1. Kalaqaanchinke daafira maa rosiinsoonnihe?

HALAALU mine lophoottoha ikkiro, Yihowa daafira anjekkinni kayisse rosoottoha ikkara dandaanno. Hatto ikkiro, Yihowa Kalaqaancho ikkinota, baxissanno akatta noositanna mannu oosora kaajjare hedinota rosiinsoonnihe.—Kal. 1:1; Soq. 17:24-27.

2. Kalaqaanchu noota ammananno manna mitootu hiittooho yitanno?

² Ikkollana, batinyu manni Maganu Kalaqaancho ikkinota agurina noota nafa diammananno. Hatteentenni, kuni manni heeshsho umisenni daggino, hattono ciiggaadda lubbuwa sunu sununni soorrante jajjabba ikkitino yee ammananno. Konni manni giddo mitu lowo roso rosinoho. Insa Qullaawu Maxaafi yaannori soˈro ikkinota sayinse buuxissino yitanno; qoleno, Kalaqaanchu no yee ammananno manni egenno xeˈinoho, gowwahonna shiimurinni dogamannoho yitanno.

3. Ammananke kaajjishiˈra hasiissannonkehu mayiraati?

³ Lowo roso rosinohu mitu manni yaannori Yihowa baxillaancho Kalaqaanchonke ikkinota huluullammeemmo gede assannonke? Huluullammeemmo gede assannonkeno diassannonkeno yaate, Yihowa Kalaqaancho ikkinota ammannoommohu mayiraatiro heda hasiissannonke. Yihowa Kalaqaancho ikkinota ammannoommohu mannu kulinonke daafiraatinso, yanna gaaˈmine ninke uminke taje xiinxallinoommo daafiraati? (1 Qor. 3:12-15) Yihowa Farciˈraasine ikkine keeshshinoommo diri ikki geeshshihano ikkiro, ninke baalunku ammananke kaajjishiˈrate sharrama agura dihasiissannonke. Hatto assineemmoha ikkiro, Maganu Qaale ammanannokki manni coyiˈrannoti ‘mannu hayyonna awaawurshi’ didogannonke. (Qol. 2:8; Ibi. 11:6) Konni birxichira (1) batinyu manni Kalaqaanchu noota ammanannokkihu mayiraatiro, (2) Kalaqaanchikkira Yihowara noohe ammana kaajjishiˈra dandaattohu hiittoonniitiro, hattono (3) ammanakki  woˈmanka woyite kaajjite heedhanno gede assiˈra dandaattohu hiittoonniitiro ronseemmo.

4. Ibiraawoota 11:1 kultanno garinni, addu ammana mayi aana xintantinote?

⁴ Mitu mannira, ammanate yaa mitto coye taje nookkiha ammana lawannonsa. Ikkollana, Qullaawu Maxaafi kulanno garinni hatti addu ammana diˈˈikkitino. (Ibiraawoota 11:1 nabbawi.) Qullaawu Maxaafi ammana tajete aana xintantinota ikkitinota kulanno. Hakko daafira, Yihowa, Yesuusanna gordu Gashshoote illetenni laˈˈa dandiineemmokkiha ikkirono, noota buuxissannoti ammansiissanno taje no. (Ibi. 11:3) Gedensoonni Yihowa Farciˈraasincho ikkinohu mittu sayinsete egennaami togo yiino: “Ammananke tajete aana xintantinote ikkinnina sayinse buuxxino halaale gibbannota diˈˈikkitino.”

5. Batinyu manni heeshsho umisenni daggino yee ammanannohu mayiraati?

⁵ Kalaqaanchu noota buuxissannoti ammansiissanno taje heedhuna, batinyu manni heeshsho noore kalaqinohu Magano ikkinota ammanannokkihu mayiraati? Mitootu ammantannokkihu taje uminsa xiinxallite egentinokki daafiraati. Xa Yihowa Farciˈraasincho ikkinohu Rooberti togo yiino: “Rosu mine, heeshsho dagginohu kalaqanteeti yinannire horo ronse diegenninoommo. Hakko daafira, heeshsho kalaqinohu no yinanniti kapho labbinoe. Lemiina lamu dirihu heeˈre, Yihowa Farciˈraasine ledo hasaawe Kalaqaanchu noota buuxissannota ammansiissanno taje Qullaawu Maxaafinni huwatammo geeshsha, tenne dibuuxoommo.” *—“ Annahonna Amate Uyinoonni Amaale” yitanno saaxine lai.

