Sirbidónan di Yehova Tin un Berdadero Speransa

“E restante di Jakòb lo ta meimei di hopi pueblo, manera serena for di SEÑOR . . . ku no ta warda riba hende.”—MIKEAS 5:7.

1. Den ki sentido Israel spiritual ta un fuente di refreskamentu?

YEHOVA ta e gran Kreadó di áwaseru i serena. No tin sentido pa warda riba hende pa haña sea serena òf áwaseru. Profeta Mikeas a skirbi: “E restante di Jakòb lo ta meimei di hopi pueblo, manera serena for di SEÑOR, manera yobidanan di awa riba vegetashon ku no ta warda riba hende, ni ta tarda pa e yunan di hende.” (Mikeas 5:7) Ken ta e “restante di Jakòb” djawe? Eseinan ta israelitanan spiritual, e restu di “e Israel di Dios.” (Galationan 6:16) Pa “hopi pueblo” riba tera, nan ta manera “serena [refreskante] for di Señor” i “yobidanan di awa riba vegetashon.” Sí, kristiannan ungí djawe ta un bendishon di Dios riba hende. Komo proklamadónan di Reino, Yehova ta usa nan pa duna hende su mensahe di berdadero speransa.

2. Pakiko nos tin berdadero speransa apesar ku nos ta biba den e mundu turbulento aki?

² No ta nada straño ku no tin berdadero speransa den e mundu aki. Instabilidat polítiko, dekadensia moral, krímen, krísis ekonómiko, terorismo i guera ta kosnan ku ta karakterisá e mundu dominá pa Satanas e Diabel. (1 Juan 5:19) Hopi hende tin miedu di loke lo por sosodé den futuro. Pero komo adoradónan di Yehova, nos sí no tin miedu pasobra nos tin un speransa sigur pa futuro. E ta un berdadero speransa pasobra e ta basá riba e Palabra di Dios. Nos tin fe den Yehova i den su Palabra pasobra semper e ta kumpli ku loke e ta bisa.

3. (a) Pakiko Yehova tabata bai tuma akshon kontra Israel i Huda? (b) Pakiko e palabranan di Mikeas ta konta pa nos tambe?

³ E profesia di Mikeas inspirá pa Dios ta fortalesé nos pa kana den nòmber di Yehova, i tambe e ta duna nos un base pa karga berdadero speransa. Den siglo 8 promé ku nos era, tempu ku Mikeas a profetisá, e pueblo ku tabatin un pakto ku Dios tabata partí den dos nashon, Israel i Huda, i tur dos tabata ignorá e pakto di Dios. Esei a resultá den un dekadensia moral, apostasia religioso i materialismo ekstremo. P’esei Yehova a spièrta nan ku lo e tuma akshon kontra nan. Klaru ku e spièrtamentunan di Dios tabata dirigí na e hendenan ku a biba den tempu di Mikeas. Pero e situashon den nos tempu ta masha paresido na esun di e tempu ei, p’esei su palabranan ta konta pa nos tambe. Esaki lo bira bisto segun ku nos ta konsiderá algun punto sobresaliente dje shete kapítulonan di e buki di Mikeas.

 Un Resúmen di e Buki di Mikeas

4. Ki informashon Mikeas kapítulo 1 pa 3 ta duna?

⁴ Laga nos analisá e kontenido di Mikeas brevemente. Na kapítulo 1, Yehova ta saka na kla e rebeldia di Israel i Huda. Komo resultado di nan mal komportashon, Israel lo ser destruí i e kastigu di Huda lo yega te na entrada di Yerusalèm. Kapítulo 2 ta revelá ku hende riku i poderoso ta abusá di esnan suak i indefenso. Pero tambe e kapítulo ta menshoná un promesa di Dios. Dios lo trese su pueblo huntu den unidat. Kapítulo 3 ta informá di Yehova su deklarashonnan di huisio kontra e lidernan nashonal i e profetanan korupto. E lidernan ta trose hustisia i e profetanan ta gaña. Apesar di esaki, spiritu santu ta duna Mikeas poder p’e proklamá Yehova su huisio ku ta na kaminda.

5. Kiko ta e esensia di Mikeas kapítulo 4 i 5?

⁵ Kapítulo 4 ta profetisá ku den e último dianan, tur nashon lo bini na e seru elevá dje kas di Yehova pa e instruí nan. Pero promé ku esei, Huda lo ser hibá prezu na Babilonia. Sin embargo, Yehova lo libr’é. Kapítulo 5 ta revelá ku e Mesias lo nase na Bètlehèm di Huda. Lo e pastoriá su pueblo i libra nan for di e nashonnan ku ta oprimí nan.

6, 7. Ki puntonan e profesia di Mikeas kapítulo 6 i 7 ta trese dilanti?

