Numeri 6:1-27
6 Jehofa a tšwela pele a bolela le Moshe a re:
2 “Botša Baisiraele o re: ‘Ge e ba monna goba mosadi a ka dira keno e kgethegilego ya gore o tla phela e le Monasari*+ wa Jehofa,
3 a se ke a nwa beine goba bjala. A se ke a nwa beine e galakago goba bjala le ge e le bofe bjo bo galakago.+ A se ke a nwa seno le ge e le sefe seo se dirilwego ka diterebe, ebile a se ke a ja diterebe, e ka ba e le tšeo di sa tšwago go fulwa goba tšeo di omišitšwego.
4 Nakong ka moka ya ge e le Monasari, a se ke a ja selo le ge e le sefe seo se dirilwego ka diterebe, e ka ba e le tše tala goba matlakala a tšona.
5 “‘Nakong ka moka ya ge a ikanne gore e tla ba Monasari, a se ke a kota hlogo+ go fihlela ge nako ya gagwe ya go ba Monasari wa Jehofa e fedile. E be yo mokgethwa ka go tlogela meriri ya hlogo ya gagwe e gola.
6 A se ke a batamela setopo le ge e le sefe nakong ka moka ya ge a ineetše go Jehofa.
7 A se ke a itšhilafatša le ge e ka ba ka setopo sa tatagwe, sa mmagwe, sa ngwanabo wa mošemane goba wa ngwanenyana,+ ka gobane moriri wo o lego hlogong ya gagwe ke seka sa go bontšha gore ke Monasari wa Modimo.
8 “‘Nakong ka moka ya ge e le Monasari, ke yo mokgethwa go Jehofa.
9 Eupša ge e ba motho a ka hwa go sa letelwa a le kgauswi le Monasari,+ gomme Monasari yoo a kgwatha setopo sa motho yoo, ke moka a šilafatša moriri wa gagwe woo e lego seka seo se bontšhago gore o ineetše go Modimo, gona o swanetše go kota hlogo+ letšatšing la ge a hlwekišitšwe, e lego letšatšing la bošupa.
10 Ka letšatši la seswai a tliše maeba a mabedi a nageng goba maebana a mabedi go moperisita. A a tliše kgauswi le mojako wa taberenakele.
11 Moperisita a dire sebego sa sebe ka le lengwe, gomme ka le lengwe a dire sebego sa go fišwa. A mo direle sehlabelo sa gore a lebalelwe dibe+ ka ge a itšhilafaditše ka setopo. Ke moka lona letšatši leo Monasari a hlwekiše hlogo ya gagwe.
12 Ke moka a thome gape e be Monasari wa Jehofa, gomme a tliše nku e tona ya ngwaga o tee e le sebego sa molato. Eupša nako yeo a e feditšego e be e le Monasari e ka se balwe ka gobane o itšhilafaditše nakong ya ge e le Monasari.
13 “‘Bjale molao wa mabapi le Monasari šo: Nakong ya ge a fetša go ba Monasari,+ a tlišwe pele ga mojako wa taberenakele.
14 Ge a le moo a neele Jehofa sebego sa nku e tona yeo e phetšego gabotse ya ngwaga o tee e le sebego sa go fišwa,+ kwana e tshadi yeo e phetšego gabotse ya ngwaga o tee e le sebego sa sebe,+ nku e tona yeo e phetšego gabotse e le ya sehlabelo sa go dira khutšo le Modimo,+
15 mmanki wa dinkgwa tša nkgokolo tšeo di sa omelwago tša folouru yeo e šitšwego gabotse yeo e tswakilwego le makhura, diphaphatha tše di sa omelwago tše di tloditšwego ka makhura, ebile a tliše le sebego sa mabele+ le sebego sa beine.+
16 Moperisita a di neele pele ga Jehofa, a thome pele ka go neela Modimo sebego sa sebe ke moka a neele sebego sa go fišwa.
17 A neele nku e tona gore e be sehlabelo sa go dira khutšo le Jehofa, a neele le mmanki wa dinkgwa tše di sa omelwago. Le gona moperisita a neele le sebego sa mabele+ gotee le sebego sa beine.
18 “‘Monasari a kote moriri wa hlogo ya gagwe+ a le kgauswi le mojako wa taberenakele. Ke moka a tšee moriri woo wa go bontšha gore e be e le Monasari, a o lahlele ka mollong wa sehlabelo sa go dira khutšo le Modimo.
19 Moperisita a tšee letsogo la nku e tona leo le fufuditšwego+ gomme a ntšhe senkgwa setee sa nkgokolo seo se sa omelwago ka mmanking, a ntšhe le sephaphatha setee seo se sa omelwago ke moka a di bee ka diatleng tša Monasari ka morago ga ge a kotile moriri wo o bontšhago gore e be e le Monasari.
20 Moperisita a di tšokoletše pele le morago e le sebego sa go tšokotšwa pele ga Jehofa.+ Dilo tšeo ka moka le sehuba sa sebego sa go tšokotšwa le leoto leo le ntšhwago e le moneelo, ke dilo tše kgethwa go moperisita.+ Ka morago ga moo, motho yo e bego e le Monasari a ka nwa beine.
21 “‘Molao wa mabapi le Monasari+ yo a dirago keno šo: Ge e ba a ka dira keno gomme a se kgone go neela Jehofa sebego ka ntle le seo a swanetšego go se ntšha ka ge e le Monasari, gona o swanetše go no phetha keno yeo ka baka la go hlompha molao wa go ba Monasari.’”
22 Ke moka Jehofa a bolela le Moshe a re:
23 “Botša Arone le barwa ba gagwe o re: ‘Le šegofatše+ Baisiraele ka tsela ye. Le ba botše le re:
24 “Anke Jehofa a le šegofatše+ a be a le šireletše.
25 Anke Jehofa a le amogele+ ebile a le gaugele.
26 Anke Jehofa a le direle dilo tše dibotse ebile a le nee khutšo.”’+
27 Ba diriše leina la ka go šegofatša setšhaba sa Baisiraele,+ e le gore nna ke ba šegofatše.”+
Mengwalo ya Tlase
^ Bona Tlhaloso ya Mantšu.
