Mira! E Lus Ta Maraviyoso!

SI BO a yega di fula den scuridad pa haya sa con bo tin cu cana, bo sa con frustrante esei por ta. Lus ta trece un gran alivio! Kisas bo a yega di haya bo den un situacion tambe cu a laga bo sinti como si fuera bo tabata den un scuridad total. Podise esaki a sosode ora bo no por a mira e solucion di un problema. Anto tiki tiki bo a bin mira lus​—cu tabatin un solucion. Ta un experencia maraviyoso pa sali for di scuridad y bai caminda tin lus.

Den e prome siglo, mayoria di hende tabata den scuridad spiritual. Apostel Pedro a dirigi su mes na esnan cu a laga nan creencianan anterior y acepta cristianismo, ora el a skirbi: “[Dios] a yama boso for di scuridad na su lus maraviyoso.” (1 Pedro 2:9) Pa nan, ta como si fuera nan a sali for di scuridad total pa bai den lus briyante. Ta mescos cu ora un persona ta solitario y sin speransa y despues e ta bira miembro di un famia cu un futuro sigur.​—Efesionan 2:1, 12.

“Bo A Bandona Bo Prome Amor”

E prome cristiannan a haya “e berdad”, esta, e berdadero fe cristian. (Juan 18:37) Nan a mira e lus maraviyoso di e berdad y a haci e transicion for di scuridad spiritual pa e lus iluminador. Sinembargo, den transcurso di tempo, e entusiasmo y celo inicial di algun cristian a fria. Por ehempel, pa fin di e prome siglo, a surgi un problema serio den e congregacion na Efeso. Hesucristo resusita a identifica e problema, bisando: “Mi tin esaki contra bo, cu bo a bandona bo prome amor. P’esei, corda for di unda bo a cai, y arepenti y haci e obranan cu bo tabata haci prome.” (Revelacion 2:4, 5) E cristiannan na Efeso mester a rebiba nan amor pa Dios y pa e berdad.

Kico di nos? Nos tambe a experencia e goso di mira e lus, di conoce e berdad maraviyoso di e Palabra di Dios. Nos a stima e berdad. Pero e dificultadnan cu hende sa pasa aden por fria nos amor pa e berdad. Hunto cu esaki ta bini e problemanan cu ta comun pa “e ultimo dianan.” Nos ta bibando den un mundo caracterisa pa “temponan trabahoso”​—un mundo yen di hende cu ta “stimado di nan mes, stimado di placa, gabado, arogante, blasfemado, desobedecido na mayornan, ingrato, impio.” (2 Timoteo 3:1, 2) Nan influencia por pone nos celo mengua y nos amor pa Jehova fria.

Si nos a perde e amor cu nos tabatin na principio, nos tin cu ‘corda for di unda nos a cai y arepenti.’ Nos tin cu bolbe na nos condicion spiritual di antes. Ademas, nos tin cu tene cuidou pa no laga nos aprecio pa e berdad mengua. Ta masha importante pa nos tur keda cu un actitud positivo y alegre y mantene nos amor pa Dios y pa su berdad bibo.

‘E Berdad Cu Ta Haci Nos Liber’

E lus di berdad biblico ta maraviyoso pasobra Bijbel ta contesta preguntanan importante cu a confundi humanidad pa miles di aña. Preguntanan manera: Pakico nos ta aki?  Kico ta e proposito di bida? Pakico tin maldad? Tin bida despues di morto? Jehova a ilumina nos cu berdadnan maraviyoso basa riba e siñansanan di Bijbel. Nos no mester ta gradicido di curason pa esakinan? Laga nos no keda sin mustra gratitud pa loke nos a siña!

Hesus a bisa su discipelnan: “Boso lo conoce e berdad, y e berdad lo haci boso liber.” (Juan 8:32) E sacrificio di rescate di Hesus a habri caminda pa nos haya libertad for di pica y morto. Pero tambe e berdadnan precioso aki a libra nos di e ignorancia y e insiguridadnan di un mundo den scuridad. Ora nos medita cu aprecio riba loke nos a siña, esei lo yuda nos fortalece nos amor pa Jehova y pa su Palabra.

Apostel Pablo a skirbi e cristiannan na Tesalonica: “Ora boso a ricibi for di nos e palabra di Dios su mensahe, boso a acept’e no como palabra di hende, ma pa loke e ta berdaderamente, e palabra di Dios cu ta obra tambe den boso cu ta kere.” (1 Tesalonicensenan 2:13) E Tesalonicensenan a tende y a “ricibi e palabra [di Dios] cu goso.” Nan no tabata den “scuridad” mas. Na luga di esei, nan a bira “yiunan di lus.” (1 Tesalonicensenan 1:4-7; 5:4, 5) E cristiannan ei a siña cu Jehova ta e Creador y cu e ta todopoderoso, sabi, amoroso y misericordioso. Mescos cu otro siguido di Cristo, nan tambe a siña cu Jehova a haci areglo pa kita nan picanan pa medio di e sacrificio di rescate di su Yiu, Hesucristo.​—Echonan 3:19-21.