6. Mitu manni Kalaqaanchu noota ammanannokkihu mayiraati?

 ⁶ Mitootu Kalaqaanchu noota ammantannokkihu ‘Laˈnoommore calla ammanneemmo’ yitanno daafiraati. Noore coyiˈniro kayinni, kuni manni illete leellannokkire, lawishshaho bubbe noota ammanannoho. Qullaawu Maxaafi giddo kulloonni ammanano, ‘illete leellannokkihu’ wolu coyino noota ‘buuxissanno’ taje aana xintantinote. (Ibi. 11:1) Noo taje xiinxalle buuxiˈrate yannanna sharro hasiissanno; duuchu mannira kayinni tenne assate hasatto dinonsa. Yanna gaaˈme taje xiinxallinokki manchi Maganu dino yaara dandaanno.

7. Kalqete alame kalaqinohu Magano ikkinota lowo roso rosino manni baalunku diammananno yaateni? Xawisi.

⁷ Mite sayinsete fullahaano taje xiinxallituhu gedensaanni, kalqete alame kalaqinohu Magano ikkinota ammantino. * Aleenni qummi assinihu  Rooberti gede, mitootaho Kalaqaanchu nookkiha lawinonsahu rosu mine heeshsho dagginohu kalaqanteeti yine rosiinsanna macciishshitinokki daafiraati. Ikkollana, batinyu sayinsete egennaammi Yihowa afanna baxa dandiitino. Kuri sayinsete egennaammi assitunte gede, ronsoommo rosi ikki geeshshihano ikkiro, ninke baalunku Maganoho noonke ammana kaajjishiˈra hasiissannonke. Ninkera yee konne assankera dandaannohu dino.

8-9. (a) Kawiinni aanchine hiittee xaˈmo laˈneemmo? (b) Kalaqamu daafira xiinxallakki kaaˈlitannohehu hiittoonniiti?

⁸ Kalaqaanchoho noohe ammana kaajjishiˈra dandaattohu hiittoonniiti? Hanni tenne assa dandaattota shoole doogo laˈno.

⁹ Kalaqamu daafira xiinxalli. Saada, muˈronna beeddahe hixamanyite laˈe Kalaqaanchoho noohe ammana kaajjishiˈra dandaatto. (Far. 19:1; Isa. 40:26) Kalaqamu daafira xiinxallitto deerrinni, Yihowa Kalaqaancho ikkinota albinni roore ammanatto. Borronke giddo addi addi kalaqami daafira kultannoti babbaxxitino birxichuwa fultanno. Togoo birxichuwa seekkite huwata qarra ikkituhero nafa, waajjite nabbawa agurtooti. Dandiitto geeshsha huwatate woˈnaali. Qoleno, muli dirrara qoqqowu gambooshshiwa fultinota kalaqamu daafira kultannota baxissanno viidiyubba jw.org aana galagalte laˈˈa habbooti.

10. Kalaqamu Kalaqaanchu noota buuxisanno gara lawishsha horoonsidhe kuli. (Roomu Sokka 1:20)

¹⁰ Kalaqamu daafira xiinxallatto woyite, kalaqamu Kalaqaanchu daafira maa rosiisannonkero huwatate woˈnaali. (Roomu Sokka 1:20 nabbawi.) Lawishshaho, arrishsho heeshshote hasiisanno iibbille uyitannotano agurranna, ise giddonni gawajjitanno caangeno fultanno. Tini caange gawajjitannonkekki gede agarannonkeri hasiisannonke. Qoleno agarannonkeri noonke! Mayi? Baatto, wonqote gede ikkite guggushshitannota oozoonete karo afidhino; tini oozoonete yinanni ayyare arrishshotewiinni daggannota gawajjitanno caange filte gatissanno. Arrishshotewiinni daggannoti gawajjitanno caange lexxitu kiiro, oozoonete karono lexxitanno. Ikkina tenne hedatto woyite, oozoone konni garinni agartannonke gede asse kalaqinohu baxillaanchunna hayyichu Kalaqaanchi nooha dilawannohe?

11. Kalaqamu daafira kultannota ammana kaajjishshanno taje hiikkiinni afiˈra dandiineemmo? (“ Ammana Kaajjishshannota Mite Borronna Viidiyo” yitanno saaxine lai.)

¹¹ Kalaqamu daafira kultannota ammana kaajjishshanno taje afiˈrate, Yihowa Farciˈraasineta Xiinxallote Kaaˈlitanno Borro horoonsidhe xiinxallanna jw.org aana hasiˈra dandaatto. Balaxxe “Kalaqinohu no?” (Amaaru Afoo) yitannota aante aantete fultanno birxichuwanna viidiyubba nabbawanna laˈˈa hasiˈrattoha ikkara dandaanno. Tini harammadda birxichuwanna viidiyubba saadatenna muˈrote daafira dhagge ikkanno coye haransite kultanno. Qoleno, sayinsete egennaammi kalaqamu aana laˈinore lawisse mitore loosate woˈnaaltanno gara xawissanno.

