Bai na kontenido

Reenkarnashon Ta un Siñansa di Beibel?

Reenkarnashon Ta un Siñansa di Beibel?

E kontesta ku Beibel ta duna

Nò, Beibel no ta siña reenkarnashon. Ni e palabra “reenkarnashon” ni e idea mes ta aparesé den Beibel. Reenkarnashon ta basá riba e siñansa di ku alma ta inmortal. * Sinembargo, Beibel ta siña nos ku alma ta e persona mes i ku e por muri. (Génesis 2:7; Ezekiel 18:4) Ora un hende muri, e ta stòp di eksistí.​—Génesis 3:​19; Eklesiástes 9:​5, 6.

Kiko ta e diferensia entre reenkarnashon i resurekshon?

E siñansa bíbliko di resurekshon no ta basá riba alma ku no ta muri nunka. Den e resurekshon, hende ku a muri lo lanta bèk mediante e poder di Dios. (Mateo 22:23, 29; Echonan 24:15) E resurekshon ta ofresé e speransa positivo di biba riba un tera nobo sin tin ku muri nunka mas.​—2 Pedro 3:​13; Revelashon 21:​3, 4.

Ideanan robes tokante reenkarnashon i Beibel

Idea robes: Beibel ta bisa ku profeta Elías a reenkarná komo Huan Boutista.

E bèrdat: Dios a profetisá: “Mi ta bai manda profeta Elías serka boso,” i Hesus a mustra ku Huan Boutista a kumpli ku e profesia akí. (Malakías 4:​5, 6; Mateo 11:13, 14) Sinembargo, esei no ke men ku Elías a reenkarná komo Huan Boutista. Huan mes a bisa ku e no ta Elías. (Huan 1:​21) Mas bien, e trabou ku Huan a hasi tabata meskos ku esun di Elías, esta, proklamá e mensahe di Dios animando hende pa arepentí. (1 Reinan 18:36, 37; Mateo 3:1) Tambe, Huan tabatin e mesun “aktitut i poder di profeta Elías.”​—Lukas 1:​13-​17, Beibel na papiamentu koriente.

Idea robes: Beibel ta usa un otro palabra pa reenkarnashon: “nase di nobo.”

E bèrdat: Beibel ta mustra ku nase di nobo ta un eksperensia spiritual ku ta tuma lugá ora e persona ta na bida ainda. (Huan 1:​12, 13) Nase di nobo no ta un konsekuensia inevitabel di e kosnan ku nos a hasi den pasado. Mas bien, e ta un bendishon di Dios ku ta duna e persona un speransa úniko pa futuro.​—Huan 3:3; 1 Pedro 1:​3, 4.

^ par. 3 E kreensia di ku alma no ta muri nunka i reenkarnashon tin nan orígen te den Babilonia di antigwedat. Despues, filósofonan di India a bin ku e doktrina di Karma. Segun Britannica Encyclopedia of World Religions, Karma ta “e lei di kousa i efekto ku ta bisa ku loke un hende hasi den su bida awor lo tin efekto den su siguiente bida.”​—Página 913.