Paypa yachachisqan tukuyta yanaparqa

Qallariymantapacha kunankama, may chhika runas kawsarqanku, chaywanpis wakillanmanta yuyarikunchik, astawan allinta kawsakunankupaq runasta sumaqta yanapasqankurayku.

SUTʼINCHARINAPAQ; sutʼiyayta jatarikuspa, luzta japʼichiytawan llamkʼayniykiman rinaykipaq wakichikuchkasqaykipi, llamkʼayniykiman micropi richkaspa ñawirinaykipaq juk librota chayri juk revistata apakusqaykipi, niraq wasiykimanta lluqsichkaspa kunkaykimanta sanoyakunaykipaq juk jampita ukyasqaykipi ima tʼukuriy. ¿Manachu corrienteta, papelta, libros imprimikunanpaq maquinasta, jampista ima rikhurichiqkunaman agradecesqaña kanayki kanman?

Michael Faraday Payqa, Gran Bretañapi 1791 watapi nacekurqa, payraykutaq kunan tiempopi wasinchikpi corriente tiyapuwanchik, imaraykuchus payqa corriente kananpaq wakin maquinasta rikhurichirqa.

Tsʼai Lun Payqa, China suyuta kamachiqkunamanta juknin karqa, yachakusqanmanjinataq 105 watapi papelta astawan usqhayta ruwakunanpaq yanaparqa.

Johannes Gutenberg Payqa 1450 watapi, wakin maquinasta ruwarqa, pisi qullqillawan libros imprimikunanpaq. Chayrayku kunan tiempopi imaymana libros, revistas ima runaspata tiyapun.

Alexander Fleming Payqa Escociapi nacekurqa, 1928 watapitaq juk sumaq jampita urqhurqa penicilina sutichasqata. Chaymantapachataq doctoresqa, sinchi unquykunata chay jampiwan atipanku.

Arí, wakin yachayniyuq runasrayku kunan tiemponpiqa, wasisninchikpi corriente, wakin aparatos ima tiyapuwanchik, jinallataq unquykunamanta sanoyakunanchikpaq wakin sumaq jampispis tiyapullawanchiktaq.

Chaywanpis unay tiempopi juk runa kawsakurqa. Payqa mana maquinastachu rikhurichirqa nitaq sumaq jampistapis rikhurichillarqataqchu. Chaywanpis tukuy yachayniyuq runasmanta astawan yachayniyuq karqa. Payqa juk wakcha familiapi uywakurqa, yaqha iskay waranqa watas ñawpaqtataq wañupurqa. Paypa yachachiykunasninqa, kunan tiemponchikkama runata yanapan. Chayrayku chiqamanta nisunman chay runaqa, tukuyta yanapasqanta.

Pimantachus parlachkanchik chay runaqa, Jesucristo. Qhipan yachaqanaspitaq imamantachus runasman yachachisqanta, imaynatachus yachachiykunasnin yanapawasqanchikta ima ukhuncharisunchik.