Chaywanpis celularta mana sumajta apaykachajtinku, kay llakiykunapi rikukunkuman:

• Khuska kanankumantaqa celular tʼojpirisqalla kankuman.

• Wasipiña kaspapis trabajashallankumanpuni.

• Manaña confianza kanmanchu, wasanchanakunkumantaj.

KHUSKA KASHASPA

Michael nin: “Wakin kutisqa señoraywan kashajtiy payqa ni qhawarillawanpischu. Payqa celularnin tʼojpirisqalla kashan. Niwantaj: ‘Mensajesniyta leeykusharqani, mana tiempituy karqachu mensajesniyta qhawaykunaypaj’”, nispa. Chaymanta parlaspa Jonathan nillantaj: “Wakin kutisqa uj qhariwarmi kikin lugarpi kajtinkupis, yuyayninkoqa wajpi kashanman”, nispa.

KAYPI PIENSARIY: Señoraywan chayri qosaywan parlarikushajtiyku, ¿mashkha kutitataj celular pantachiwayku? (EFESIOS 5:33).

TRABAJO

Wakin runasqa trabajonkurayku diantinta Internetman conectasqa kananku tiyan. Wakin trabajostaj mana chaykamatajchu. Jinapis wasiman chayajtinkuñapis trabajashallankupuni. Chaymanta parlaspa Lee sutiyoj runa nin: “Señoraywan kashajtiy trabajomanta wajyamuwajtinku, kutichinipuni. Chayri mensajesta apachimuwajtinku qhawaykunipuni”, nispa. Joy sutiyoj señora nillantaj: “Wasimantapacha trabajasqayrayku trabajollawan chʼisiyani. Chayrayku mayta kallpachakunay tiyan mana trabajollaman qokunaypaj”, nispa.

KAYPI PIENSARIY: Qosay chayri warmiy parlashawajtin, ¿allintachu uyarini? (LUCAS 8:18).

AMA WASANCHANAKUYCHEJCHU

Ashkha qhariwarmisqa ninku mayta chʼajwasqankuta, paykunamanta ujninku chʼinllamanta imatapis redes sociales nisqaman wicharichisqankumanta. Wakintaj ninku qosanku chayri warminku mana yachanallanta Internetman wakin imasta churasqankuta.

Ashkha runasqa yuyanku redes sociales nisqa qhariwarmispaj peligroso kasqanta. Imajtinchus wasanchanakuyta qallarinkuman. Chantapis wakin abogadosqa ninku redes socialespa juchanrayku ashkhas divorciakusqankuta.

KAYPI PIENSARIY: ¿Celularnejta wajkunawan parlasqayta qosaymanta chayri señoraymanta pakanichu? (PROVERBIOS 4:23).

QOSANCHEJWAN CHAYRI WARMINCHEJWAN PARLARINAPUNI

Mana allin mikhunasta mikhuspaqa llakiypi rikukusunman, onqosunmantaj. Ajinallataj qosanchejwan chayri warminchejwan mana parlarikojtinchejqa llakiypi rikukusunman (Efesios 5:28, 29).

Casado kausaypi allinta kausakunaykichejpaj nitaj celularllawan musphanaykichejpaj, parlarikuychej chayri qhelqaychej imatachus ruwanaykichejta.

• Diapi uj kutillatapis khuska mikhuriwajchej.

• Diapi wakin ratos celularta mana tʼojpiwajchejchu.

• Tiempocharikuwajchej imatapis khuska ruwanaykichejpaj.

• Puñunaykichejpaj celularta apagaspa waj ladoman churawajchej.

• 15 minutosllatapis sumajta parlarikunaykichejpaj celularta waj ladoman churawajchej.

• Ima horaskamachus Internetman conectasqa kanaykichejta parlarikuwajchej.