⁶ Mikeas kapítulo 6 ta presentá Yehova su akusashonnan komo si fuera ta un kaso e ta lanta kontra su pueblo den korte. Ta kiko Yehova a hasi ku a pone su pueblo bira rebelde asina? Nada. Loke e ta pidi di nan mas bien ta mashá rasonabel. E kier pa hende ku ta ador’é ehersé hustisia, stima bondat i sea modesto segun ku nan ta kana kuné. Pero en bes di esei, Israel i Huda a aktua di un manera rebelde, i nan lo tin ku sufri e konsekuensianan.

⁷ Den e último kapítulo, Mikeas ta lamentá kon malbado e hendenan di su tempu ta. Sin embargo, e no ta deskurashá. E ta keda determiná pa “spera” riba Yehova. (Mikeas 7:7) Mikeas ta terminá e buki ekspresando konfiansa ku Yehova lo tene miserikòrdia di Su pueblo. Historia ta testigu di e echo ku e speransa aki a bira realidat. Na aña 537 promé ku nos era, Yehova a mustra miserikòrdia na su pueblo ora nan periodo di disiplina a kaba dor di laga un restu regresá nan pais.

8. Kon lo bo resumí e kontenido di e buki di Mikeas?

 ⁸ E informashon ku Yehova ta revelá pa medio di Mikeas ta hopi bon! E buki inspirá aki ta duna ehèmpelnan ku ta spièrta nos kon Dios ta trata ku esnan ku ta pretendé di ta sirbié, i ku sin embargo ta infiel. E ta predisí susesonan ku ta tumando lugá awendia. Ademas, e ta duna konseho divino tokante kon nos mester komportá nos den e tempunan difísil aki, pa nos speransa por bira sigur.

Señor Soberano Yehova Ta Papia

9. Segun Mikeas 1:2, kiko Yehova tabata bai hasi?

⁹ Awor, laga nos eksaminá e buki di Mikeas mas en detaye. Na Mikeas 1:2 nos ta lesa: “Tende, o pueblonan, boso tur; skucha, o tera i tur loke ku e ta kontené, i laga Señor Dios ta testigu kontra boso, Señor for di su tèmpel santu.” Si abo a biba den tempu di Mikeas, no tin duda ku e palabranan ei lo a hala bo atenshon. Sí, nan ta hala nos atenshon awe debí ku Yehova ta papia for di su tèmpel santu, i no ta na Israel i Huda so e ta dirigí su mes, sino na tur hende. Den e dianan di Mikeas, pa hopi tempu kaba e pueblo ta ignorá Señor Soberano Yehova. Pronto esaki lo kambia. Yehova tabata determiná pa tuma medida drástiko.

10. Pakiko e palabranan di Mikeas 1:2 ta importante pa nos?

¹⁰ Meskos ta konta pa nos tempu. Revelashon 14:18-20 ta mustra ku, un biaha mas, Yehova ta komuniká ku hende for di su tèmpel santu. Pronto Yehova lo tuma medida drástiko, anto lo tin susesonan importante ku lo sagudí humanidat. E biaha aki lo e tira ‘e mata di wendrùif di henter e tera’ den e gran baki di pèrs wendrùif di e furia di Yehova, i asina destruí e sistema di kosnan di Satanas por kompletu.

11. Kiko e palabranan di Mikeas 1:3 i 4 ta nifiká?

¹¹ Skucha kiko Yehova ta bai hasi. Mikeas 1:3 i 4 ta bisa: “Mira, SEÑOR ta sali for di su lugá. E lo baha bin i trapa riba e lugánan haltu di tera. E serunan lo dirti bou di dje, i e vayenan lo wòrdu gespleit, manera was dilanti di kandela, manera awa bashá for di un lugá steil.” Yehova ta bai sali for di su lugá di biba den shelu i literalmente trapa e serunan i e vayenan dje Tera Primintí? Nò. Esei no ta nesesario. Tur loke e tin ku hasi ta dirigí su atenshon na tera, i su boluntat lo kumpli. Ademas, no ta e paisahe literal, sino ta e habitantenan, ta bai pasa den e kosnan ku e profesia ta deskribí. Ora Yehova aktua, e konsekuensia lo ta desastroso pa hende infiel. Lo ta komo si fuera e serunan ta dirti manera was òf bela, i un temblor ta parti e vayenan na dos.

12, 13. Na armonia ku 2 Pedro 3:10-12, kiko ta hasi nos speransa sigur?