12. Qullaawa Maxaafa xiinxallineemmo woyite, wodancha hasiissannonkehu mitu coyi hiikkoyeti?

¹² Qullaawa Maxaafa xiinxalli. Gufo 4te kullihu sayinsete fullahaanchi, Kalaqaanchu noota umi qara ammana giwino. Gedensoonni kayinni ammanino. Isi togo yiino: “Ammaneemmo gede assinoehu sayinsetenni xiinxalloommore calla diˈˈikkino. Qullaawa Maxaafa seekke xiinxallaˈyano kaaˈlitinoe.” Qullaawu Maxaafi rosiisannore seekkite afoottoha ikkara dandaanno. Ikkirono, Kalaqaanchikkira noohe ammana kaajjitanno gede, Maganu Qaale agurittokki xiinxalla hasiissannohe. (Iya. 1:8; Far. 119:97) Lawishshaho, Qullaawu Maxaafi lowo diri albaanni ikkinore hili soˈro nookkiha tittire kulanno gara huwatate woˈnaali. Qoleno, Qullaawu Maxaafi giddo masaalleenna woˈmitinota addi addi masaalonna Qullaawu Maxaafi isi isiniiwa  sumuu yaanno gara wodanchate woˈnaali. Hatto assittoro, baxillaanchunna hayyichu Kalaqaanchi kalaqinonketanna Qullaawa Maxaafa borreessiisinohu iso ikkinota albinni roore ammanatto. *—2 Xim. 3:14; 2 Phe. 1:21.

13. Qullaawu Maxaafi amaale lowo geeshsha kaaˈlitannota leellishannohu mittu lawishshi hiikkonneeti?

¹³ Maganu Qaale xiinxallatto woyite, aanno amaale mageeshshi geeshsha kaaˈlitannotero wodanchate woˈnaali. Lawishshaho, Qullaawu Maxaafi lowo diri albaanni, woxe baxa gawajjitannotanna ‘huntannota’ kule qorowisiisino. (1 Xim. 6:9, 10; Law. 28:20; Mat. 6:24) Kuni qorowishshi yannankerano kaaˈlannoho? Yannankera noo manni ikkito kulannohu mittu maxaafi togo yaanno: “Xaphoomunni laˈniro, maalaamittete coyira hafuuranno manni gari geeshsha hagiirraamo diˈˈikkanno; roore yaadaameessa ikkanno. Lede woxe afiˈrate halchanno mannira nafa, hagiirrinsa baˈˈanno; qoleno insa wolu manninni roore fayyimma hooganno.” Konni daafira, Qullaawu Maxaafi woxu baxille qorophineemmo gede aannonke amaale lowo geeshsha kaaˈlitannote! Heeshshokkira kaaˈlinoheha wole Qullaawu Maxaafiha xintu seera qaagatto? Qullaawu Maxaafi amaale mageeshshi geeshsha kaaˈlitannoro huwantummo kiiro, baxillaanchu Kalaqaanchinke aannonketa woˈmanka woyite kaaˈlitanno amaale albinni roore addaxxineemmo. (Yai. 1:5) Hatto ikkiro, heeshshonke albinni roore hagiirru woˈminota ikkitanno.—Isa. 48:17, 18.

14. Qullaawa Maxaafa xiinxallakki Yihowa daafira maa afatto gede kaaˈlitannohe?

¹⁴ Qullaawa Maxaafa Yihowa seekkite afate mixidhe xiinxalli. (Yoh. 17:3) Qullaawa Borro xiinxallatto woyite, Yihowa ayimmanna akattasi afatto; tini akattasi kalaqamu daafira xiinxallite afootto akattasi ledo mittete. Yihowa akattare rosakki, isi addinta noo Magano ikkinota ammanatto gede assitannohe. (Ful. 34:6, 7; Far. 145:8, 9) Yihowa seekkite affanni haˈritto kiiro, isira noohe ammana lophitanni hadhanno, isira noohe baxilli lexxanno, hattono isi ledo noohe jaaloomi kaajjanno.

