Ken Su Normanan Bo Por Confia?

Un hende cu a bishitá África pa promé bes a keda intrigá di mira un homber pará stret-stret na cantu di caminda. El a nota cu cada pasa un par di minuut e homber tabata schuif su pianan i hala djis un tiki, pero parando stret ketu bai. Ta te despues e bishitante a realisá ta di con e homber tabata move asina. Loke e tabata purba haci ta di keda den sombra di un palu di telefon. E sombra tabata move poco-poco segun cu solo di merdia a cambia di posicion.

MESCOS cu e sombra di solo ei, asuntu i normanan humano ta hala i cambia constantemente. Na contraste, Jehova Dios, “Tata dje lusnan celestial,” ta incambiabel. Disipel Santiago a skirbi cu “cuné no tin un variacion dje biramentu dje sombra.” (Santiago 1:17) E profeta hebreo Malakías a registrá e declaracion aki di Dios mes: “Ami ta Jehova; mi no a cambia.” (Malakías 3:6) Dios a bisa e nacion di Israel den tempu di Isaías: “Te na un hende su behes mi ta e Mésun; i te na un hende su cabei blancu ami mes lo sigui soportá. Ami mes lo actua sigur.” (Isaías 46:4) Pues, pasamentu di tempu no ta cambia e confiansa cu nos por tin den e promesanan dje Todopoderoso.

Un Les for dje Ley

Mescos cu Jehova su promesanan ta confiabel i incambiabel, asina ta cu su normanan di loke ta bon i malu. Abo lo confia un comerciante cu ta usa dos diferente set di peso, di cua unu so ta exacto? Sigur cu no. Asina tambe,  “un balansa fraudulento ta algu detestabel pa Jehova, pero un peso di piedra completo ta un placer p’e.” (Proverbionan 11:1; 20:10) Jehova a incluí e mandamentu aki den e Ley cu el a duna e israelitanan: “Boso no mag cometé inhusticia ora di husga, ora di midi, ora di pisa ni ora di midi líkido. Boso mester tin balansa exacto, peso exacto i un efa exacto i un hin exacto. Jehova boso Dios mi ta, cu a saca boso for dje tera di Egipto.”—Levítico 19:35, 36.

Dor di obedecé e mandamentu ei e israelitanan a ricibí e fabor di Dios, i tambe hopi beneficio material. Asina tambe, cumpli cu Jehova su normanan cu no ta cambia, no únicamente den loke ta toca peso i midí sino den tur área di bida, ta resultá den bendicionnan pa e adoradó cu ta confia den dje. Dios ta declará: “Ami, Jehova, ta bo Dios, Esun cu ta siña bo beneficiá bo mes, Esun cu ta haci bo stap den e caminda den cua bo mester cana.”—Isaías 48:17.

Di Con Normanan Ta Decayendo Awendia?

Bijbel ta mustra e motibu cu normanan ta decayendo awendia. E último buki di Bijbel, Revelacion, ta describí un guera den shelu cua su resultado a afectá tur hende te n’e dia djawe. Apostel Juan a skirbi: “Guera a cuminsá den shelu: Miguel i su angelnan a batayá cu e dragon, i e dragon i su angelnan a batayá pero e no a triunfá, ni un lugá no a ser hañá mas pa nan den shelu. Pues, e dragon grandi a ser tirá abou, e colebra original, esun yamá Diabel i Satanas, cu ta gañando henter e tera habitá; el a ser tirá abou n’e tera, i su angelnan a ser tirá abou huntu cuné.”—Revelacion 12:7-9.

Ki efecto inmediato e guera ei tabatin? Juan a sigui bisa: “P’e motibu aki alegrá, shelu i boso cu ta biba den dje! Ai di tera i di laman, pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.”—Revelacion 12:12.

“Ai di tera,” esta, calamidad, a bini ora Promé Guera Mundial a cuminsá na 1914, i a trece fin na un época cu a conocé normanan hopi diferente for di esnan djawe. Historiadó Barbara Tuchman ta remarcá: “E Guera Grandi di 1914-18 ta manera un faha di tereno kimá cu ta parti e tempu ei for di esun di nos. El a caba cu asina tantu bida cu lo a funcioná durante e añanan siguiente, i a destruí creencia, cambia idea i laga herida incurabel di desilusion, di manera cu el a crea un abismo tantu físico como sicológico entre e dos épocanan.” Otro historiadó, Eric Hobsbawm ta bai di acuerdo: “Di 1914 padilanti tabatin un deterioro bisto dje normanan cu hende a considerá normal e tempu ei den paisnan desaroyá . . . No ta fácil pa comprendé e grado cu nos a retrocedé, desafortunadamente cada bes mas lihé, bai na loke nos antepasadonan di siglo 19 lo a yama normanan di barbarismo.”

