai, ae e pei uma lava o ia.” Ae ua fai mai pea le tamāloa: “O aʻu lenei o ia.”
10 Ua latou faapea atu iā te ia: “Na faapefea la ona pupula ou mata?”
11 Ua tali mai o ia: “O le tagata e igoa iā Iesu, na ia palu le palapala ma nini ai oʻu mata, ma faapea mai iā te aʻu, ‘Alu i Seloa e fufulu ai.’+ Ona ou alu lea ma fufulu, ma ua ou pupula ai.”
12 Ua latou fai atu iā te ia: “O fea la o iai lenā tagata?” Ua tali mai o ia: “Ou te lē iloa.”
13 Ua latou taʻitaʻi atu le tamāloa na tauaso i le ʻau Faresaio.
14 O le aso lea sa palu ai e Iesu le palapala ma faapupula ai ona mata,+ o le aso tonu o le Sapati.+
15 O lea, ua fesili atu ai foʻi le ʻau Faresaio i le tamāloa pe na faapefea ona pupula ona mata. Ua ia fai mai iā i latou: “Na ia nini oʻu mata i le palapala, na ou fufuluina, ma ua ou vaai ai.”
16 Ona faapea ane lea o nisi o le ʻau Faresaio: “E lē mai i le Atua lenei tagata, auā na te lē tausia le Sapati.”+ Ae ua faapea ane isi: “E faapefea ona faia e se tagata agasala ni faailoga faapenei?”+ Ona fevaevaeaʻi ai lea o i latou.+
17 Ua latou toe fai atu i le tamāloa na tauaso: “O le ā sau tala e uiga i lenei tagata, o lē na faapupulaina ou mata?” Ua fai mai le tamāloa: “O ia o se perofeta.”
18 Peitaʻi, na faatoʻā talitonu tagata Iutaia na tauaso lenei tamāloa ma ua pupula, ina ua latou valaauina ona mātua.
19 Ua latou fesili atu iā i laʻua: “Po o la oulua tama ea lenei na lua fai mai na fanau mai o tauaso? Ae ua faapefea nei la ona pupula o ia?”
20 Ua tali mai ona mātua: “Ua ma iloa o la ma tama lenei na fanau mai o tauaso.
21 Ae ma te lē iloa pe na faapefea ona pupula o ia; e ma te lē iloa foʻi po o ai na faapupulaina ona mata. Ia fesili atu iā te ia. Ua matua o ia, ma e iloa lava e ia tali mai.”
22 Ua fai atu e ona mātua nei upu ona o le fefefe i tagata Iutaia,+ auā ua uma ona fai la latou tonu, o se tagata e faapea mai o Iesu o le Keriso, e faateʻaese o ia mai i le sunako.+
23 O le mea lenā ua fai atu ai ona mātua: “Ua matua o ia. Ia fesili atu iā te ia.”
24 Ona latou toe valaau atu lea i le tamāloa na tauaso, ma faapea atu iā te ia: “Ia e faamamaluina le Atua; ua matou iloa o lenā tagata o se tagata agasala.”
25 Ua fai mai o ia: “Ou te lē iloa po o ia o se tagata agasala. E pau le mea ou te iloa, na ou tauaso, a o lea ua ou pupula.”
26 Ona latou faapea atu lea iā te ia: “O le ā lana mea na fai iā te oe? Na faapefea ona ia faapupulaina ou mata?”
27 Ua ia tali mai iā i latou: “Ua faafia ona ou taʻu atu iā te outou, ae tou te lē faalogo. Aiseā la tou te toe fia faalogo mai ai? Pe tou te mananaʻo ea e avea outou ma ona soo?”
28 Ona latou faifai lea iā te ia ma faapea atu: “O oe o le soo o lenā tagata, a o i matou o soo o Mose.
29 Ua matou iloa na fetalai mai le Atua iā Mose, a o lenā tagata, matou te lē iloa pe e mai fea o ia.”
30 Ona tali mai lea o le tamāloa iā i latou: “O le mea e ofo ai, ona ua outou lē iloa pe e mai fea o ia, ae ua ia faapupulaina oʻu mata.
31 Ua tatou iloa e lē faafofoga le Atua i tagata agasala,+ ae afai e mataʻu se tasi i le Atua ma fai lona finagalo, e faafofoga o ia i lenā tagata.+
32 Talu mai aso anamua, e leʻi iai lava se tala e faatatau i se tasi ua faapupulaina mata o se tagata na fanau mai ua tauaso.
33 Ana lē mai i le Atua lenei tagata, e leai lava se mea e mafai ona ia faia.”+
34 Ua latou fai atu iā te ia: “Na e fanau mai ua tumu oe i le agasala, ae pe e te aʻoaʻo mai ea iā i matou?” Ona latou tulia lea o ia!+
35 Ua faafofoga Iesu ua latou tulia o ia, ma ina ua maua atu o ia e Iesu, ona ia fetalai atu lea: “Po ua e faatuatua ea i le Atalii o le tagata?”
36 Ua tali mai le tamāloa: “Lau susuga e, o ai o ia, ina ia ou faatuatua ai iā te ia?”
37 Ua fetalai atu Iesu iā te ia: “O lea ua e vaai iā te ia, ma o ia lea o loo tautala atu iā te oe.”
38 Ua fai mai o ia: “Le Alii e, ua ou faatuatua iā te ia.” Ona ifo lea o le tamāloa iā te ia.
39 Ua faapea atu Iesu: “O le faamasinoga lenei na ou sau ai i le lalolagi, ina ia vāai i latou e lē o vāai,+ ae ia faatauasoina i latou o loo vāai.”+
40 Ua faalogo atu le ʻau Faresaio o ē ua faatasi ma ia i nei mea, ona latou faapea mai lea: “Po ua matou tauaso ea foʻi?”
41 Ua faapea atu Iesu iā i latou: “Pe ana outou tauaso, semanū ua leai sa outou agasala. A o lenei ua outou fai mai, ‘Ua vāai i matou.’ O le mea lea, ua tumau ai pea la outou agasala.”+
Faamatalaga Pito i Lalo
^ Po o le “Rapi e.” Tagaʻi i le Uiga o Upu.
