“E Tempu di Restoracion” Ta Cerca!

Djis promé cu Jesus a subi na shelu, algun di su fiel disipelnan a puntr’é: “Señor, bo ta restorá e reino pa Israel n’e tempu aki?” Jesus su contesta a implicá cu algun tempu lo a pasa promé cu e Reino bini. Durante e tempu ei, su siguidónan lo tabatin un trabou grandi pa haci. Nan lo mester tabata testigo di Jesus “tantu den Jerusalem como den henter Hudea i Samaria i te na e parti mas lehano dje tera.”—Echonan 1:6-8.

NAN lo no por a cumpli cu e asignacion ei den un par di dia, siman of luna. Tog, sin niun tiki vacilacion e disipelnan a cuminsá predicá. Pero nan no a perde interes den e tema di restoracion. Apostel Pedro a papia tocante esei cu un multitud grandi reuní na Jerusalem, bisando: “Repentí, i bira bek pa boso picánan ser kitá, pa temporadanan di refrescamentu por bini di parti dje persona di Jehova i p’e manda e Cristo nombrá pa boso, Jesus, kende shelu, en berdad, mester retené den su mes te na e tempu di restoracion di tur cos cu Dios a papia di dje mediante boca di su profetanan santu di antigwedad.”—Echonan 3:19-21.

E “tempu di restoracion” aki lo mester a introducí “temporadanan di refrescamentu” di parti di Jehova. E restoracion profetisá lo a bini den dos etapa. Promé, lo tin un restoracion spiritual refrescante, cu ta tumando lugá awor . Di dos, despues di dje lo sigui establecimentu di un paradijs físico riba tera.

E Tempu di Restoracion Ta Cuminsá

Manera apostel Pedro a señalá n’e multitud na Jerusalem, shelu ‘a retené Jesus den su mes.’ Esaki tabata e caso te cu 1914, ora Jesus a asumí su poder como rey i a cuminsá goberná como Rey nombrá pa Dios. Pedro a profetisá cu n’e tempu ei, Jehova lo “manda” su Yu den e sentido cu lo E permití Jesus efectuá su papel como e figura central den e propósitonan di Dios. Bijbel ta describí e suceso den idioma simbólico: “I [Dios su organisacion celestial] a duna lus na un yu, un homber, [e Reino di Dios den man di Jesucristo] cu tin cu pastoreá tur nacion cu un bara di heru.”—Revelacion 12:5.

Pero e nacionnan no tabatin intencion di someté nan na Cristo su gobernacion. Sí, nan a atacá su súbditonan terenal leal, conocí awe como Testigonan di Jehova. Mescos cu nan antecesornan apostólico, e Testigonan sin vacilá a tuma “e trabou di duna testimonio di Jesus.” (Revelacion 12:17) Oposicion contra e trabou cu e cristiannan sincero aki tabata haci a lanta den un pais tras di otro. Na 1918, miembronan responsabel di staf n’e sede di Sociedad Watch Tower na Brooklyn, New York, a ser hibá dilanti corte bou di acusacionnan falsu i sentenciá inhustamente na castigunan  largu di prizon. Pa un tempu a parce cu e trabou moderno di duna testimonio “na e parti mas lehano dje tera” lo a bai fracasá.—Revelacion 11:7-10.

Sin embargo, na 1919 e miembronan di staf cu tabata encarcelá a sali liber i despues a exonerá nan di tur e acusacionnan falsu. Nan no a perde tempu i mesora a reanudá e trabou di restoracion spiritual. For di e tempu ei padilanti e pueblo di Jehova a disfrutá di un prosperidad spiritual sin precedente.

Nan a start un campaña intensivo pa siña hende di tur nacion warda e cosnan cu Cristo a manda su siguidónan pa haci. (Mateo 28:20) Ki refrescante tabata pa mira algun hende cu anteriormente a desplegá característicanan manera bestia, cambia nan punto di bista! Nan a kita e personalidad bieu, cu ta producí característicanan manera “rabia,” “abla ofensivo” i “papiamentu obseno,” i a bisti e personalidad nobo, “cu mediante conocimentu exacto ta ser hací nobo segun e imágen di [Dios] cu a cre’é.” Den un sentido spiritual, e palabranan di profeta Isaías ta cumpli for di awor: “E lobo [un persona cu na ántes a desplegá característica manera di lobo] realmente lo biba pa un tempu cerca lamchi machu [un persona cu ta manifestá un caracter mansu], i e leopardo mes lo drumi cerca e lamchi di cabritu, i e bisé i e yu di leon machu cu klina i e animal bon alimentá tur huntu.”—Colosensenan 3:8-10; Isaías 11:6, 9.

Mas Restoracion Ta Cerca!

Ademas dje restoracion cu a resultá den un paradijs spiritual awe, e tempu ta acercando lihé ora cu nos planeta lo bira un paradijs físico. Un parti chikitu dje tera tabata un paradijs tempu cu Jehova a pone nos antepasadonan, Adam cu Eva, den e hofi di Eden. (Génesis 1:29-31) P’esei nos por bisa cu Paradijs lo ser restorá. Pero promé cu esei sosodé, mester kita religion falsu cu ta desonrá Dios for di riba tera. E elementonan político dje mundu aki lo soru pa esaki. (Revelacion 17:15-18) Caba lo destruí e elementonan político i comercial, huntu cu nan apoyadónan. Finalmente, Dios su último oponentenan—Satanas e Diabel i su demoñonan—lo bai cerá pa mil aña, cu ta e duracion dje proyecto di restoracion. Durante e tempu ei, “e desierto i e region sin awa lo hubilá, i e yanura di desierto lo ta gososo i lo florecé manera asafran.” (Isaías 35:1) Henter e tera lo ta sin disturbio. (Isaías 14:7) Asta e miyones di hendenan cu a muri lo ser restorá na bida riba tera. Tur lo experenciá e beneficionan curativo dje sacrificio di rescate. (Revelacion 20:12-15; 22:1, 2) Lo no tin hende ciegu, surdu of lam riba tera. “Ningun residente lo bisa: ‘Mi ta malu.’” (Isaías 33:24) Djis despues dje fin dje Reino di Mil Aña di Cristo, lo los Diabel i su demoñonan pa un periodo corticu i nan lo mira con Dios su propósito p’e tera a cumpli te n’e punto ei. Al final, lo destruí nan pa semper.—Revelacion 20:1-3.

Ora tera yega n’e fin dje mil aña di restoracion, “tur cos cu ta hala rosea” lo alabá Jehova, i nan lo haci esei pa tur eternidad. (Salmo 150:6) Abo lo ta entre nan? Bo por.