¹² Kisas e palabranan profétiko di Mikeas 1:3 i 4 ta pone bo pensa riba un otro profesia inspirá ku ta papia di desasternan grandi ku lo bai tuma lugá riba tera. Na 2 Pedro 3:10, apòstel Pedro a skirbi: “E dia di Señor lo bin manera un ladron, den kual e shelunan lo pasa bai ku un boroto inmenso, i e elementonan lo wòrdu destruí ku un kalor intenso, i e tera i su obranan lo wòrdu kimá kompletamente.” Meskos ku e profesia di Mikeas, Pedro su palabranan tampoko no ta papia di shelu i tera literal. Loke nan ta referí na dje ta e gran tribulashon ku ta bini riba e mundu sin Dios aki.

¹³ Apesar ku e desaster ei ta na kaminda, kristiannan por mira futuro ku konfiansa, meskos ku Mikeas a hasi. Kon? Dor di sigui e konseho ku tin pará den e siguiente versíkulonan dje karta di Pedro: “Ki sorto di hende boso mester ta den un kondukta santu i deboto, sperando i purando e binida di e dia di Dios.” (2 Pedro 3:11, 12) Nos speransa pa futuro lo ta sigur si nos kultivá un kurason obediente, anto hasi sigur ku nos kondukta ta santu i ku nos ta hiba un bida deboto na Dios. Ademas, nunka nos no mester lubidá ku e dia di Yehova ta bini sigur.

14. Pakiko Israel i Huda a meresé kastigu?

 ¹⁴ Yehova ta splika dikon su pueblo di antigwedat meresé kastigu. Mikeas 1:5 ta deklará: “Tur esaki ta pa motibu di e rebeldia di Jakòb i pa motibu di e pikánan di e kas di Israel. Kiko ta e rebeldia di Jakòb? No ta Samaria? Kiko ta e lugá haltu di Huda? No ta Yerusalèm?” Ta Yehova por kier ku Israel i Huda ta eksistí. Pero tòg nan a rebelá kontra dje, i nan rebeldia ta yega te na nan kapital, esta, Samaria i Yerusalèm.

Maldat A Reina Tur Kaminda

15, 16. E hendenan ku a biba den tempu di Mikeas a hasi nan mes kulpabel di kiko?

¹⁵ Mikeas 2:1 i 2 ta duna un deskripshon bibu dje maldat di e hendenan ku a biba den tempu di Mikeas: “Ai di esnan ku ta plania inikidat, ku ta pensa maldat riba nan kama! Ora bira mainta nan ta ehekutá esaki, pasobra ta den poder di nan man pa hasi esaki. Nan ta kudishá kunukunan i despues ta gara nan, i kasnan, i ta kohe nan. Nan ta hòrta un hòmber i su kas, un hòmber i su herensia.”

¹⁶ Hende haragan pa kos ta keda henter anochi lantá ta traha plan pa kita kas i kunuku for di nan bisiña. Ora bira mainta nan ta kore bai hasi loke nan a plania. Si nan a kòrda Yehova su pakto, nan lo no a kometé e malechonan ei. E Lei di Moisés ta kontené reglanan pa protehá hende pober. Bou dje Lei ei, niun famia no tin mag di pèrdè nan propiedat heredá pa semper. Pero e haragannan ei no ta preokupá ku esei. Nan ta ignorá e palabranan di Levítiko 19:18, ku ta bisa: “Stima bo próhimo manera bo mes.”

17. Kiko por sosodé ora hende ku ta bisa ku nan ta sirbi Dios ta pone kos material na promé lugá den nan bida?

¹⁷ E ehèmpel aki ta mustra kiko por pasa ora hende ku ta bisa ku nan ta sirbi Dios ta pèrdè metanan spiritual for di bista, anto ta kuminsá buska kos material na promé lugá. Pablo a spièrta e kristiannan di su tempu, bisando: “Esnan ku kier bira riku ta kai den tentashon i den trampa i den hopi deseonan loko i dañino, kuanan ta hundi hende den ruina i destrukshon.” (1 Timoteo 6:9) Ora un hende hasi ganamentu di plaka su meta prinsipal den bida, den un sentido e ta adorando un dios falsu, esta, rikesa. E dios falsu ei no ta dun’é ningun speransa sigur pa futuro.—Mateo 6:24.

18. Kiko lo a bai pasa ku hende materialista den tempu di Mikeas?

¹⁸ Mal eksperensia a siña hopi hende den tempu di Mikeas ku ta un banidat pa konfia den kos material. Segun Mikeas 2:4, Yehova ta bisa: “Riba e dia ei nan lo traha un proverbio kontra boso i lamentá ku un lamentashon amargo i bisa: ‘Nos ta kompletamente destruí! E ta kambia e herensia di mi pueblo; mira kon e ta kit’é for di mi! Entre e traidónan e ta parti nos kunukunan.’” Sí, e ladronnan di kas i kunuku ei ta bai pèrdè nan propio herensia di famia. Nan lo ser deportá pa un otro pais, i nan poseshonnan lo bira botin pa “e traidónan,” esta, hende di otro nashon. Tur nan speransa pa un futuro próspero lo kaba na nada.

