Adorashon Berdadero Ta Uni un Famia

MARIA tabatin 13 aña ora un famia di dje a papia kuné i su ruman muhé mas chikitu, Lucy, tokante Yehova. E famia aki a splika nan tambe tokante e speransa di Paradeis riba tera. Nan a bira kurioso i a bai Salòn di Reino di Testigunan di Yehova kuné. Maria a keda impreshoná ku e siñansa bon kla ku el a tende einan. E tabata hopi diferente for di misa, kaminda e seremonia a konsistí kasi di kantamentu so! No a tarda hopi ku nan a kuminsá studia Beibel ku un Testigu di Yehova.

Hugo, nan ruman hòmber grandi, tabata interesá den filosofia i evolushon. E tabata yama su mes un ateo. Pero ora e tabata den dienst, el a lesa e buki Bida—Kon El A Presentá? Dor di Evolushon òf Kreashon?  * El a haña kontesta pa preguntanan ku ningun otro religion por a dun’é. Ora el a terminá su sirbishi militar, el kuminsá fortalesé su fe nobo den Dios dor di studia Beibel i bai reunion ku su ruman muhénan. Maria ku Lucy a batisá na 1992. Esei tabata dos aña despues ku nan a tende e bèrdat pa promé bes. Nan ruman hòmber a batisá dos aña despues di nan.

Entre tantu nan mayornan ku tabata katóliko del alma i pegá na tradishon, a mustra masha poko interes den e bèrdat. Nan tabata haña ku Testigunan di Yehova ta kansa hende, maske nan tabata atmirá nan bon manera i e bistí desente di e Testigunan hóben ora nan tabata bin bishitá nan. Tambe, ora di kome, e muchanan tabata papia riba e kosnan ku nan a siña na reunion i esei a lanta e kuriosidat di nan mayornan.

Pero ámbos mayor tabata metí den bruheria. E tata tabata un buraché ku tabata maltratá e mama. E famia tabata serka di kibra. Un biaha e tata a komport’é malu ora e tabata burachi, i p’esei el a kai será dos siman. Anto ora e tabata den prizon el a kuminsá lesa Beibel. Segun ku e tabata lesa, el a topa ku loke Hesus a bisa tokante e señal di e último dianan. Awor, tantu e mama komo e tata tabata yen di pregunta. Nan a bai Salòn di Reino i a aseptá un studio di Beibel. Segun ku nan tabata siña e bèrdat, nan a deshasí di tur nan bukinan di bruheria i a haña alivio for di atakenan di demoño dor di invoká e nòmber di Yehova. Nan a kuminsá hasi kambionan grandi den nan personalidat.

Na un kongreso di distrito na Bolivia na aña 1999, Hugo a batisá su mayornan. Bo por imaginá bo kon emoshoná Maria ku Lucy tabata ora nan a mira esaki? Nuebe aña a pasa desde e dia ku Maria ku Lucy a tende tokante Yehova i su promesanan pa promé bes. Awor nan ta huntu ku Hugo den e sirbishi di tempu kompletu. Esta kontentu nan ta ku adorashon berdadero a uni nan famia!

[Nota]