Aunke e Tesalonicensenan no tabata sa tur cos di e berdad di Bijbel, nan tabata sa si unda nan mester a acudi pa haya conocemento. E Scritura inspira por haci e hende di Dios competente, “ekipa pa tur bon obra.” (2 Timoteo 3:16, 17) E cristiannan na Tesalonica por a continua cu nan estudio y experencia bes tras bes cu e lus procedente di Dios ta berdaderamente maraviyoso. Nan tabatin motibo pa alegra tur ora, mescos cu nos tambe tin.​—1 Tesalonicensenan 5:16.

Un Lus pa Nos Caminda

E salmista a duna un motibo mas pakico e lus ta maraviyoso. El a canta: “Bo palabra ta un lampi pa mi pia y un lus pa mi caminda.” (Salmo 119:105) E guia cu nos ta ricibi for di e Palabra di Dios por yuda nos hiba un bida sigur y di satisfaccion. Nos no tin nodo di ta manera un barco cu ta drif sin rumbo. E echo cu nos sa e berdad y ta aplic’e ta proteha nos pa nos no ser “tira p’aki p’aya dor di olanan, y hiba dor di tur biento di doctrina.”​—Efesionan 4:14.

Bijbel ta bisa: “No confia den prinsnan, den yiu di hende, den kende no tin salbacion.” E ta bisa tambe: “Bendiciona ta esun, kende su yudansa ta e Dios di Jacob, kende su speransa ta den SEÑOR su Dios.” (Salmo 146:3, 5) Ademas, confiansa den Jehova ta yuda nos vence miedo y ansiedad. Apostel Pablo a skirbi: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Cristo Hesus.” (Filipensenan 4:6, 7) Ora nos laga e lus di e Palabra di Dios guia nos, esei realmente lo beneficia nos.

 Briya Manera Lus den Mundo

Un otro motibo pakico e lus di e Palabra di Dios ta maraviyoso ta cu e ta duna nos e oportunidad pa ricibi e asignacion di mas honorabel cu hende por haya. Hesus a instrui su siguidonan: “Bai y haci tur e nacionnan discipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso; y mira, mi ta cu boso semper, te na fin di mundo.” El a introduci e mandamento bisando: “Tur autoridad a wordo duna na mi den shelo y riba Tera.”​—Mateo 28:18-20.

Pensa riba ken ta yudando cristiannan berdadero den e trabou di predica e bon nobo y siña hende di tur nacion e berdadnan di Bijbel. Hesus a priminti su siguidonan cu lo e ta cu nan. En berdad e ta yudando nan y sosteniendo nan den nan ministerio segun cu nan ta ‘laga nan lus briya’ den e manera ei y pa medio di otro ‘bon obra.’ (Mateo 5:14-16) Angelnan tambe ta envolvi den e trabou aki di predica e bon nobo. (Revelacion 14:6) Y kico nos por bisa di Jehova Dios? Apostel Pablo a skirbi: “Ami a planta, Apolos a muha, ma ta Dios a duna crecemento.” Ta ki un honor di por ta entre “Dios su colaboradonan”!​—1 Corintionan 3:6, 9.

Pensa tambe riba e manera cu Jehova ta bendiciona nos esfuersonan den e trabou cu el a duna nos. No tin nada cu por para banda di e privilegio cu Dios a duna nos di “briya manera lusnan den mundo.” Ora nos abla y accionnan ta refleha e lus di e Palabra di Dios, nos ta den e posicion di por duna berdadero yudansa na personanan di curason honrado. (Filipensenan 2:15) Y nos por alegra segun cu nos ta predica y siña otro hende cu celo, “pasobra Dios no ta inhusto pa lubida [nos] trabou y e amor cu [nos] a mustra pa su nomber.”​—Hebreonan 6:10.

‘Cumpra Enguente pa Hunta Bo Wowonan Cu Ne’

Den un mensahe cu Hesus a dirigi na e congregacion di prome siglo na Laodicea, el a bisa: “Cumpra cerca mi ... enguente pa hunta bo wowonan cu ne, pa bo mira. Esnan cu mi ta stima, mi ta reprende y disciplina.” (Revelacion 3:18, 19) E remedi confiabel pa cieguedad spiritual ta “enguente”​—e siñansanan y disciplina di Hesus. Si nos kier mantene un punto di bista spiritual saludabel, nos mester acepta su conseho y somete nos na dje y tambe na e guia cu nos ta haya den Bijbel completo. Ademas, nos mester tin e mesun actitud mental cu Cristo tabatin y imita su ehempel. (Filipensenan 2:5; 1 Pedro 2:21) E enguente no ta gratis. Hesus a bisa: ‘Cumpr’e cerca mi.’ E ta ‘costa’ tempo y esfuerso.

Ora nos sali for di un luga scur y drenta un cuarto cu tin lus, por tuma poco tempo pa nos wowonan adapta nan mes. Mescos tambe, ta tuma tempo pa studia e Palabra di Dios y pa mira e lus di e berdad. Ta tuma tempo pa medita riba loke nos ta siña y reflexiona riba con precioso e berdad ta. Ma esei no ta costa nos masha. Dicon no? Pasobra e lus ta maraviyoso!

[Plachi na pagina 14]

“Cumpra cerca mi ... enguente pa hunta bo wowonan cu ne, pa bo mira”