15. Ammanakki wolootaho kula kaaˈlitannohehu hiittoonniiti?

¹⁵ Maganoho noohe ammana wolootaho kuli. Tenne assatto woyite, ate umikki ammana kaajjitanno. Kayinni farciˈrootto manchi Maganu noota huluullamironna mayite qolattoro afa hoogittoro, maa assa dandaatto? Borronke giddonni Qullaawu Maxaafi aana xintantino dawaro afiˈrate woˈnaali; hakkiinni hakkuyi manchira afiˈrootto hedo kulisi. (1 Phe. 3:15) Qoleno ayyaanaamittetenni gikki yiino rodii kaaˈlannohe gede kuˈla dandaatto. Hasaawisootto manchi Qullaawu Maxaafinni qolattosi dawaro ammanirono ammana hoogirono, xiinxallakki atera kaaˈlitannohe. Ammanakki albinni roore kaajjitanno. Hakko daafira, hayyooletenna egennaammaho yinanni manni Kalaqaanchu dino yee rosiisannohu kaphu rosi didogannohe.

16. Ammananke woˈmanka woyite kaajjite heedhanno gede assiˈra hoongummoro hiikkitanno?

¹⁶ Yihowara soqqammanni keeshshinoommo diri ikki geeshshihano ikkiro, isira noonke ammana lossiˈranna kaajjishiˈra agura dihasiissannonke. Mayira? Qoropha hoongummoro, ammananke shoshshoggitara dandiitanno. Ammana illete leellannokki coye hawaqiˈra ikkitinota qaango. Illete leellannokki coye mulenni hambammora dandiineemmo. Phaawuloosi ammana hooga “mulenni xaxxawe amadannonke cubbooti” yiinohu iseraati. (Ibi. 12:1, NW) Tenne woshshaadonni gata dandiineemmohu hiittoonniitiyya?—2 Tes. 1:3.

17. Ammananke woˈmanka woyite kaajjite heedhanno gede maa assa hasiissannonke?

 ¹⁷ Umihunni, Yihowa qullaawa ayyaanasi aannohe gede, ganyite eeggifatte huucciˈri. Mayira yiniro, ammana qullaawu ayyaani laalo widooti. (Gal. 5:22, 23) Qullaawu ayyaanisi kaaˈlo hooggunkero, Kalaqaanchinkera ammana lossiˈranna kaajjite heedhanno gede assiˈra didandiineemmo. Yihowa ayyaanasi aannonke gede agurrummokki huucciˈneemmoha ikkiro, isi aannonke. (Luq. 11:13) ‘Ammana ledinke!’ yine nafa huucciˈra dandiineemmo.—Luq. 17:5.

18. Faarso 1:2, 3 kultanno garinni, hiittee elto afiˈra dandiineemmo?

¹⁸ Qoleno, Maganu Qaale ganyite xiinxalli. (Faarso 1:2, 3 nabbawi.) Tenne faarso borreessini waro, Israeelete daga giddo borreessinoonniha woˈma Maganu Seera afiˈrinohu shiima mannaatilla. Kuri giddo mitu mootetenna kakkalaasinete. Qoleno, lamalki lamalki diro Maganu Seera nabbambanna macciishshanno gede “labballo, meento, oosonna” insa mereero heeˈrannoha wole gobba manna gamba assinanni. (Mar. 31:10-12) Yesuusi warono, Qullaawa Borro xaaxo shiimu manni anganna xaadu minella heedhanno. Xaa yannara kayinni, rooru manni Maganu Qaale gama woy woˈma afiˈra dandaanno. Tini lowo eltooti! Tenne elto naandeemmota leellisha dandiineemmohu hiittoonniiti?

19. Ammananke kaajjite heedhanno gede assiˈrate maa assa hasiissannonke?

¹⁹ Maganu Qaale ganyine nabbambe, tenne elto naandeemmota leellisha dandiineemmo. Qullaawa Maxaafa yanna afiˈneemmo woyite calla nabbawantenni, hojju xiinxallora pirogiraame fushshiˈra hasiissannonke. Pirogiraamenke garinni ganyine xiinxallineemmoha ikkiro, ammananke kaajjite heedhanno gede assiˈra dandiineemmo.

20. Maa assate murciˈra hasiissannonke?

²⁰ Tenne alame ‘hayyoolenna egennaammi’ gede ikkikkinni, ninkera Maganu Qaali aana xintantinoti kaajjado ammana noonke. (Mat. 11:25, 26) Maganu Qaale xiinxallinoommo daafira, alamete ikkito roore bushshanni hadhanni noohu mayiraatironna Yihowa maa assara hedinoro anfoommo. Konni daafira, ammananke kaajjishiˈratenna dandaami deerrinni lowo manni Kalaqaanchonke ammananno gede kaaˈlate murciˈno. (1 Xim. 2:3, 4) Qoleno, uullate aana noo manni baalunku Yohaannisi Ajuuja 4:11 yitannore yee Yihowa guwisiˈranno yanna quqquxamme agadhino; qummeeshshu togo yaanno: “Mootichankenna Maganonke! Baalanka kalaqoottona, . . . atera ayirrinyu . . . [ikkohe]!”