19, 20. Kiko a sosodé ku e hudiunan ku a konfia den Yehova?

¹⁹ Sin embargo, esnan ku konfia den Yehova sí lo no keda desapuntá. Yehova ta fiel na e paktonan ku el a sera ku Abraham i David, i e ta tene miserikòrdia di hende manera Mikeas, ku ta stim’é i ku ta sinti duele p’e manera ku nan paisanonan a alehá for di Dios. Dor ku Dios tin hende asina na mente, lo e trese un restorashon na su debido tempu.

²⁰ Esei ta sosodé na aña 537 promé ku nos era, ora ku un restu di hudiu bolbe nan patria despues di e kaida di Babilonia. N’e tempu ei e palabranan di Mikeas 2:12 ta kumpli pa promé bes. Yehova ta bisa: “Siguramente lo mi reuní tur di boso, o Jakòb, siguramente lo mi rekohé e restante di Israel. Lo mi trese nan huntu manera karné den kurá; manera un tou  meimei di su lugá di yerba bèrdè. E lugá lo ta yen di boroto pa motibu di tantu hende.” Esta amoroso Yehova ta! Despues ku e disipliná su pueblo, e ta laga un restu di nan bolbe pa nan sirbié den e tera ku el a duna nan antepasadonan.

Paralelonan Remarkabel den Nos Tempu

21. Kon e situashon djawe ta na komparashon ku esun den tempu di Mikeas?

²¹ Segun ku nos a konsiderá e promé dos kapítulonan di Mikeas, bo a realisá kon paresido e situashon djawe ta? Meskos ku den tempu di Mikeas, hopi hende djawe ta pretendé ku nan ta sirbi Dios. Pero meskos ku Huda i Israel, nan ta dividí, i asta nan a bringa kontra otro den guera. Hopi hende riku den kristiandat a oprimí hende pober. Ku mas i mas frekuensia, lidernan religioso ta tolerá práktikanan ku Beibel ta kondená spesífikamente. Nada straño ku pronto kristiandat lo yega na su fin, huntu ku tur sobrá parti di ‘Babilonia e grandi,’ e imperio mundial di religion falsu! (Revelashon 18:1-5) Sin embargo, meskos ku den tempu di Mikeas, awe tambe Yehova tin un restu di sirbidó fiel riba tera.

22. Kua dos grupo a pone nan speransa den e Reino di Dios?

²² Na 1919, fiel kristiannan ungí a apartá nan mes totalmente for di kristiandat i a kuminsá proklamá e bon nobo dje Reino na tur nashon. (Mateo 24:14) Na promé instante nan a buska esnan ku a resta di Israel spiritual. Despues, “otro karnénan” a djòin nan, i e dos gruponan a bira “ún tou ku ún wardadó.” (Juan 10:16) Maske awendia e adoradónan fiel aki ta sirbi Dios den 234 pais, Yehova a ‘trese nan tur huntu’ den un berdadero unidat. I awor ya kaba e kurá di karné ta “yen di boroto pa motibu di tantu hende,” hòmber, muhé i mucha. Nan speransa no ta den e mundu aki, sino den e Reino di Dios ku pronto ta bai hasi e tera aki un paradeis.

23. Pakiko bo ta konvensí ku bo speransa ta sigur?

²³ Relashoná ku e adoradónan fiel di Yehova, e último versíkulo di Mikeas kapítulo 2 versíkulo 13 ta bisa: “Nan rei ta pasa bai nan dilanti, i SEÑOR na kabes.” Abo ta mira bo mes den e marcha triunfal ei, siguiendo tras di bo Rei Hesukristu, i ku Yehova mes na kabes? Si ta asina, bo por tin e konvikshon ku bo ta riba kaminda pa viktoria i ku bo speransa ta sigur. Esaki lo bira mas kla ainda segun ku nos ta analisá mas punto sobresaliente di e profesia di Mikeas.

Kon Lo Bo Kontestá?

• Den e tempu di Mikeas, pakiko Yehova a disidí di tuma medida kontra Huda i Israel?

• Kiko por sosodé ku esnan ku ta bisa ku nan ta sirbi Dios pero ta pone interes material na promé lugá den bida?

• Despues ku bo a analisá Mikeas kapítulo 1 i 2, pakiko bo ta konvensí ku bo speransa ta sigur?

[Preguntanan di Estudio]

[Plachi na página 9]

E profesia di Mikeas por fortalesé nos spiritualmente

[Plachinan na página 10]

Meskos ku e restu hudiu na 537 promé ku nos era, e israelitanan spiritual i nan kompañeronan ta promové adorashon berdadero