 Den su buki Humanity—A Moral History of the Twentieth Century (Humanidad—Un Historia di Moralidad di Siglo 20), autor Jonathan Glover ta remarcá: “Un rasgo di nos tempu ta cu ley moral ta disparciendo.” Apesar cu debí n’e caida di religion den mundu occidental e no ta kere muchu den un ley moral cu ta bini di otro hende cu no ta bo mes, e ta duna e advertencia aki: “Asta esnan entre nos cu no ta kere den un ley moral religioso mester preocupá cu su desaparicion.”

E traicion di confiansa di awendia—sea ta den comercio, política of religion, of asta den relacionnan personal i di famia—i su consecuencianan grave, ta forma parti dje plan malbado di Diabel pa trece calamidad riba habitantenan di tera. Satanas ta determiná pa haci guera te na final i hiba tur esnan cu ta purba biba di acuerdo cu Dios su normanan, na perdicion huntu cuné.—Revelacion 12:17.

Tin salida? Tin un solucion pa tantu traicion di confiansa? Apostel Pedro ta contestá: “Tin shelu nobo i un tera nobo cu nos ta spera segun [Dios] su promesa, i den esakinan husticia lo tin cu biba.” (2 Pedro 3:13) Nos por confia e promesa ei pasobra no solamente Dios tin e poder pa realisá su propósito, sino cu e ta garantisá su cumplimentu tambe. Pa loke ta cualkier ‘palabra cu sali for di Jehova su boca,’ e ta declará: “Lo e no bolbe na mi sin resultado, sino cu sigur lo e haci loke mi tin deleite aden, i lo e tin éxito sigur den loke mi a mand’é.” Sí, su promesa ta berdaderamente confiabel!—Isaías 55:11; Revelacion 21:4, 5.

Biba Segun Dios Su Normanan

Den un mundu caminda normanan ta tambaleá i deteriorá, Testigonan di Jehova ta haci esfuerso pa biba di acuerdo cu e normanan di conducta cu Bijbel ta ofrecé. Como resultado, nan ta diferente for di mayoria hende, i hopi bes esaki a hala atencion—i mofa—di otronan.

Na un congreso di Testigonan di Jehova na Londen, un reportero di television a puntra un bocero si di berdad Testigonan di Jehova ta cristian. El a contestá: “Sigur-sigur, pasobra Jesus ta nos ehempel. Tin masha hopi egoismo na mundu, i nos ta enfocá riba Jesucristo como e caminda, e berdad i e bida. Nos ta kere cu e ta e Yu di Dios, no parti di un Trinidad; pues nos comprendimentu di Bijbel ta diferente for di religionnan en general.”

Ora nan a pasa e entrevista na e canal di television BBC, e reportero a terminá e programa bisando: “Mi a siña hopi mas tocante pakico Testigonan di Jehova ta bin bati na nos porta. I segun mi, mi no a yega di mira 25.000 hende asina nèchi bistí i cu asina bon manera, huntu n’e mésun lugá, n’e mes momento.” Loke e observadó externo aki a bisa ta un excelente testimonio di cu biba segun Dios su normanan incambiabel ta algu sabí pa haci!

Kisas algun hende no gusta e idea di biba segun normanan cu no ta nan mes a bini cuné. Pero nos ta animá bo pa wak den Bijbel i siña kico Dios su normanan ta. Ma no keda contentu cu djis examin’é ariba-ariba. Sigui e spiertamentu di apostel Pablo: “Stop di ser formá segun e sistema di cosnan aki, mas bien sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios.” (Romanonan 12:2) Bishitá e Salon di Reino den bo comunidad, i siña conocé e Testigonan ei. Lo bo nota cu nan ta hende comun i coriente cu ta pone confiansa den promesanan di Bijbel i cu ta demostrá nan confiansa den Dios dor di purba biba di acuerdo cu su normanan.

Si bo sigui Dios su normanan incambiabel i confiabel den bo bida personal, sigur-sigur esei lo trece bendicion pa bo. Haci caso dje invitacion aki di Dios mes: “O, mare realmente bo presta atencion na mi mandamentunan! E ora ei bo pas lo bira mescos cu un riu, i bo husticia manera e olanan di laman.”—Isaías 48:18.

[Plachinan na página 5]

Awendia, tin traicion di confiansa den comercio, política, religion i relacion di famia