Ee dandaanno. Qullaawu Maxaafi togoo dadille gargadhate assa hasiissannonkere assineemmo gede kaaˈlannonke. (Faarso 32:1-5) Soˈro loonsoommoha ikkironna soˈronkera addinta gaabbinoommoha ikkiro, Maganu maarannonke hattono sheshifanteemmo gede kaaˈlannonke. (Faarso 86:5) Qullaawu Maxaafi kulanno garinni, soˈronkera dadilla woy gaabba mito woyite dancha ikkitara dandiitanno. Hiitto? Korkaatuno bushare assa agurreemmo gedenna loonsoommo soˈro albillitte qorophineemmo gede kakkayissankera dandiitanno. (Faarso 51:17; Lawishsha 14:9) Ikkollana, Qullaawu Maxaafi quwa saˈne meessaneeto busha assa, miteekkine xaate hexxo dinoe woy Maganu albaanni xaate waagu dinoe yine heda gara ikkitinokkita kulanno. Hatto yine hendeemmoha ikkiro, ‘dadillunni kainohunni hexxo mudhinammora’ dandiineemmo.—2 Qorontoosi 2:7.

•  Dadilleho kaima ikkannori maa ikkara dandaanno?

•  Dadillu amadiero maa assa dandeemmo?

•  Dadillunna maarote daafira kultanno qummeeshshuwa

 Ninkeneeto busha assineemmo gedenna dadillineemmo gede assannonkehu bacu coyi no. Banxeemmo manna koffi assinoommoti woy agadha hasiissannonke seera diingoommoti leeltankera dandiitanno. Mito woyite kayinni, mittoreno hunnummokki ninkeneeto busha assinammora dandiineemmo. Lawishshaho, uminkera quwa saino seera fushshiˈnoommoha ikkiro, hakkonne seera wonsha hoongummo kiiro dadillinammoranna ninkeneeto busha assinammora dandiineemmo; tini kayi hasiissannokki gaabbooti. Qullaawu Maxaafi uminkewiinni quwa sainore agadhineemmokki gede amaalannonkehu iseraati.​—Rosiisaancho 7:16.

 Dadillunni hiiqqante hunquffi yite gatantenni, hunoottore taashshate dandaamihere assi. Hiittoonni?

•   Soˈrokki ammani. Maganu Yihowa a maarannohe gede huuccattotenni xaˈmiˈri. (Faarso 38:18; Luqaasi 11:4) Aagintaabbe higittoronna godowinta gaabbittoro hattono loosootto soˈro ledde loosattokki gede qorophattoha ikkiro, Maganu huuccattokki macciishshe gatona yaannoheta addaxxa dandaatto. (2 Duduwo 33:13; Faarso 34:18) Isi mannu afa dandaannokkita giddoyidi ayimmakki laˈˈanno. Maganu bushare assa hoogate sharrammanna laˈˈanno woyite, “isi ammanaminohanna keeraancho ikkinohura, cubbonke baala agurannonke.”—1 Yohaannisi 1:9; Lawishsha 28:13.

   Hige wole manna koffi assoottoha ikkiro, soˈrokki ammananna hakkonne mancho maaro xaˈmiˈra hasiissannohe. Hatto assa shota ikkitannokkiti egennantinote! Tennera worbanna umokki heeshshi assattoha ikka hasiissannohe. Ikkirono godowinta maaro xaˈmiˈra lame dancha guma laaltanno: Ate aaninni duhu hoˈlanno gede assitanno; hattono keeru kalaqamanno gede kaaˈlitanno.​—Maatewoosi 3:8; 5:23, 24.

•   Maganu maaro daafira kultanno qummeeshshuwa hiinci. Lawishshaho, hanni 1 Yohaannisi 3:19, 20 yitannore laˈno. Qummeeshshu ‘Wodaninke “Busha assitino”’ yaankera dandaannota kulanno; hatto yaano Maganu baxille afiˈra dihasiissannoeho yine ninkeneeto quwa saˈne bushiinsheemmoha ikkara dandaanno. Ikkollana kuni qummeeshshi, “Maganu wodaninkera [aliidihono]” yaanno. Maganu wodaninkera aliidiha ikkinohu ma garinniiti? Isi ninke daafira woˈmankare afino; qoleno giddiidinke hedonna laanfenke seekke afino. Guuntete xeˈne noonkere ikkine ilammoommo daafira, cubbo loosa rakkannonketano afino. b (Faarso 51:5) Hakko daafira, cubbinsara addinta gaabbite higgannore isi dimishanno.​—Faarso 32:5.

•   Sainore calla heddooti. Qullaawu Maxaafi, bushare assanni heeˈre kae gedensoonni soorrame woyyaawinohu batinyu manni noota kulanno. Kuri giddo mittu gedensoonni soqqamaasincho Phaawuloosi yinoonnihu Xerseesi Saawuliiti. Isi Farisicha ikkino daafira, Yesuusi rosaano beebba assiˈrino. (Soqqamaasinete Looso 8:3; 9:1, 2, 11) Ikkollana, isi Maganonna Buuramino Moote Kiristoosa xiiwanni noota afihu gedensaanni, aagintaawe higino, ikkitosi agurino, hattono lawishsha ikkanno Kiristaancho ikkino. Hige Phaawuloosi albi soˈrosira lowo geeshsha gaabbino; kayi sainore calla dihedino. Isi Maganu jawa maaro leellishinosita afino daafira, diinaggaawe sabbakannoha ikkino; qoleno hegere heeshsho hexxo illachishino.—Filiphisiyusi Sokka 3:13, 14.

 Ermiyaasi 31:34: “Saonsano agureemmonsa. Hakkunni gedensaanni cubbonsa diqaageemmo.”

 Tiro: Maganu gatona yiinkehu gedensaanni, cubbonke wirro dikayisanno. Isi gatona yaanno woyite, godowinta gatona yaanno.