Bibliya limbalewa kuti wanthu ‘wamoyo an’dziwa kuti an’dzafa, tsono anyakufa an’dziwa lini cinthu na cibodzico.’ (Mpalizi 9:5; Psalymo 146:4) Tenepo, ifepano tikafa, timbasiyiratu kukhala na moyo. Anyakufa ambakumbuka lini ne kubva cinthu.

‘Kupfumbiko un’dzabwerera’

Pomwe Mulungu adalewalewa na Adamu, mwamuna wakuyamba, iye adamufotokozera bzomwe bzingadamucitikira pakufa. Adamu alibe kubvera Mulungu, ndipopa Mulunguyo adamuuza kuti: ‘Iwepo ndiwe pfumbi, ndipo kupfumbiko un’dzabwerera.’ (Ciyambo 3:19) Pomwe Mulungu akhanati kulenga Adamu ‘kucokera ku pfumbi la pansi,’ Adamuyo pakhalibe. (Ciyambo 2:7) Tenepo, pomwe Adamu adafa, iye adabwerera ku pfumbi, acisiya kukhala na moyo.

Mpsibodzi-bodzimbo na wale omwe ambafa nsiku zino. Pakulewa bza wanthu na bzirombo Bibliya limbati: ‘Wense adacokera ku pfumbi, ndipo ku pfumbiko ndiko iwo an’dzabwerera.’​—Mpalizi 3:19, 20.

Munthu akafa, n’kulewa lini kuti bzense bzamalira pamwepo

Kawiri-kawiri, Bibliya limbandendemeza infa na tulo. (Psalymo 13:3; Juwau 11:11-14; Mabasa 7:60) Munthu omwe ankugona tulo twamphanvu, ambakhala ankudziwa lini bzomwe bzimbakhala bzinkucitika. Mpsibodzi-bodzimbo na anyakufa, iwo ankudziwa lini cinthu na cibodzico. Tsono, Bibliya limbapfunzisa kuti Mulungu an’dzalamusa anyakufa, kuti akhale pomwe na moyo. (Djobi 14:13-15) Kwa wale omwe Mulungu an’dzawalamusa, kufa kwawo kun’dzakhala kulibe kumala na bzense.